ԿՆՈՋԱԿԱՆ՝ ՄԱՐՏ Ա./2019

0

ՄԱՆՈՒԿԸ ՎԱԽՑՆԵԼՈՎ ՉԿՐԹԵՆՔ


Մանուկները վախցնելով սաստելու եւ կրթելու սովորութիւնը տակաւին աւեր կը գործէ ընտանիքներէն ներս: Դժբախտաբար յաճախ կը հանդիպինք նաեւ երիտասարդ եւ «ուսեալ» մայրերու, որոնք նոյն զէնքին կը դիմեն իրենց լալկան կամ անհանդարտ զաւակները կրթելու համար:
Մայրեր երբեմն ամենափոքր դժուարութեան դիմաց կը սպառնան իրենց մանուկներուն ըսելով.
«Հիմա զինուորին լուր պիտի տամ, որ քեզ բանտ տանի»:
«Հիմա բժիշկը պիտի կանչեմ, որ քեզի ասեղ ընէ»:
«Հիմա տունը պիտի ձգեմ՝ երթամ, որ առանց մամայի մնաս….»:

Սպառնալիքներ, որոնք ոչ միայն չեն կրթեր, այլ կը նուաստացնեն մայրը: Բնականաբար ան պիտի չկարենայ գործադրել իր սպառնալիքը եւ իր մէջ պիտի ստեղծուի պարտուողի հոգեբանութիւնը: Սոյն միջոցին կը դիմեն հաւանաբար այն ծնողները, որոնք նոյն վերաբերմունքին արժանացած են իրենց ծնողներուն կողմէ:
Վախով եւ սպառնալիքով «դաստիարակուած» մանուկը պիտի վախնայ մութէն, զինուորէն, բժիշկէն….: Շատ ուշգրաւ պարագայ է մանուկներուն մօտ ուշ յայտնուող գիշերամիզութիւնը: Չնչին տոկոս մը միայն օրկանական լուրջ պատճառներու կը վերագրուի, մնացած մեծ տոկոսին մօտ ջղային կամ հոգեկան պատճառներ պէտք է փնտռել:
Դժուարագոյնը բժիշկին կամ ատամնաբոյժին հանդէպ ստեղծուած վախն է: Անշուշտ օր մը մանուկը պիտի հիւանդանայ եւ ստիպուի բժիշկին մօտ երթալ:
Վախը երեխան կը դարձնէ խուսափող, կասկածամիտ, դիւրազգաց եւ կրաւորական: Ուստի մեր զաւակները դաստիարակենք խրատելով եւ երկխօսութեամբ՝ ապագային ունենալու համար յաջող եւ ինքնավստահ երիտասարդներ:

«ԿԻՆԷՍ 2019» ՄՐՑԱՆԻՇԵՐՈՒ ԳԻՐՔԸ

«Կինէս» մրցանիշերու գիրքը առաջին անգամ հրատարակուած է 1955-ին: Աշխարհի ամենատարածուած մրցանիշերու գիրքին մէջ ամէն տարի կþարձանագրուին աշխարհի տարածքին առնուազն երեք հազար նոր մրցանիշեր, որոնց մէկ երրորդը մարզական է: Գիրքը ինքնին մրցանիշ արձանագրած է որպէս ժամանակի ամենաշատ վաճառուող հեղինակային իրաւունքով պաշտպանուած գիրքը:
Այս տարի «Կինէս 2019» մրցանիշերու գիրքը լոյս աշխարհ բերաւ իր 64-րդ հրատարակութիւնը՝ տպուած 100 երկիրներու մէջ, 23 լեզուներով եւ վաճառուած աւելի քան 141 միլիոն օրինակով: Անոր մէջ տեղադրուած են այսօրուան մեր աշխարհի վերջին զարգացումները: Ընդ որում, այս տարի կը յիշատակենք անհաւատալի շարժումը՝ գիւտարարներու, երազողներու, ստեղծագործողներու, որոնք կը ձգտին հասնիլ յատուկ մրցանիշերու:
«Կինէս» մրցանիշերու համաշխարհային պատկերասփիւռային ծրագրերը տարեկան կը հասնին 750 միլոն դիտողներու, իսկ աւելի քան 2,7 միլոն անձ բաժանորդագրուած է անոր You Tube-ի ալիքին: GWR (GUINNESS WORLD RECORDS) կայքը ունի աւելի քան 19,8 միլիոն այցելու:
Համաշխարհային մրցանակակիր դառնալու համար միջազգային հեղինակութիւն վայելող Ֆրանչայզինգ կազմակերպութիւնը դատաւորներու միջոցով կը ստուգէ, ապա կը վաւերացնէ մրցանակը:
Վերջապէս երբ թերթատենք «փորձենք մեր տան մէջ» բաժինը, մենք կը հանդիպինք տան մէջ իրագործելի հաճելի մրցանիշերու: Հաւանաբար օր մը արձանագրենք մրցանիշ մը, որ կրնայ տեղադրուիլ «Կինէս» մրցանիշերու գիրքին մէջ:

Share.

Leave A Reply

This site uses Akismet to reduce spam. Learn how your comment data is processed.