ԽՈՋԱԼՈՒԻ ՕՐԻՆԱԿԸ

0

Փետրուար 1992-ին Արցախեան ազատամարտին մէջ կարեւոր էջ մը բացուեցաւ, երբ հայ ազատամարտիկներ Խոջալուն ազատագրելով վերջ տուին Ստեփանակերտի եւ Բերդաձորի հայկական դիրքերը ռմբակոծող ազերի գրոհայիններու յառաջացման նկրտումներուն՝ վերականգնելով Մարտակերտ-Ստեփանակերտ կապը:
Արցախի մայրաքաղաքն ու այլ շրջանները վերջապէս զերծ կացուցուեցան թշնամիին գնդակներէն ու արցախեան ազատամարտը նոր թափ եւ տարողութիւն ստացաւ:
Ազերիները Խոջալուէն թիրախ կը դարձնէին հայկական ազատագրուած շրջանները, ուստի Խոջալուի ազատագրումը մարտավարական մեծ նշանակութիւն կը զգենար արցախեան ազատամարտի հետագայ նուաճումներու ապահովման իմաստով:
Խոջալուի ազատագրումով, ազերիական բանակը ոչ միայն զոհեր տալով կը նահանջէր, այլեւ շրջանէն փախուստ տուող ու ատրպէյճանական կողմը ապաստան որոնող թուրք բնակչութիւնը կը ջարդէր: Ազերիներու այս վայրագութիւնը, սակայն, լուսարձակի տակ չառնուեցաւ յառաջիկայ տարիներուն: Այս կացութենէն օգտուելով, Ատրպէյճան հայերուն դէմ ապատեղեկատուական քարոզարշաւ մը սկսաւ: Ան իր բռնատիրական ու մարդասպանական քաղաքականութիւնը արդարացնելու համար հայերուն վերագրեց այսպէս կոչուած «Խոջալուի Ցեղասպանութիւն»ը՝ դիտել տալով , որ հայ զինուորներ տեղւոյն բնակչութիւնը ջարդի ենթարկած են:
Բարեբախտաբար հայկական կողմը փաստացի տուեալներով միջազգային հանրութեան յաճախակիօրէն ներկայացուց ու տակաւին կը ներկայացնէ ճշմարտութիւնը, այլազան արշաւներով կը քօղազերծէ ատրպէյճանական ապատեղեկատուութիւնը:
Խոջալուի ազատագրումին դէմ ատրպէյճանական ատելավառ քարոզչութիւնը ինքնին պատգամ մըն է բոլոր անոնց, որոնք մերթ ընդ մերթ կը հաւատան հողեր զիջելով խաղաղութիւն հաստատելու քաղաքական ծուղակներուն:
Այնպէս ինչպէս Խոջալուի վտանգազերծումը կարեւոր գրաւական էր Արցախի ազատագրութեան ամբողջացման, անկախ հանրապետութեան հաստատման համար, այնպէս ալ ազատագրուած հողերուն պահպանումն ու Արցախեան հայրենիքի իւրաքանչիւր մղոնին տիրութիւն ընելը երաշխիքը կը համարուին Արցախի անվտանգութեան՝ տարհամոզելու ողջ աշխարհը, որ հողին համար արիւն թափողն ու զայն տիրութիւն ընողն է ճշմարիտը, անոր հետ պիտի բանակցին խաղաղութիւն ցանկացողները ու անոր անբռնաբարելի իրաւունքը պիտի յարգեն իրողաբար:

«Գ.»

Share.

Leave A Reply

This site uses Akismet to reduce spam. Learn how your comment data is processed.