ՍՈՒՐԻԱԿԱՆ ՄԱՄԼՈՅ ՏԵՍՈՒԹԻՒՆ՝ ՄԱՐՏ Բ./2019

0

Կոլանի շուրջ Սուրիոյ Արտաքին Գործոց Նախարարութեան հաղորդագրութիւնը, Իտլիպի իրավիճակը, տեղահանուածներուն տունդարձը եւ ռուս-թրքական ժողովը այս շաբթուան սուրիական մամուլին առանցքային նիւթերն էին:ՍԱՆԱ լրատու գործակալութիւնը կը յայտնէ, որ Երեքշաբթի, 13 Մարտ 2019-ին, Սուրիոյ Արտաքին Գործոց Նախարարութիւնը հանդէս եկած է հաղորդագրութեամբ մը, որուն մէջ շեշտած է. «Սուրիա խստիւ կը դատապարտէ Կոլանի մասին ԱՄՆ-ի Խորհրդարանի անդամ Լենտսի Կրահամի յայտարարութիւնները, որոնք կը բացայայտեն ԱՄՆ-ի վարչակազմին բռնատիրական նկրտումներն ու տարածաշրջանի հարցերը սիոնական մօտեցումով դիտելու ծայրայեղութիւնը»։Աղբիւրին համաձայն, Կրահամի յայտարարութիւնները ոչ միայն անոր պատմութեան եւ աշխարհագրութեան անտեղեակ ըլլալէն առաջ կու գան, այլեւ՝ միջազգային օրէնքներու խախտումէն։Յստակ է, որ ՄԱԿ-ի Անվտանգութեան Խորհուրդի բոլոր որոշումները, յատկապէս 1981-ի 497 թուակիր որոշումը, կը շեշտեն Կոլանի սուրիական բռնագրաւուած հող ըլլալը, եւ անոր Իսրայէլի միացման որոշումին անվաւերականութիւնը: Ուստի Իսրայէլ իրաւասութիւն չունի գոյացնելու այնպիսի որոշումներ, որոնք Կոլանի ժողովրդագրական բնոյթն ու ինքնութիւնը կ’աղաւաղեն։Աղբիւրը կ’աւելցնէր, որ Սուրիոյ ժողովուրդը, յատկապէս Կոլանի ժողովուրդը պիտի շարունակէ Իսրայէլի դէմ պայքարիլ մինչեւ Կոլանի ամբողջական ազատագրումը։Այլ առումով, սուրիական «Ալ Ուաթան» կայքէջը կը յայտնէ, որ Երեքշաբթի, 12 Մարտ 2019-ին, ՄԱԿ-ի սուրիական մարդասիրական հարցեր համակարգող Պանոս Մոմսէս, Պրուքսէլի մէջ Սուրիոյ շուրջ տեղի ունեցած միջազգային վեհաժողովին ըսած է. «Ուրախ ենք, որ Իտլիպի շուրջ Թուրքիոյ եւ Ռուսիոյ միջեւ տեղի ունեցած համաձայնութիւնը կը գործադրուի: Կ’ողջունենք քաղաքական այս նախաձեռնութիւնը, որովհետեւ անոր շնորհիւ աղէտ մը կանխարգիլուեցաւ: Յուսանք, որ խաղաղութիւնը գարնան վերահաստատուի, որովհետեւ  Իտլիպի բնակիչներուն կեանքը կրնայ վտանգի ենթարկուիլ ռազմական գործողութիւններուն սաստկացումի պարագային», յայտնելով, որ ՄԱԿ ուշադրութեամբ կը հետապնդէ Սուրիոյ հիւսիսարեւելեան շրջանը:Յիշենք, որ 17 Սեպտեմբեր 2018-ին, Սոչիի մէջ Ռուսիոյ եւ Թուրքիոյ նախագահներուն միջեւ բանակցութիւններուն աւարտին, զոյգ երկիրներուն պաշտպանութեան նախարարները Իտլիպի շուրջ փոխըմբռնումի յուշագիր մը ստորագրեցին եւ համաձայնեցան անոր շրջակայքը  զինեալ գործողութիւններէ զերծ գօտի մը յառաջացնել:Սուրիական «Տամ Փրէս» կայքէջէն կ’իմանանք, որ Երկուշաբթի, 11 Մարտ 2019-ին, շուրջ 722 սուրիացի տեղահանուածներ Լիբանանէն եւ Յորդանանէն Սուրիա վերադարձած են: Լիբանանէն 87 տեղահանուած «Ճտէյտէթ Եապուս»ի եւ «Թալքալախ»ի միջանցքներէն անցնելով Սուրիա հասած է, իսկ Յորդանանէն 635 տեղահանուած «Նասիպ» միջանցքէն վերադարձած է:Աղբիւրը կ’աւելցնէր, որ ռուսական կողմը 2,16 թոն 500 սննդակողով ուղղարկած է անոնց, իսկ բարեգործական «Քարիրով» հաստատութիւնը 1 թոն հաց բաշխած է անոնց:Սուրիոյ տագնապի լուծման անդրադառնալով, սուրիական «Սիրիա Նաու» կայքը կը հաղորդէ, որ Կիրակի, 10 Մարտ 2019-ին, Հալէպի հիւսիսային արուարձանի Ազէզ քաղաքին շրջակայքը գտնուող թրքական զինուորական կեդրոնէն ներս, ռուս եւ թուրք սպաներու միջեւ ժողով մը գումարուած է: Կողմերը խորհրդակցած են Թալ Ռըֆաաթ քաղաքին իրավիճակին եւ Հալէպ-Այնթէպ միջազգային մայրուղիի վերաբացումին շուրջ:

Share.

Leave A Reply

This site uses Akismet to reduce spam. Learn how your comment data is processed.