ՍՐԲՈՑ ՔԱՌԱՆԻՑ ՄԱՆԿԱՆՑ ՄԱՅՐ ԵԿԵՂԵՑԻ – ՀԱԼԷՊ (ՎԵՐԱՇԻՆՈՒԹԻՒՆ ԵՒ ՎԵՐԱՕԾՈՒՄ)

0



Հալէպի Սրբոց Քառասնից Մանկանց Մայր Եկեղեցին, յատկապէս 2014 թուականէն սկսեալ` թիրախ դարձաւ ահաբեկչական խմբաւորումներու սաստիկ հռթիռակոծումներուն:

Թէեւ եկեղեցւոյ ներքնամասը մեծ վնասներու չենթարկուեցաւ, սակայն տարածքը` գլխաւոր մուտք, զանգակատուն, պատմական Առաջնորդարան, «Զարեհեան» Գանձատուն, Ազգ. Կեդրոնական Գրադարան, «Ն. Աղբալեան» սրահ, ՀԵԿ Դպրոցներու բաժին, շրջափակեր լուրջ քանդումներ կրեցին եւ մեծապէս վնասուեցան:

Հալէպի Ազատագրումով (22/12/2016), գլխաւորութեամբ Բերիոյ Հայոց Թեմի Բարեջան Առաջնորդ Գերաշնորհ Տ. Շահան Ս. Արք. Սարգիսեանի, Թեմի Ազգ. Վարչութիւնը նախաձեռնեց եկեղեցւոյ եւ տարածքի վերաշինութեան գործին, 2017 թուականի սկիզբը, յատկապէս որ Մեծի Տանն Կիլիկոյ Ս. Աթոռի Գահակալ ՆՍՕՏՏ Արամ Ա. Կաթողիկոս, Հալէպի շնորհած հովուապետական պատմական այցելութեան ընթացքին (5-8/01/2017), Սուրիոյ հայ համայնքի ՎԵՐԱԿԱՆԳՆՈՒՄի Հայրապետական Կոչը հանուր հայութեան` ի Մայր Հայաստան եւ ի Սփիւռս աշխարհի ուղղած էր Հալէպէն, վերընդգծելով Հալէպի եւ տեղւոյն հայ համայնքի գրաւած անփոխարինելի տեղն ու դերը հայութեան համայնական կեանքէն ներս:

Եկեղեցւոյ վերաշինութեան ծրագիրը կ՛ընդգրկէր հիմնական չորս բաժիններ: Առաջնահերթութեան կարգով, առաջին փուլին սկսան գլխաւոր մուտքի, զանգակատան եւ եկեղեցւոյ ներքնամասի վերաշինութեան ու նորոգութեան աշխատանքները: Հանդիսապետութեամբ Սրբազան Հօր, նախ յատուկ աղօթքով մեկնարկը տրուեցաւ եկեղեցւոյ վերաշինութեան ու նորոգութեան աշխատանքներուն, 30 Մայիս 2018-ինապա ստորագրուեցան գործնականացման պաշտօնական համաձայնագրերը: Սրբազան Հայրը իր սրտի խօսքով, նախ ընդգծեց Սուրիական Հայրենիքին կառչած մնալու անհրաժեշտութիւնը, միաժամանակ վեր առնելով պատմական  Սրբոց Քառասնից Մանկանց Մայր Եկեղեցւոյ պարզած նշանակութիւնը Հալէպի հայ համայնքին եւ հանուր հայութեան համար:

Սրբազան Հօր անմիջական հսկողութեամբ ու ցուցմունքներով, Ազգ. Վարչութեան եւ Շինարարական Յանձնախումբին հետեւողական հետապնդումով, տարբեր կողմերու նուիրատուութիւններով ու հաւատացեալ ժողովուրդին սրտաբուխ մասնակցութեամբ, արդէն իրականացած է առաջին փուլի ծրագիրը, եկեղեցւոյ պաշտօնական վերաօծումը պիտի կատարուի ձեռամբ Արամ Ա. Վեհափառ Հայրապետին, Շաբաթ, 30/03/2019-ին, եկեղեցւոյ անուանակոչութեան տօնին, եւ եկեղեցւոյ զանգի քաղցրալուր ղօղանջին հետ, հնադարեան սրբավայրը իր դռները լայնօրէն պիտի վերաբանայ հաւատացեալներուն առաջ:

Եկեղեցին Հայկական Ծննդավայրն Է Հոգւոյս…:

ՀԱԼԷՊ, 25/02/2019

Share.

Leave A Reply

This site uses Akismet to reduce spam. Learn how your comment data is processed.