ՎԵՐԱԿԱՆԳՆՈՒՄԻ ԱՇԽԱՏԱՆՔՆԵՐՈՒ ՀԱՄԱՅՆԱՊԱՏԿԵՐ (ՄԱՍ Ա.)

0

Սուրիական պատերազմին ընթացքին հալէպահայ յարանուանութիւնները անմասն չմնացին զոհեր տալէ, նիւթական վնասներ կրելէ: ՆՍՕՏՏ Արամ Ա. Կաթողիկոս 2017 տարին արդէն իսկ Վերականգնումի Տարի հռչակած էր, դիտել տալով, որ վերականգնումը երաշխիք է զարգացման ու հզօրացման: Սուրիահայ կեանքէն ներս փուլ առ փուլ ընթացք առին վերականգնումի աշխատանքները, որպէսզի համայնքին կեանքը աստիճանաբար վերակազմակերպուի ու բնականոն դառնայ: Սոյն տեղեկագիրով լուսարձակի տակ կ’առնենք անցնող ժամանակահատուածին վերանորոգուած կառոյցներուն շարքը:

ՀԱՅ ԱՌԱՔԵԼԱԿԱՆ ՀԱՄԱՅՆՔ

ՀԱԼԷՊԻ ՍՐԲՈՑ ՔԱՌԱՍՆԻՑ ՄԱՆԿԱՆՑ ՄԱՅՐ ԵԿԵՂԵՑԻ

Ուրբաթ, 30 Մայիս 2018-ին, հանդիսապետութեամբ Բերիոյ Հայոց Թեմի Առաջնորդ Գերշ. S. Շահան Ս. Արք. Սարգիսեանի, յատուկ աղօթքով մեկնարկը կատարուեցաւ Ս. Քառասնից Մանկանց Մայր եկեղեցւոյ նորոգութեան աշխատանքներուն, ապա շինարարական ընկերութեան եւ հսկող երկրաչափին հետ ստորագրուեցան պաշտօնական համաձայնագիրներ։

ՍՕ ԽԱՉԻ ԱԶԳ. ՊԱՏՍՊԱՐԱՆ

ՍՕ Խաչի հովանաւորութիւնը վայելող Ազգ. Պատսպարանը 2012 Սեպտեմբերին Նոր Գիւղի հրթիռակոծման հետեւանքով մեծ վնասներ կրած էր, քանդուած էին յատկապէս անոր արեւելեան մասը, կեդրոնի սրահը, փշրուած էին փեղկերն ու ապակիները:
Հալէպի մէջ խաղաղութեան հաստատումէն անմիջապէս ետք, 27 Մարտ 2017-ին վերանորոգման համար յառաջացած յանձնախումբը ձեռնամուխ եղաւ շէնքի վերաշինութեան, Առաջնորդ Սրբազան Հօր գլխաւորութեամբ, Ազգ. Իշխանութեան ու ՍՕ Խաչի Շրջ. Վարչութեան քաջալերանքով, «Զուլ Սիքալէյն» կազմակերպութեան միջնորդութեամբ եւ վերաշինութեան մարմինին օժանդակութեամբ: Այնուհետեւ պատսպարանը բնակելի դարձաւ:

ՍՕ ԽԱՉԻ ԸՆԿԵՐԱԲԺՇԿԱԿԱՆ ԿԵԴՐՈՆ

1 Յունիս 2014-ին, Հալէպի հայաբնակ Նոր Գիւղ շրջանը թիրախ դարձած էր ահաբեկիչներու հրասանդերուն եւ կազի տակառներուն։ Այս իսկ պատճառով լրջօրէն վնասուած էր նաեւ ՍՕ Խաչի Ընկերաբժշկական կեդրոնը, հետեւաբար տեղւոյն աշխատանքներն ու մատուցուած բարեսիրական ծառայութիւնները դադրած էին:
13 Փետրուար 2016-ին, կեդրոնը կրկին ռմբակոծումի ենթարկուեցաւ ու այս անգամ ամբողջովին անգործածելի դարձաւ:
5 Յունուար 2017-ին, ՆՍՕՏՏ Արամ Ա.Վեհափառ Հայրապետը այցելեց Ընկերաբժշկական Կեդրոն, Բերիոյ Հայոց Թեմի Առաջնորդ Գերշ. Տ. Շահան Ս. Արք. Սարգիսեանի եւ Ազգ. Իշխանութեան անդամներուն ընկերակցութեամբ: Վեհափառ հայրապետը դիմաւորուեցաւ խաչուհիներուն կողմէ: Անոնք Վեհափառ Հայրապետին յայտնեցին Ընկերաբժշկական կեդրոնը վերաշինութեան ենթարկելու իրենց որոշումը:
15 Սեպտեմբեր 2018-ին, գլխաւորութեամբ Բերիոյ Հայոց Թեմի Առաջնորդ Գերաշնորհ Տ.Շահան Ս. Արք. Սարգիսեանի, մեկնարկը տրուեցաւ կեդրոնի նորոգութեան եւ վերաշինութեան աշխատանքներուն:
ՍՕ Խաչի Ընկերաբժշկական կեդրոնը շուտով իր վերանորոգեալ պայծառ դիմագիծով պիտի վերականգնի եւ աներեր շարունակէ նուիրական գործը՝ շնորհիւ Սուրիոյ Նախագահական պալատի իշխանական նուիրատութեան:

ՍՕ ԽԱՉԻ ԿԱԶԴՈՒՐՄԱՆ ԿԱՅԱՆ

ՍՕ Խաչի Կազդուրման կայանը անմասն չմնաց Սուրիոյ պատերազմի հետքերէն եւ նախորդ վեց տարիներուն ընթացքին անգործածելի դարձաւ:
ՍՕ Խաչի Շրջանային Վարչութիւնը, նկատի ունենալով երկրի համեմատաբար ապահով վիճակը, Ապրիլ 2017-ին կայանի նորոգութեան ձեռնարկեց:
Կայանի ամբողջական նորոգութիւնը վերջ գտաւ 15 Յուլիս 2017-ին եւ օգտաշատ դերակատարութիւն ունեցաւ ամրան շրջանին թէ՛ Պատսպարանի փոքրիկներուն օդափոխութեան եւ թէ ՀՄԸՄ-ի, ՍԵՄ-ի, Պատանեկան եւ Ուսանողական միութիւններու տարեկան բանակումներուն վայր հանդիսանալով:

ԳԱՐԱՏՈՒՐԱՆԻ Ս. ԱՍՏՈՒԱԾԱԾԻՆ ԵԿԵՂԵՑԻ

Քեսապի Գարատուրան շրջանի Հայ Առաքելական Սուրբ Աստուածածին եկեղեցին վերստին օծուեցաւ:
Եկեղեցին 21 Մարտ 2014-ին, ահաբեկիչներու Քեսապ ներխուժման պատճառով սրբապղծուած եւ թալանուած էր, սակայն ազատագրումէն կարճ ժամանակաշրջան մը վերջ կարելի եղաւ վերանորոգել զայն:
Բերիոյ Հայոց Թեմի Առաջնորդ Գերշ. Տ. Շահան Ս. Արք. Սարգիսեան եկեղեցւոյ օծման կարգը կատարեց 25 Յուլիս 2014-ին եւ Վարդավառի տօնին առիթով Սուրբ եւ Անմահ Պատարագ մատուցեց այնտեղ, ուր իր պատգամը ուղղեց քեսապահայութեան:

ՂՆԵՄԻԷԻ Ս. ԳԷՈՐԳ ԵԿԵՂԵՑԻ

Ղնեմիէն զինեալ ահաբեկիչներու տիրապետութեան տակ եղած շրջանին, անոր միակ հայկական եկեղեցին՝ Ս. Գէորգը, ծանր վնասներու ենթարկուած էր: Եկեղեցւոյ արտաքին քարերն ու զանգակը գողցուած էին, գմբէթի խաչը անհետացած, կողքի սրահը եւ երիցատունը համարեա՛ քանդուած էին:
Բերիոյ Հայոց Թեմի Առաջնորդ Գերշ. Տ. Շահան Ս. Արք. Սարգիսեան իր շքախումբով ուխտագնացութիւն կատարեց դէպի հայկական Ղնեմիէ գիւղ՝ 11 Օգոստոս 2017-ին: Գմբէթի խաչը զետեղուելէն ետք, այնտեղ պատարագ մատուցուեցաւ: Յընթացս Ս. Պատարագին, Առաջնորդ Սրբազան Հայրը յաւուր պատշաճի իր պատգամ-քարոզը տուաւ եւ ՆՍՕՏՏ Արամ Ա. Վեհափառ Հայրապետին օրհնութիւնները փոխանցեց:

ՀՄԸՄ-Ի ՊԱՍՔԵԹԻ ԴԱՇՏԻ ՆՈՐՈԳՈՒԹԻՒՆ

2013-ին Սուրիոյ եւ յատկապէս Հալէպի մէջ տիրող պատերազմի տագնապալի օրերուն, ահաբեկչական դաւադիր հրթիռակոծումներու հետեւանքով, Հալէպի ՀՄԸՄ-ի պասքեթի, ֆութպոլի եւ թենիսի մարզադաշտերը հռկիզուեցան ու ահաւոր վնասներ կրեցին: Ներկայ սերունդը զրկուեցաւ մարզական իր կեանքը բնականոն կերպով զարգացնելու կարելիութենէն:
Հալէպի մէջ տեղի ունեցած վերանորոգումներու կարգին, 2015-ին ՀՄԸՄ-ի Հալէպի Մասնաճիւղի Վարչութիւնը սկսաւ պասքեթի դաշտի նորոգութիւնը՝ յոյս ներշնչելու երիտասարդ սերունդին ու վերակազմակերպելու միութեան մարզական կեանքը: Նախ որոշուեցաւ փոքրածաւալ նորոգութեամբ մը խումբերը մարզանքի լծել, բայց երբ շարք մը կազմակերպութիւններ եւ անհատներ նիւթապէս օժանդակեցին ու քաջալերեցին տարուած աշխատանքը, որոշուեցաւ օրինական չափանիշերով նախ նորոգել պասքեթի դաշտը: Հալէպի Վարչութեան աշխատանքին եւ յետապնդումին շնորհիւ, այսօր պատուած են պասքեթի երկու գոցօթեայ դաշտերը, մեծը՝ մրցումներու յատուկ, իսկ փոքրը՝ փորձերու համար, որոնց կողքին կառուցուած են հանդերձարաններ: Դաշտը ընտանեկան պարտէզէն անջատուած է ապակեայ թափանցիկ պատուհաններով: Մեծ դաշտին մէջ շինուած են հանդիսականներու յատուկ երեք յարկանի աստիճաններ, որոնց վրայ շուտով Հալէպի ֆետերասիոնին (դաշնակցութեան) օժանդակութեամբ պիտի տեղադրուին կարմիր, կապոյտ եւ նարնջագոյն գոյները կրող դաշտի աթոռներ: Դաշտերուն ելեկտրականութեան եւ լուսաւորումի սարքերը ամբողջացած են: Մարզադաշտի յատակը պիտի պատուի կակուղ յատուկ ծածկով մը, որ անհրաժեշտ է մարզիկներուն առողջութեան համար:
Պասքեթի դաշտը կրնայ ընդունիլ մինչեւ 600 հանդիսատես. սա միութեան խումբերու մրցումներուն համար ստուար թիւ մը կը ներկայացնէ: Շուտով պասքեթի դաշտի նորոգութեան աշխատանքը կը հասնի իր աւարտին եւ միութեան մարզիկները առիթ կ’ունենան իրենց բնականոն մարզումը կատարելու:
Պասքեթի դաշտին նորոգութենէն ետք, ընթացք պիտի առնէ ֆութպոլի դաշտին նորոգութիւնը:
Ընտանեկան պարտէզը արդէն կը գործէ իր ամառնային եւ ձմեռնային բաժիններով. անցնող ամիսներուն արդիական ձեւաւորումով նորոգուած են պարտէզի խոհանոցային բաժինն ու բաղնիքները:
Անցնող տարուան մէջ ՀՄԸՄ-ի ընտանեկան պարտէզի մուտքին, ճատրակի մարզիկներուն յատկացուեցաւ սրահ մը, որ իր կոկիկ դասաւորումով յարմար վայր մը կը հանդիսանայ ճատրակի մարզիկներուն համար:

ՔԵՍԱՊԻ ԷՔԻԶՈԼՈՒՔ ՇՐՋԱՆԻ ՀՄԸՄ-Ի ԲԱՆԱԿԱՎԱՅՐԻ ՆՈՐՈԳՈՒԹԻՒՆ

Պատերազմի տարիներուն Քեսապի Էքիզոլուք շրջանի ՀՄԸՄ-ի բանակավայրը նիւթական վնասներ կրեց: Ներկայ սերունդը 2011-էն 2017 ժամանակամիջոցին զրկուեցաւ իր սիրելի բանակավայրէն:
2018-ին, միութեան 100-ամեակին, բանակավայրը հիմնովին նորոգուեցաւ: Բարեկարգուեցան քարաշէն տնակները, խոհանոցը, մթերանոցը, դռներն ու բաղնիքները եւ Օգոստոս ամսուն, այնտեղ բնականոն կերպով տեղի ունեցան տարեկան բանակումները:

ԱԶԳԱՅԻՆ ՔԱՐԷՆ ԵՓՓԷ ՃԵՄԱՐԱՆ

Հալէպի Նոր Գիւղ թաղամասին մէջ գտնուող Քարէն Եփփէ Ազգային Ճեմարանը, որ բաղկացած է երկու շէնքերէ, 2012-էն, պատերազմի սկզբնական տարիներէն արդէն, ահաբեկիչներու գնդակներէն վնասուեցաւ ու շրջանի անապահով ըլլալուն պատճառով, ճեմարանի աշակերտութեան դասաւանդութիւնը նախ «Ս. Վրացեան» ապա Ազգ. Կիւլպէնկեան վարժարանի կառոյցէն ներս (Սուլէյմանիէ) շարունակուեցաւ քանի մը տարի:
31 Յուլիս 2017-ին կնքուեցաւ Ճեմարանի վերանորոգութեան պայմանագիրը՝ Բերիոյ Հայոց Թեմի Վերաշինութեան Մարմինին ջանքերով: Ճեմարանի մէկ մասնաշէնքի նորոգութեան աւարտէն ետք, 2017 ուսումնական տարեշրջանէն սկսեալ, ՔԵԱՃի աշակերտութիւնը բախտաւորութիւնը ունեցաւ վերադառնալու Ճեմարան: Դասաւանդութիւնները տեղի կ՝ունենան նորոգուած երկրորդ մասնաշէնքին մէջ, իսկ Ճեմարանի առաջին մասնաշէնքին, տարալուծարանին, համակարգիչի սրահին եւ կարգ մը այլ բաժիններուն նորոգութիւնը ընթացքի մէջ է տակաւին:

ԿԻԼԻԿԵԱՆ ՃԵՄԱՐԱՆ

Ուսումնական երեք բաժին ունեցող Կիլիկեան Ճեմարանը նախքան պատերազմը կը գործէր Հալէպի Թիլէլ թաղամասին մէջ, ունենալով երեք տարբեր կառոյց, սակայն 2012-ի պատերազմին, ահաբեկչական խմբաւորումներուն հրթիռակոծումներուն հետեւանքով երեք շէնքերն ալ կիսաքանդ դարձան: Դպրոցը շարունակեց գործել Նոր Սերունդ Մշակութային Միութեան կեդրոնէն ներս (Ազիզիէ) երկու ժամանակացոյցով (առաւօտուն՝ նախակրթարանի աշակերտութեան յատուկ, իսկ յետմիջօրէին՝ երկրորդականի): Մանկապարտէզի աշակերտութիւնը երկու տարի Ուրֆայի Հայրենակցական Միութեան կեդրոնին մէջ (Սուլէյմանիէ) շարունակեց իր դպրոցական կեանքը, որմէ ետք փոխադրուեցաւ Մշակութային ակումբի կեդրոն (Վիլլաներ), ուր կը յաճախէ մինչեւ օրս:
Երբ Հալէպ համեմատաբար խաղաղ դարձաւ, Օգոստոս 2017-ին ընթացք առաւ վարժարանի երկրորդական բաժինի կեդրոնին նորոգութեան աշխատանքը: Յունուար 2018-ին, Գերշ. Տէր Շահան Սրբազան Արք. Սարգիսեանի հովանաւորութեամբ, անոր պաշտօնական բացումը կատարուեցաւ ու Կիլիկեանի երկրորդական բաժինի աշակերտները սկսան յաճախել իրենց հարազատ վարժարանը: Մանկապարտէզի կառոյցին նորոգութիւնը սկսաւ Օգոստոս 2018-ին, աւարտին հասաւ Սեպտեմբերին, որմէ ետք նախակրթարանի դասաւանդութիւնը այնտեղ վերսկսաւ: Նորոգութիւնը յաջողեցաւ շնորհիւ երկրէն դուրս գտնուող դպրոցի շրջանաւարտներուն եւ բարերարներուն օժանդակութեան, ինչպէս նաեւ Սուրիոյ Առաջին Տիկնոջ՝ Ասմա ալ Ասատի ներդրումին:

Աղբիւր- «Գանձասար» Բացառիկ 2019

Share.

Leave A Reply

This site uses Akismet to reduce spam. Learn how your comment data is processed.