ԶԱՐԻՖ. «ԱՀԱԲԵԿՉՈՒԹԵԱՆ ԴԷՄ ՍՈՒՐԻՈՅ ԺՈՂՈՎՈՒՐԴԻՆ ՊԱՅՔԱՐԸ ՈՂՋ ՏԱՐԱԾԱՇՐՋԱՆԻՆ ՀՊԱՐՏԱՆՔՆ Է»

0

Կիրակի, 10 Մարտ 2019-ին, Իրանի արտաքին գործոց նախարար Մուհամմէտ Ճաուատ Զարիֆ յայտնեց, որ Իրան նեցուկ կը կանգնի ահաբեկչութեան դէմ Սուրիոյ եւ Իրաքի պայքարին, դիտել տալով, որ զինեալ ահաբեկչական խմբաւորումներուն դէմ զոյգ երկիրներուն պայքարը հպարտանքն է ողջ տարածաշրջանին:
Զարիֆ Պաղտատ այցելութեան առիթով հարցազրոյցի մը ընթացքին ըսաւ. «Զօրավիգ կը կանգնինք Սուրիոյ, Իրաքի, Լիբանանի, Պահրէյնի, Եմէնի եւ Աֆղանիստանի ժողովուրդներուն եւ թոյլ չենք տար, որ արեւմուտքի պետութիւնները տարածաշրջանը իրենց վերահսկողութեան տակ առնեն»: Զարիֆ տարածաշրջանի ժողովուրդներուն կոչ ուղղեց նեցուկ կանգնելու Սուրիոյ, Իրաքի, Լիբանանի եւ Եմէնի, շեշտելով, որ տարածաշրջանի մը ապահովութիւնը անոր ժողովուրդին եւ պետութեան միատեղ ջանքերով կը պահպանուի:
Զարիֆ նկատել տուաւ, որ Իրան նպատակ չունէր տարածաշրջանի որեւէ երկրի հետ հարցեր հրահրելու, սակայն կարգ մը երկիրներ, զօրավիգ կանգնելով զինեալ ահաբեկչական խմբաւորումներուն, պատերազմական բովի մէջ մտցուցին տարածաշրջանը:
Անդրադառնալով ԱՄՆ-ի նախագահ Տանըլտ Թրամփի քաղաքականութեան, Զարիֆ դիտել տուաւ, որ ԱՄՆ-ի իշխանութիւններուն հետ երկխօսութիւնը անիմաստ է: «Երկխօսութեան հիմքը յարգանքն է: Երբ որեւէ կողմ իր խօսքը չի յարգեր, կարելի չէ անոր հետ բանակցիլ… Ուստի, Թրամփի հետ երկխօսութիւնը արդիւնաւէտ չեմ համարեր», աւելցուց Զարիֆ:
Անդրադառնալով պաղեստինեան դատը ոտնահարող ԱՄՆ-ի այսպէս կոչուած «Դարու Պայմանագրութեան», Զարիֆ շեշտեց, որ ան ձախողութեան դատապարտուած է, որովհետեւ Պաղեստինի ժողովուրդին իրաւունքները կ’անտեսէ: Ուստի ապարդիւն պայմանագրութիւն է, որովհետեւ Իրանի համար Պաղեստինի ժողովուրդին իրաւունքները էական կը համարուին:

Share.

Leave A Reply

This site uses Akismet to reduce spam. Learn how your comment data is processed.