ՄԱՐԶԱԿԱՆ՝ ՄԱՐՏ Ա./2019

0

ՀԱՅԿԱԿԱՆ


Ըմբիշ Մաքսիմ Մանուկեան Պուլկարիոյ բաժակին տիրացաւ Յունահռոմէական ոճի ըմբշամարտի Հայաստանի հաւաքականի անդամ, աշխարհի եւ Եւրոպայի ախոյեան Մաքսիմ Մանուկեան, Պուլկարիոյ միջազգային մրցաշարքէն յաղթական դուրս եկաւ: Ըստ «Արմէն- փրէս»ի, պուլկարական Ռուսէ քաղաքին մէջ ընթացող Թան Կոլովի եւ Նիկոլա Պետրովի յուշամրցաշարքին 87 քկ. ծանրութիւն ունեցող խաղցողներու եզրափակիչին, միայն 50 վայրկեանուան մէջ Մանուկեան 8 – 0 արդիւնքով յաղթեց Ճափոնի ներկայացուցիչին: Մաքսիմ յաջողեցաւ նուաճել այս տարուան իր առաջին մետալը: Հետագային, Հայաստանի մէկ այլ մարզիկ՝ Սարգիս Քոչարեան 82 քկ. մրցումներուն արժանացաւ պրոնզէ մետալի:

ՄԻՋԱԶԳԱՅԻՆ

Պարսելոնան Երկու Անգամ Պարտութեան Մատնեց Ռիալ Մատրիտը
72 ժամուան ընթացքին, Քաթալոնիական ակումբը՝ Պարսելոնան, յաջողեցաւ պարտութեան մատնել մայրաքաղաքի թագաւորական խումբը՝ Ռիալ Մատրիտը: Սանթիակօ Պերնապէ մարզադաշտին մէջ, հիւրընկալ խումբը 3 – 0 արդիւնքով զիջեցաւ Պարսելոնային, որուն յաղթանակին հաթրիքի կոլերուն հեղինակը դարձաւ Սուարէզը: Զոյգ խումբերը երեք օր վերջ դարձեալ նոյն դաշտին վրայ հանդիպելով ներկայացուցին բարձր մակարդակի խաղարկութիւն մը, որուն յաղթականը դարձեալ Պարսելոնան հանդիսացաւ՝ 1 – 0 արդիւնքով: Հանդիպումի լարուած մթնոլորտին պատճառով, իրաւարարը մէկէ աւելի առիթներով ցոյց տուաւ դեղին քարտը. անոնցմէ մէկը Ռիալի խմբապետ Ռամոսին համար էր: Հանդիպումի 26-րդ վայրկեանին Խրուաթեացի խաղցող Իվան Ռաքէթիչ արձանագրեց հանդիպումի միակ կոլը, որմէ ետք երկու խումբերու խաղցողները չյաջողեցան տիրապետել դարպասներուն: Ռիալ Մատրիտի պատանի խաղցող Ճունիըր Վինիսիոս մեծ վտանգի ենթարկեց Շթէնկէնի բերդը, բայց անոր ուղղած բոլոր գնդակները ապարդիւն մնացին:
Աւելցնենք, որ մրցումի աւարտին Ռիալի համակիրները քննադատեցին ակումբին նախագահը, եւ պահանջեցին անոր հրաժարականը:

Փերէզը կ’ուզէ խումբին նոր մարզիչ նշանակել
Սպանիոյ Ռիալ Մատրիտի նախագահ Ֆլորենթինօ Փերէզ տարեշրջանի աւարտին կ’ուզէ խումբին համար նոր մարզիչ մը նշանակել, որովհետեւ այժմու մարզիչը՝ արժանթինցի Սոլարին, շատ հաւանական է, որ լքէ կազմը: Ըստ calciomercato-ի՝ Փերէզ իր մտապատկերին մէջ ունի երկու անուն: Հիմնական յաւակնորդը Մասիմիլիանօ Ալեկրին է, երկրորդը՝ արժանթինցի մարզիչ Մաուրիսիօ Պոչետինօն: Ըստ իտալական աղբիւրներու, Իւվենթուսի գլխաւոր մարզիչ Ալէկրին պիտի շարունակէ իր պաշտօնը իտալական խումբին հետ եւ պատրաստ չէ հեռանալ Իտալական լիկէն: Եթէ այս երկու թեկնածուներուն հետ բանակցութիւնները չյաջողին, Փերէզ պիտի առաջարկէ այլ անուններ, որոնց կարգին են փորթուկալցի Մորինիոն, Գերմանիոյ հաւաքականը գլխաւորող Եոահիմ Լովը եւ Լիվըրփուլի գլխաւոր մարզիչ Իւրկէն Կլոփը:

Պատրաստեց
Ռաֆֆի Սիւլահեան

Share.

Leave A Reply

This site uses Akismet to reduce spam. Learn how your comment data is processed.