ՀԱՆԴԻՊՈՒՄ ԱՇՈՏ ՂՈՒԼԵԱՆԻ ՀԵՏ

0


Երեքշաբթի, 5 Մարտ 2019-ին, ՀՅԴ Եւրոպայի Հայ Դատի գրասենեակի նախագահ` Գասպար Կարապետեան Պրիւքսէլի Հայ Դատի գրասենեակէն ներս ընդունեց Արցախի Հանրապետութեան Ազգային ժողովի նախագահին` Աշոտ Ղուլեանի առաջնորդած պատուիրակութիւնը:

Հանդիպման ներկայ էին` ՀՅԴ Եւրոպայի Հայ Դատի գրասենեակի անձնակազմը, Պելճիքայի Հայ Յեղափոխական Դաշնակցութէան Կոմիտէութէան անդամներ, Պելճիքայի Հայ Օգնութեան Միութենէն, Համազգային Մշակութային Միութենէն, ՀՅԴ Արամ Երկանեան Երիտասարդական Միութենէն Եւ Պելճիքայի ՀՅԴ Հայ Դատի Յանձնախումբէն ներկայացուցիչներ:

Ողջունելով պարոն Ղուլեանի գալուստը, Գասպար Կարապետեան վերահաստատեց Հայ Դատի Գրասենեակի պատրաստակամութիւնը շարունակելու օժանդակել Արցախի Հանրապետութեան եւ պաշտպանել Արցախի ժողովուրդի իրաւունքները Եւրոպական հաստատութիւններու ներկայացուցիչներուն առաջ:

Աշոտ Ղուլեան իր կարգին գնահատեց Դաշնակցութեան, անոր ուղեկից միութիւններուն եւ Հայ Դատի գրասենեակներուն դերակատարութիւնը ազատ եւ անկախ Արցախի միջազգային ճանաչողութեան պայքարին մէջ:

Ղուլեան նկատել տուաւ.«Խորհրդարանէն ներս, երբ մեր գործունէութիւնը կ’ամփոփենք յատկապէս արտաքին կապերու հետ կապուած նիւթերու մասին, պարբերաբար կ’ընդգծենք Եւրոպայի Հայ Դատի Գրասենակի աջակցութեամբ արձանագրուած յաջողութիւնները»: Ան շարունակեց ըսելով` պայքարը ջերմեռանդութեամբ միասնաբար պիտի շարունակենք:

Անդրադառնալով հանդիպումին` Գասպար Կարապետեան ըսաւ. «սա առաջին անգամը չէ որ Արցախի Հանրապետութեան բարձրագոյն պաշտօնեաներ կ’այցելեն մեր գրասանեակը: Այսպիսի հանդիպումներու կարեւորութիւնը բարձր կը գնահատեմ, Սփիւռքի մէջ գործող Հայ Դատի կառոյցներուն եւ Արցախի իշխանութիւններուն համագործակցութիւնը առաւել եւս զարգացնելու եւ համադրելու նպատակով»:

Չորեքշաբթի, 6 Մարտին, Արցախեան պատուիրակութիւնը, որուն մաս կը կազմէ նաեւ ԱՀ Արտաքին գործերու փոխնախարար Արմինէ Ալեքսանեանը, պիտի մասնակցի Հայ Դատի գրասենեակին կազմակերպած` «Հայատեացութիւն. պատմական եւ արդի դրսեւորումները» խորագիրով գիտաժողովին, որ Եւրոխորհրդարանէն ներս տեղի պիտի ունենայ:

ՀՅԴ Եւրոպայի Հայ Դատի Յանձնախումբի Գրասենեակ
5 Մարտ 2019 – Պրիւքսէլ

Share.

Leave A Reply

This site uses Akismet to reduce spam. Learn how your comment data is processed.