ՍՈՒՐԻԱԿԱՆ ՄԱՄԼՈՅ ՏԵՍՈՒԹԻՒՆ՝ ՄԱՐՏ Ա./2019

0

Արաբական խորհրդարանական վեհաժողովը այս շաբթուան սուրիական մամուլի էջերուն վրայ հիմնական տեղ կը գրաւէր: ՍԱՆԱ լրատու գործակալութիւնը կը յայտնէր, որ Յորդանանի մայրաքաղաքին մէջ տեղի ունեցած է Արաբ Խորհրդարանական Միութեան աշխատանքային 29-րդ շրջանին «Երուսաղէմը Պաղեստինի մնայուն մայրաքաղաք» խորագրով վեհաժողովը, որուն մասնակցած է նաեւ Սուրիոյ խորհրդարանի պատուիրակութիւնը՝ Համուտա Սապպաղի նախագահութեամբ:
Վեհաժողովը ընդգծած է Իսրայէլի հետ յարաբերութիւնները խզելու եւ այս առումով վճռական դիրքորոշում առնելու անհրաժեշտութիւնը:
Ժողովի եզրափակիչ հաղորդագրութեան մէջ արձանագրուած է, որ պաղեստինեան հարցը կը շարունակէ մնալ կեդրոնական գերխնդիր, իսկ պաղեստինցիներու իրաւուքներուն հակադրուող միջազգային իւրաքանչիւր որոշում ապօրինի կը համարուի:
Հաղորդագրութեան մէջ յիշուած է, որ Երուսաղէմի քրիստոնէական եւ իսլամական սրբավայրերուն դէմ Իսրայէլի իրարայաջորդ յարձակումները եւ քաղաքին համայնապատկերը աղաւաղելու յաճախակի փորձերը, արաբ եւ իսլամ ժողովուրդներուն դէմ ի գործ դրուած արարքներ կը համարուին:
Հաղորդագրութեան մէջ յիշուած է նաեւ, որ իսրայէլեան-արաբական հակամարտութիւնը իր աւարտին պիտի հասնի եւ ողջ տարածաշրջանին անվտանգութիւնը պիտի վերականգնի, երբ վերջ գտնէ Իսրայէլի բռնագրաւումը արաբական հողերուն եւ հռչակուի Պաղեստինի անկախ պետութիւնը՝ Երուսաղէմը ունենալով որպէս մայրաքաղաք:
Միւս կողմէ RT կայքէջը արաբական երկիրներու սպառազօնման մակարդակին մասին տեղեկութիւններ փոխանցելով յայտնած է, որ 2019-ին Եգիպտոս արաբական երկիրներուն մէջ ամենազօրաւոր բանակ ունեցող երկիրը կը համարուի: Սէուտական Արաբիան երկրորդ դիրքը կը գրաւէ, Ալճերիան՝ երրորդը, իսկ Սուրիան՝ չորրորդը: Համաշխարհային մակարդակի վրայ, ԱՄՆ կը գրաւէ առաջին դիրքը, Ռուսիա՝ երկրորդը, Չինաստան՝ երրորդը, Հնդկաստան՝ չորրորդը, իսկ Փաքիստան՝ հինգերորդը:
RT-ի համաձայն, սոյն դասակարգումը կատարուած է զէնքերու բազմազանութեան ու արդիականութեան, տուեալ երկրի աշխարհագրական տուեալներուն, ժողովրդագրական պատկերին ու այլ գործօններու համաձայն։
Անդրադառնալով Միջին Արեւելեան տարածաշրջանի հարցերուն, նոյն աղբիւրը կը յայտնէ, որ Երեքշաբթի, 5 Մարտ 2019-ին, Իրանի արտաքին գործոց նախարար Մուհամմէտ Ճաուատ Զարիֆ «Ալ Ֆուրաթ» պատկերասփիւռի կայանին հետ ունեցած հարցազրոյցի մը ընթացքին յայտարարած է, որ ան Սուրիոյ նախագահ Պաշշար ալ Ասատէն Սուրիա այցելելու հրաւէր ստացած է: Զարիֆ իր հրաժարականը յետս կանչելու լոյսին տակ, նախագահ Ասատէն նման հրաւէր ստացած է: Ըստ Իրանեան ԻՍՆԱ գործակալութեան, Զարիֆ հրաժարելու որոշումը գոյացուցած էր որպէս բողոք՝ նախորդ շաբթուան մէջ նախագահ Ասատի Թեհրան այցելութենէն տեղեակ չըլլալուն համար։
Այլ առումով, սուրիական «Ալ Ուաթան» թերթի էջերէն կ’իմանանք, որ յորդանանեան թռիչքները կարգաւորող խորհուրդին որոշումով՝ Սուրիա-Յորդանան թռիչքները պիտի վերսկսին։ Յորդանանցի մասնագէտներ երկու ամիս տեւող սերտողութենէ ետք հաւաստիացուցած են սուրիական օդային տարածքին ապահովութիւնը:
Աղբիւրին համաձայն, Սուրիոյ Փոխադրամիջոցներու Նախարարութիւնը տեղեակ չէ յորդանանեան սոյն որոշումէն: Սուրիական կողմը պաշտօնական որեւէ դիմում չէ ստացած այս գծով:

Share.

Leave A Reply

This site uses Akismet to reduce spam. Learn how your comment data is processed.