ՑԵՂԱՍՊԱՆՈՒԹԵԱՆ ՃԱՆԱՉՄԱՆ ԵՒ ԱՆՈՐ ՈՒՐԱՑՄԱՆ ԴԷՄ ԴՆԵԼՈՒ ՔՈՆԿՐԵՍԱԿԱՆ ՆՈՐ ԲԱՆԱՁԵՒ ՄԸ ԿԸ ՊԱՏՐԱՍՏՈՒԻ

0

ՈՒԱՇԻՆԿԹԸՆ.- Ամերիկայի Հայ Դատի Յանձնախումբը կը հաղորդէ, որ քոնկրեսականներ Էտըմ Շիֆ եւ Կաս Պիլիրաքիս 11 Մարտին Հայոց Ցեղասպանութեան մասին նոր բանաձեւ մը ներկայացնելու եւ վաւերացնել տալու համար նախաձեռնած են նոր արշաւի մը:
Քոնկրեսականները իրենց պաշտօնակիցներուն կոչ ուղղած են միասնաբար աշխատելով՝ Հանրապետական եւ Դեմոկրատ կուսակցութիւններուն աջակցութիւնը վայելող այնպիսի բանաձեւ մը մէջտեղ բերելու, որ հետեւեալ երեք կարեւոր պայմանները կը բովանդակէ.
Հայոց Ցեղասպանութեան ուրացման կտրուկ մերժում.
Միացեալ Նահանգերու կողմէ Հայոց Ցեղասպանութեան ճանաչում եւ այդ ոճիրին զոհերուն պատշաճ ոգեկոչման ապահովում.
Հայոց Ցեղասպանութեան դասաւանդում, իբրեւ նման ոճիրներու կանխարգիլման կարեւոր միջոց։
Բանաձեւին համահեղինակները այժմ կը ջանան առաւելագոյն թիւով հովանաւորներ ապահովել, զայն Ներկայացուցիչներու տան պաշտօնապէս ներկայացնելու համար։
Ամերիկայի Հայ Դատի Յանձնախումբի ատենապետ Րաֆֆի Համբարեան ողջունած է քոնկրեսականներու սոյն նախաձեռնութիւնը՝ կարեւոր նկատելով այն իրողութիւնը, որ այս բանաձեւը Ցեղասպանութեան ճանաչումէն անդին երթալով՝ պիտի պահանջէ Ցեղասպանութեան զոհերու պաշտօնական ոգեկոչում, յատկապէս պաշտօնական մերժում հանդիսանալով Հայոց Ցեղասպանութիւնը ուրանալու փորձերուն։
Քոնկրեսականներ Շիֆիի եւ Պիլիրաքիսիի կողմէ իրենց պաշտօնակիցներուն յղուած նամակին բնագիրը կարելի է կարդալ՝ այցելելով asbarez.com կայքէջը։

Share.

Leave A Reply

This site uses Akismet to reduce spam. Learn how your comment data is processed.