ՔԵՍԱՊԻ ՄԷՋ ՀԱՅ ՍԿԱՈՒՏԻ ՕՐՈՒԱՆ ՅԻՇԱՏԱԿՈՒՄ

0

Հայ Սկաուտին օրը կը յիշատակուի Փետրուար ամսուն, որովհետեւ Փետրուար ամիսը կը զուգադիպի համաշխարհային սկաուտութեան հիմնադիր Լորտ Պէյտըն Փաուլի ծննդեան ամսուան, իսկ հայութեան համար այս ամիսը յատկանշուած է Վարդանանց հերոսամարտով, Փետրուարեան ապստամբութեամբ, Արցախեան ազատագրական շարժումով: ՀՄԸՄ-ի Քեսապի մասնաճիւղն ալ, նման ՀՄԸՄ-ի աշխարասփիւռ այլ մասնաճիւղերուն, ամէն տարի Փետրուար ամսուն կը յիշատակէ Հայ Սկաուտին օրը, սակայն այս տարի տօնը իւրայատուկ էր Քեսապի մասնաճիւղին համար, որովհետեւ կը զուգադիպէր մասնաճիւղի հիմնադրութեան 25-ամեակին:

Հովանաւորութեամբ ՀՄԸՄ-ի Քեսապի մասնաճիւղի վարչութեան, կազմակերպութեամբ Սկաուտ Խորհուրդին եւ խմբապետական կազմին, Կիրակի, 24 Փետրուար 2019-ին, տեղի ունեցաւ Հայ Սկաուտի Օրուան տօնակատարութիւնը՝ «Սարդարապատ» սրահէն ներս:

Ձեռնարկը ընթացք առաւ Հայաստանի Հանրապետութեան, Սուրիական Հանրապետութեան եւ «Ով Հայ Արի» քայլերգներու ունկնդրութեամբ, որմէ ետք Արի-Արենուշ Միաւորի պատասխանատու Դալար Լնդեան ներկաները հրաւիրեց մէկ վայրկեան յոտնկայս յարգելու յիշատակը մեզմէ առյաւէտ բաժնուած ՀՄԸՄ-ականներուն, ապա արտասանեց բացման խօսքը՝ յայտնելով որ հայ ժողովուրդին պատմութեան մէջ Փետրուար ամիսը ազգային տօներու, աւանդութիւններու, հերոսական սխրանքներու եւ քաջագործութիւններու ամիս է, իսկ Հայ Սկաուտին օրը իւրայատուկ եւ մասնակի տեղ կը գրաւէ իւրաքանչիւր հայ սկաուտի կեանքէն ներս: Ան իր խօսքին աւարտին շնորհաւորեց Քեսապի մասնաճիւղին 25-ամեակը՝ մաղթելով աննահանջ երթ դէպի նորանոր ամեակներ: Գեղարուեստական յայտագիրը կ’ընդգրկէր խմբային արտասանութիւն, մասնաճիւղի 25-ամեայ գործունէութեան մասին պատմող տեսերիզի ցուցադրութիւն, չափական եւ գաւազանով մարզանք, բուրք եւ թմպլիկ։ Ապա տեղի ունեցաւ նորագիր կարգի խոստումի արարողութիւն, փողկապատուչութիւն եւ վկայականաց բաշխում: Աւարտին, Տէր Նարեկ Քհնյ. Զերենցեան իր պատգամը ուղղեց։ Ձեռնարկը վերջ գտաւ «Յառաջ Նահատակ» քայլերգով՝ սկաուտներուն եւ ներկաներուն երգեցողութեամբ:

Թղթակից

Share.

Leave A Reply

This site uses Akismet to reduce spam. Learn how your comment data is processed.