ՄԱՐԶԱԿԱՆ՝ ՓԵՏՐՈՒԱՐ Դ./2019

0

ՀԱՅԿԱԿԱՆ

Դաւիթ Խաչատրեան Նուաճեց Եւրոպայի WMMAL Ախոյեանական Գօտին
Հայաստանը ներկայացնող առաջատար մարզիկ Դաւիթ Խաչատրեան Երեւանի մէջ տեղի ունեցած Mix Fight 40 մրցաշարքի ընթացքին նուաճեց Եւրոպայի ախոյեանական WMMAL գօտին՝ 3-ռաունտնոց մենամարտին ինքնավստահ յաղթանակ տանելով իտալացի Սիմոնէ Փոտինոյի նկատմամբ: Այսպիսով, Դաւիթ Խաչատրեան իր յաղթանակներուն թիւը բարձրացուց 14 մենամարտի: Մենամարտէն ետք, Եւրոպայի WMMAL ախոյեանական գօտին Դաւիթ Խաչատրեանին յանձնեց ՀԱՕԿ նախագահ Գագիկ Ծառուկեան:
Յիշեցնենք՝ որ նոյն մրցաշարքին նաեւ K1-ի մարզիկ, 68 քկ. ծանրութիւն ունեցող Ռազմիկ Ղուլինեան փայլուն մենամարտով տիրացաւ աշխարհի WKL ախոյեանութեան գօտիին՝ պարտութեան մատնելով Սպանիոյ առաջատար մարզիկը՝ Մանուէլ Գարսիան:

ՄԻՋԱԶԳԱՅԻՆ

Մանչէսթըր Սիթին` Անգլիոյ Բաժակակիր
Անգլիոյ բաժակի մրցումներուն ընթացքին, Մանչեսթըր Սիթին յաջողեցաւ նուաճում մը եւս արձանագրել իր յաղթարշաւին մէջ, աւարտական մրցումին 4 – 3 արդիւնքով պարտութեան մատնելով Չելսին: Մրցումի հիմնական եւ յաւելեալ ժամանակահատուածը 0 – 0 հաւասար աւարտելէ ետք, խումբերը դիմեցին 11 մեթրի հարուածներուն, ուր բախտը Կուարտիոլայի խաղացողներուն ժպտեցաւ: Հանդիպումին երկրորդ յաւելեալ ժամանակահատուածին տեղի ունեցաւ անսպասելի դէպք մը, երբ Չելսի խումբի սպանացի բերդապահ Արիզապալական, մերժելով մարզիչին որոշումը, դաշտին վրայ մնաց եւ շարունակեց մրցումը: Մարզիչը չկրցաւ զսպել իր ջղայնութիւնը, որովհետեւ ոչ մէկ կանոնագրային օրէնք գոյութիւն ունի նմանօրինակ դէպքերու պարագային, այսինքն՝ երբ խաղցող մը մերժէ փոխարինուիլ մրցումի ընթացքին, մարզիչը անել կացութեան կը մատնուի:
Աւելցնենք, որ անցեալ շաբթուան ընթացքին զոյգ խումբերը դարձեալ հանդիպած էին Անգլիոյ ախոյեանութեան մրցումներուն, ուր Սիթին 6 – 0 արդիւնքով պարտութեան մատնած էր Չելսին:

Պարսելոնա Մարքուս Ռեշֆորտը Կը Պահանջէ
Ըստ «Մունտօ-Տեփորթիւօ» լրատուամիջոցին, Սպանիոյ ֆութպոլի ախոյեան Քաթալոնէական Պարսելոնա ակումբի վարչակազմը մօտէն հետաքրքրուած է անգլիական Մանչեսթըր Իւնայթըտի յարձակողական խաղցող Մարքուս Ռեշֆորտով եւ կ’ուզէ սոյն խաղցողը ամրան փոխադրաշրջանին միացնել իր կազմին: Յայտնենք, որ Մարքուսի Մանչեսթըր Իւնայթըտի հետ կնքած պայմանագրութիւնը կ’աւարտի 30 Յունիս 2020-ին: Ըստ անգլիական կազմի ղեկավարութեան, այս տարեշրջանի աւարտէն ետք, երբ խումբին համար նոր մարզիչ մը նշանակուի, ֆութպոլիստին պայմանագրութեան երկարաձգման շուրջ բանակցութիւնները անմիջապէս պիտի սկսին:

Պատրաստեց
Ռաֆֆի Սիւլահեան

Share.

Leave A Reply

This site uses Akismet to reduce spam. Learn how your comment data is processed.