ՍՈՒՐԻԱԿԱՆ ՄԱՄԼՈՅ ՏԵՍՈՒԹԻՒՆ՝ ՓԵՏՐՈՒԱՐ Դ./2019

0

Այս շաբաթ, սուրիական մամուլին մէջ լայն անդրադարձ կատարուեցաւ Սուրիա-Իրան յարաբերութիւններուն: ՍԱՆԱ լրատու գործակալութիւնը յայտնեց, որ Սուրիոյ արտաքին գործոց նախարար Ուալիտ ալ Մուալլէմ հեռաձայնային հաղորդակցութիւն մը ունեցած է իրանցի իր պաշտօնակից Ճաուատ Զարիֆի հետ:
Կողմերը խորհրդակցած են երկու բարեկամ երկիրներու ռազմավարական յարաբերութիւններու ամրապնդումին, եւ յատկապէս Սուրիոյ նախագահ Պաշշար ալ Ասատի Իրան կատարած պատմական այցելութեան:
Սուրիոյ նախագահին Իրան այցելութիւնը պատմական համարուեցաւ, յատկապէս այն պատճառով, որ վերջին անգամ ութը տարի առաջ էր, որ Սուրիոյ նախագահը Իրան այցելած էր:
Այլ առումով, սուրիական «Տամ Փրէս» կայքը կը յայտնէր, որ ՄԱԿ-ի մօտ Սուրիոյ մնայուն բանագնաց դոկտ. Պաշշար ալ Ճաաֆարի ՄԱԿ-ի Ապահովական Խորհուրդի նիստին խօսք առնելով շեշտած է, որ մարդասիրական գետնի վրայ Սուրիոյ նեցուկ կանգնելու կոչերը համոզիչ կը դառնան միայն այն պարագային, երբ մարդասիրական հարցերը քաղաքականութենէն հեռու կը պահուին եւ օգնութեան կողքին միջազգային ընտանիքին կողմէ ճիգ կը թափուի դէպի Սուրիա ահաբեկչական խումբերու հոսքին դադրեցման առումով:
Ճաաֆարի յայտնած է նաեւ, թէ «ՄԱԿ-ի Ապահովութեան Խորհուրդի մնայուն անդամներէն ոմանք իրենք զիրենք կը ներկայացնեն որպէս Սուրիոյ բնակչութեան մարդկային իրավիճակով մտահոգ կողմեր, սակայն խորքին մէջ, անոնք այլաբնոյթ աջակցութիւն կը ցուցաբերեն ահաբեկիչներուն ու Սուրիոյ դէմ իրարայաջորդ յարձակումներ կը գործեն:
«Զարմանալ կարելի է միայն ի տես այն պետութիւններուն, որոնք Սուրիոյ մարդասիրական թղթածրարով հետաքրքրութիւն ցուցաբերող Ապահովութեան Խորհուրդի անդամ ըլլալով մէկտեղ, նկատի չեն առներ Սուրիոյ կառավարութեան հետ խորհրդակցելու կարեւորութիւնը: Անոնցմէ ոմանք խոչընդոտ կը հանդիսանան սուրիացի տեղահանուածներուն Սուրիա վերադարձին՝ մարդասիրական աշխատանքը քաղաքական պայմաններու առնչելով, հակասելով մարդասիրական աշխատանքի սկզբունքներուն»:
Կայքին համաձայն, Ճաաֆարի շեշտած է, որ Սուրիա, մարդասիրական թղթածրարի 182-46 թուակիր որոշումին վրայ հիմնուելով, լուրջ աշխատանք կ’ակնկալէ Ապահովութեան Խորհուրդէն՝ յարգելու Սուրիոյ ինքնիշխանութիւնն ու քաղաքական հաշուարկներու չենթարկելու Սուրիոյ մարդասիրական թղածրարը:
Միւս կողմէ, սուրիական «Շամ Թայմզ» կայքին վրայ կը կարդանք, որ ռուս-սուրիական համակարգումի կեդրոնը հանդէս եկած է հաղորդագրութեամբ մը՝ շեշտելով որ. «Թանաֆ շրջանի ԱՄՆ-ի ուժերը արգելք կը հանդիսանան ԱՄՆ-ի հսկողութեան տակ գտնուող Մուխայամ Ռուքպանիէն տեղահանուածներու դուրս բերման՝ յայտնելով որ, դուրս ելլելու պարագային, սուրիական կառավարութեան հսկողութեան տակ գտնուող շրջաններուն մէջ անոնց կը սպասեն մահը, զինուորական պարտադիր ծառայութիւնն ու ձերբակալումը»:
Հաղորդագրութեան համաձայն. «Մարդկային իրաւանց սկզբունքներէն մեկնելով, Սուրիոյ կառավարութիւնը ռուսական կողմին հետ համագործակցաբար յառաջիկայ 1 Մարտ 2019-ին մարդասիրական յաւելեալ հանրակառքեր պիտի տրամադրէ Մուխայամ ալ Ռուքպանիէն տեղահանուածները իրենց ազատագրուած գիւղերը վերադարձնելու համար: Հանրակառքերը ԱՄՆ-ի բռնագրաւած շրջաններ մուտք պիտի գործեն ՄԱԿ-ի անմիջական հսկողութեամբ»:
Աղբիւրը կ’աւելցնէ, որ հաղորդագրութեան համաձայն, Ռուսիա եւ Սուրիա կոչ կ’ուղղեն ԱՄՆ-ի՝ անմիջապէս դուրս բերելու Սուրիոյ մէջ ապօրինի կերպով հաստատուած իր ուժերը:
Կրթական ոլորտին անդրադառնալով ՍԱՆԱ լրատու գործակալութիւնը կը յայտնէր, որ Սուրիոյ նախագահ Պաշշար ալ Ասատ հրապարակած է 2019-ի 69 թուակիր հրամանագիրը, ըստ որուն համալսարանական ուսումը շարունակելու առիթը սպառած բոլոր ուսանողներուն քննութիւն դիմելու առիթ կ’ընծայուի։ Հրամանագիրին համաձայն, ուսանողները քննութեան կրնան ներկայանալ 2018-2019 տարեշրջանի 2-րդ կիսամեային, իսկ ամառնային վերաքննութեան փոխարէն՝ յառաջիկայ 2019-2020 տարեշրջանի առաջին կիսամեային։

Share.

Leave A Reply

This site uses Akismet to reduce spam. Learn how your comment data is processed.