ԱՍԱՏ. «ՍՈՒՐԻՈՅ ՄԷՋ ԱՀԱԲԵԿՉՈՒԹԵԱՆ ԴԷՄ ՊԱՏԵՐԱԶՄԸ ՄԻՋԱԶԳԱՅԻՆ ՏԱՐՈՂՈՒԹԵԱՄԲ ՄՂՈՒՈՂ ՊԱՏԵՐԱԶՄԻՆ ՄԷԿ ՄԱՍՆ Է»

0

Կիրակի, 10 Մարտ 2019-ին, Սուրիոյ նախագահ Պաշշար ալ Ասատ ընդունեց Չինաստանի արտաքին գործոց նախարարի օգնական Չին Շիաուտոնկ եւ անոր ընկերակցող պատուիրակութիւնը:
Հանդիպումին ընթացքին, կողմերը շեշտեցին երկու երկիրներուն պատմական յարաբերութեան պահպանման եւ քաղաքական, զինուորական, տնտեսական, մշակութային ու գիտական մակարդակներու վրայ գործակցութեան ամրապնդման կարեւորութիւնը:
Ասատ դիտել տուաւ, որ Սուրիոյ պատերազմը կը զգենայ նոր ձեւեր՝ պաշարում, տնտեսական ճնշում եւ այլն, աւելցնելով, որ միջազգային քաղաքականութեան միջոցներն ու գործիքները փոխուած են: Եթէ նախապէս իւրաքանչիւր հարց երկխօսութեան ճամբով կը լուծուէր՝ ներկայիս յարաբերութիւններ խզելով, դեսպաններ յետս կանչելով, երկիրներ տնտեսական պաշարման ենթարկելով եւ ահաբեկչութիւնը հրահրելով կը լուծուի:
Նախագահը ըսաւ. «Սուրիոյ մէջ ահաբեկչութեան դէմ պատերազմը, միջազգային տարողութեամբ մղուող պատերազմին մէկ մասն է: Կարելի չէ ահաբեկչութիւնը աշխարհագրական որոշ տարածաշրջանով սահմանափակել՝ հեռաւորութիւնները չեն արգիլեր ծայրայեղութեան ընդլայնումը,… ահաբեկչութեան դէմ պատերազմը ոչ միայն զինուորական պատերազմ է, այլ նաեւ՝ գաղափարախօսական»:
Իր կարգին, Շիաուտոնկ ըսաւ, որ Չինաստան Սուրիոյ հետ յարաբերութիւնը ռազմավարական կը համարէ: Ան նկատել տուաւ, որ Սուրիոյ ժողովուրդին եւ ղեկավարութեան պայքարին շնորհիւ, ներկայիս երկրին վիճակը սկսած է բարելաւուիլ: Ապա շեշտեց, որ Չինաստան նեցուկ պիտի կանգնի Սուրիոյ եւ պիտի աջակցի անոր վերականգնումին:
Հանդիպումին ներկայ գտնուեցան Սուրիոյ արտաքին գործոց փոխնախարար դոկտ. Ֆայսալ ալ Մըքտատ, Չինաստանի մէջ Սուրիոյ դեսպան դոկտ. Իմատ Մուսթաֆա, Սուրիոյ Արտաքին Գործոց Նախարարութեան Ասիոյ վարչակազմի տնօրէն դոկտ. Շաֆիք Տայուպն ու Դամասկոսի մէջ Չինաստանի դեսպանը:
Այս շրջագիծէն ներս, Սուրիոյ արտաքին գործոց նախարար Ուալիտ ալ Մուալլէմ եւս Շիաուտոնկն ու անոր ընկերակցող պատուիրակութիւնը ընդունեց՝ վերահաստատելով, որ Սուրիա կը հրաւիրէ Չինաստանը մաս կազմելու երկրի վերականգնումի աշխատանքներուն՝ չինական ընկերութիւններուն այլազան դիւրութիւններ մատուցելով:
Մուալլէմ բարձրօրէն գնահատեց Չինաստանի ցուցաբերած մարդասիրական օգնութիւններն ու քաղաքական աջակցութիւնը, որոնք նպաստեցին Սուրիոյ ժողովուրդի դիմադրողականութեան:
Իր կարգին, Շիաուտոնկ շեշտեց, որ Չինաստան Սուրիոյ հետ իր յարաբերութիւնները պիտի ամրագրէ ու պիտի շարունակէ մարդասիրական օժանդակութիւն տրամադրել Սուրիոյ ժողովուրդին:
Հանդիպումին ներկայ գտնուեցան փոխնախարար դոկտ. Ֆայսալ ալ Մըքտատ, Փեքինի մէջ Սուրիոյ դեսպանը, Արտաքին Գործոց Նախարարութեան Ասիոյ վարչակազմի տնօրէնը, Նախարարութեան յատուկ գրասենեակի վարչակազմի տնօրէն Մուհամմէտ ալ Օմրանին, ինչպէս նաեւ Դամասկոսի մէջ Չինաստանի դեսպանը:

Share.

Leave A Reply

This site uses Akismet to reduce spam. Learn how your comment data is processed.