ՆԻԿՈԼ ՓԱՇԻՆԵԱՆԻ ԵՒ ԲԱԿՕ ՍԱՀԱԿԵԱՆԻ ՀԱՄԱՆԱԽԱԳԱՀՈՒԹԵԱՄԲ ՀԱՅԱՍՏԱՆԻ ԵՒ ԱՐՑԱԽԻ ԱՆՎՏԱՆԳՈՒԹԵԱՆ ԽՈՐՀՈՒՐԴՆԵՐՈՒ ՄԻԱՏԵՂ ՆԻՍՏ ՏԵՂԻ ՈՒՆԵՑԱԾ Է

0


«Ապառաժ».- 12 Մարտ 2019-ին Ստեփանակերտի մէջ Հայաստանի Հանրապետութեան Վարչապետ Նիկոլ Փաշինեանի եւ Արցախի Հանրապետութեան Նախագահ Բակօ Սահակեանի համանախագահութեամբ Հայաստանի եւ Արցախի Անվտանգութեան խորհուրդներու միատեղ նիստ տեղի ունեցած է: Օրակարգի հիմնական թեման Լեռնային Ղարաբաղի հիմնահարցի խաղաղ կարգաւորման գործընթացին մէջ ներկայ իրավիճակի համատեղ գնահատման եւ համակարգուած գործողութիւններու ուրուագծման  առնչուած է:

Քննարկումներու արդիւնքով Հայաստանի եւ Արցախի Անվտանգութեան խորհուրդներու անդամներուն կողմէն Արցախի անվտանգութեան համակարգը գնահատուած է եւ վերահաստատուած, որ պաշտպանութեան ապահովման կարողութիւնները երաշխաւորուած են եւ բարձր մակարդակի վրայ կը գտնուին: Միեւնոյն ժամանակ, հայկական երկու կողմերը վերստին շեշտած են իրենց աջակցութիւնն ու յանձնառութիւնը ԵԱՀԿ Մինսքի խումբի համանախագահութեան հովանիին ներքեւ հիմնահարցի բացառապէս խաղաղ կարգաւորումը հետապնդել` հիմնուած միջազգային իրաւունքի հիմնարար սկզբունքներուն, մասնաւորապէս, ժողովուրդներու ինքնորոշման իրաւունքին վրայ:

ՀՀ Վարչապետ Նիկոլ Փաշինեան մասնաւորապէս ըսած է. «Հայաստան կը շարունակէ հաւատարիմ մնալ բանակցային գործընթացին եւ որպէս Արցախի անվտանգութեան երաշխաւոր այդ ուղղութեամբ ջանքեր գործադրել պիտի շարունակէ, միեւնոյն ատեն, խաղաղ գործընթացի լիարժէք կիրարկման ու արդիւնաւէտութեան ապահովման համար Արցախի որոշիչ ձայնի ու ներգրաւուածութեան հարցը արդիական կը մնայ»:

Արցախի Հանրապետութեան Նախագահ Բակօ Սահակեան իր կարգին յայտնած է, որ 1994-1995-ին զինադադարի եռակողմ համաձայնագրերու անվերապահ իրականացումը խաղաղութեան նպաստող մթնոլորտի հիմք ընդունելով` խաղաղ գործընթացի առաջ մղման կարեւոր նպաստ բերած է: Բակօ Սահակեան ըսած է. «Արցախ պատրաստ է շարունակելու տարածաշրջանի մէջ իր կառուցողական ներդրումը տեւական ու ամուր խաղաղութեան հաստատման ուղղուած բանակցային գործընթացը»:

Նիստին շեշտուած է, թէ Լեռնային Ղարաբաղի հիմնահարցի, Արցախի անվտանգութեան ապահովումն ու կարգավիճակը հայկական կողմերուն համար եղած են եւ կը մնան բացարձակ գերակայութիւններ: Կարեւոր համարուած է խաղաղութեան մթնոլորտի ձեւաւորումը, վտանգներու նուազեցման եւ միջադէպերու կանխարգիլման մեքանիզմներու (մեքենաներու-«Գ.») եւ փոխվստահութեան ամրապնդման ձեռնարկներու ներդրումը, ամրագրուած ըլլալով ինչպէս Տուշանպէի, ապա  նաեւ Վիեննայի ու Սանկ Փեթերսպուրկի գագաթաժողովներուն:

Share.

Leave A Reply

This site uses Akismet to reduce spam. Learn how your comment data is processed.