ՄԱՐԶԱԿԱՆ՝ ՓԵՏՐՈՒԱՐ Գ./2019

0

ՀԱՅԿԱԿԱՆ

Հայաստանի 4 Դահուկորդներ Կը Մասնակցին Աշխարհի Առաջնութեան
Աւստրիոյ Զէյֆէլթ քաղաքին մէջ 20 Փետրուար- 3 Մարտին տեղի կ’ունենայ դահուկավազքի աշխարհի 52-րդ մրցաշարքը: Հայաստանի ազգային ողոմպիական կոմիտէի մամլոյ ծառայութեան համաձայն, Հայաստանի հաւաքականին հետ սոյն մրցումներուն հանդէս պիտի գան չորս մարզիկներ՝ Գաթիա Գալստեան, Միքայէլ Միքայէլեան, Թադեւոս Պօղոսեան եւ Միասնիկ Ղարիպեան: Տղոց կազմը պիտի մրցի 15 քմ., 30 քմ. եւ 50 քմ. մրցատարածութիւններու վրայ, իսկ Գաթիա Գալստեան 5 քմ. եւ 15 քմ. տարածքի վրայ: Աւելցնենք, որ հայ դահուկորդները նախ պիտի մասնակցին արագավազքի (սփրինթ) մրցումներուն, որ տեղի պիտի ունենայ 21 Փետրուարին:

ՄԻՋԱԶԳԱՅԻՆ

Ճոզէ Մորինիօ Պիտի Վերադառնայ Մարզիչութեան Ասպարէզ
Փորթուկալցի մասնագէտ Ճոզէ Մորինիօ ներկայ եղաւ Ֆրանսայի Լիկա-1-ի «Լիլ»-«Մոնպէլիէ» հանդիպումին: Խաղէն ետք Մորինիօ յայտնեց, որ կը փափաքի աշխատիլ Ֆրանսայի խումբերուն հետ: Ան ըսաւ «Աշխատանք կը փափաքիմ ունենալ Ֆրանսական Լիկա-1-ին հետ: Արդէն աշխատած եմ 4 երկիրներու մէջ, ուստի կը սիրեմ նոր մշակոյթներ բացայայտել: Առաջնակարգ նոր խումբի հետ աշխատիլը ուղղակի հրաշալի կը դառնայ: Այս պահուն հանգիստ եմ, կը փորձեմ ժամանակս անցընել ընկերներուս եւ ընտանիքիս հետ: Այդ բոլորին հետ մէկտեղ կ’ուզեմ կրկին վերադառնալ մարզիչի գործին: 2-3 ամիս առանց աշխատանքի կրնամ մնալ, սակայն երբ այդ ժամանակաշրջանը երկարի, հոգեկան աշխարհս շատ բարդ կը դառնայ: Յոյս ունիմ, որ կարելիութիւն կ’ունենամ կրկին վերադառնալու եւ աւելի ուժեղ դառնալու»:

«Չելսի» Մտադիր Է Փոխել Գլխաւոր Մարզիչը
Լոնտոնի «Չելսի»ի ղեկավարութիւնը անհանգիստ է Անգլիոյ առաջնութեան մրցումներուն Մանչեսթըր Սիթիէն կրած 6 – 0 պարտութեան արդիւնքով: Ըստ The San թերթին, լոնտոնեան ակումբը կը մտածէ նոր գլխաւոր մարզիչ մը հրաւիրել: Աղբիւրին համաձայն, «ազնուականներ»ը կը փափաքին հրաւիրել Ռիալ Մատրիտի նախկին գլխաւոր մարզիչ Զենատտին Զիտանը, որ այս տարուան ամրան անըսպասելիօրէն իր հրաժարականը տուաւ եւ մինչեւ օրս կը գտնուի ազատ մարզիչի կարգավիճակին մէջ:«Չելսի»ի ղեկավարութիւնը կը փափաքի բանակցութիւններ վարել ֆրանսացի մասնագէտին հետ, նկատի ունենալով որ խումբի գլխաւոր մարզիչը՝ Սարին, ակումբի նախագահ՝ Ռոման Աբրամովիչը յուսախաբ դարձուցած է: Աւելցնենք, որ լոնտոնեան ակումբը վերջին չորս խաղերուն երեք պարտութիւն կրեց:

Պատրաստեց
Ռաֆֆի Սիւլահեան

Share.

Leave A Reply

This site uses Akismet to reduce spam. Learn how your comment data is processed.