ՍՐԲՈՑ ՎԱՐԴԱՆԱՆՔԻ ՏՕՆԱԿԱՏԱՐՈՒԹԻՒՆ

0

«Եթէ Տէրը յաղթութիւնը մեր ձեռքը տայ, պիտի ոչնչացնենք անոնց զօրութիւնը, որպէսզի բարձրանայ ճշմարտութեան կողմը, իսկ եթէ այս պատերազմին մէջ հասած է ժամանակը մեր սուրբ մահուան, ընդունինք զայն ուրախ սրտով, միայն թէ մեր արիութեան վախկոտութիւն չխառնենք»

Վարդան Մամիկոնեանի
Ճառէն

Կրօնական եւ Ազգային դիմագիծ ունեցող Վարդանանց պատերազմը գոյատեւումի եւ պայքարի օրինակն է, որ 1600 տարի անց տակաւին ազատութեան ձգտումով կը գօտեպնդէ մեզ:
Աւարայրի դիւցազուններուն եւ սրբոց Վարդանանց զօրավարաց յիշատակին տօնակատարութիւնը տեղի ունեցաւ Կիրակի, 3 Մարտ 2019-ի երեկոյեան ժամը 5:00-ին, հայ աւետարանական Բեթէլ եկեղեցւոյ մէջ, հովանաւորութեամբ հայ 3 համայնքապետներուն, ներկայութեամբ եկեղեցական դպրաց դասուն եւ հաւատացեալ ժողովուրդին:
Հանդիսութիւնը սկսաւ պատուելի Սիմոն Տէր Սահակեանի բարի գալուստի խօսքով եւ Վարդանանց պատերազմի ամփոփ ներածականի ներկայացումով: Ապա գեղարուեստական յայտագիրով հանդէս եկան.- Կարինէ Ֆերմանեան (ասմունք), Քրիստ Դաւիթեան (մեներգ), Շողեր Գերպապեան (ֆլիւթ), դաշնամուրի ընկերակցութեամբ Թամար Սողոյեանի:
Տօնակատարութեան ընթացքին խօսք առաւ Հայ Կաթողիկէ Համայնքի ներկայացուցիչ Տէր Կոմիտաս Քհնյ. Տատաղլեան, որ Վարդանանցի պատգամին անդրադառնալով ըսաւ. «Վարդանանց հերոսները Թարգմանչաց գիւտին ժառանգորդներն էին, որոնք մտքի յեղափոխութենէն ետք դիմեցին սուրի յեղափոխութեան եւ նահատակուեցան գաղափարի յեղափոխութեան համար: Վարդանանց նահատակները մեզի պատգամեցին վասն կրօնի եւ հայրենեաց պայքարիլ: Թշնամին դարերու ընթացքին փորձեց շրջել իրողութիւնները, սակայն հայը իր հոգիին մէջ ամրօրէն պահեց այդ պատգամը ու իր էութեան մէկ անբաժանելի մասնիկը դարձուց զայն՝ իրարայաջորդ սերունդներուն կտակելով անոր խորհուրդը: Դարերու ընթացքին մռայլեցաւ հայոց երկինքը, մռայլեցաւ նաեւ Սուրիական Հայրենիքին երկինքը, սակայն հայը կառչած մնաց իր հաւատքին ու կտակին, վերականգնեցաւ՝ իր զօրութիւնը ցոյց տալով համայն աշխարհին»:
Այնուհետեւ օրուան պատգամը տուաւ նաեւ Բերիոյ Հայոց Թեմի Բարեջան Առաջնորդ Գերշ. Տէր Շահան Սրբ. Արք. Սարգիսեան, որ ըսաւ. «Աւանդութիւն դարձած այս տօնակատարութիւնը ամէն տարի մեզ կը համախմբէ աղօթքի եւ ուխտի նորոգութեան համար: 1600 տարի առաջ տեղի ունեցած այս զինուորաքաղաքական իրադարձութիւնը մեր եկեղեցւոյ կողմէ կը ներկայացուի ոչ թէ որպէս պատերազմ, քանդում եւ մահ սփռող իրականութիւն, այլ ժողովուրդ մը հաւատքով առաջնորդող ճշմարտութիւն»:
Սրբազանը անդրադարձաւ Վարդանանց պատերազմի պատմութեան մէջ հակադրուող երկու իրականութեանց՝ հաւատքի եւ բանականութեան, որոնց լաւագոյն մարմնաւորումը կը հանդիսանան Վասակի եւ Վարդանի տիպարները: Վարդան կը ներկայացնէր հաւատքի մարտիկը, որ գիտակցաբար անմահութեան կ’երթար, իսկ Վասակ բանականութեան մարտիկը, որ պարսիկներուն հետ կ’ուզէր համաձայնութիւն կնքել՝ ազատագրելու հայրենիքը: Սրբազան հայրը այս երկու գաղափարները կապեց Արցախի հետ եւ ըսաւ. «Եթէ մենք միայն մտքի, աշխարհաքաղաքական տուեալներով առաջնորդուէինք, Արցախը այսօր Ատրպէյճանի տարածքին մէջ մնացած պիտի ըլլար: Արցախի մէջ մղուած Աւարայրեան ճակատամարտը հաւատքի ճակատամարտն էր»:
Հանդիսութեան եզրափակիչ պատգամը տուաւ Սուրիոյ Հայ Աւետարանական Համայնքի պետ Վերապատուելի Յարութիւն Սելիմեան:
«Վարդանանց պատերազմը մեզի համար ժամանակակից է, որովհետեւ պատմութիւնը կը ներխուժէ մեր ներկային մէջ նաեւ՝ իր հետ բերելով նոր մարտահրաւէրներ: Վարդանանց դիւցազունները հայրենիքի ազատութեան, քրիստոնէական հաւատքին կառչելու համար կռուեցան: Հայու ինքնութեան պահպանման պատերազմն էր որ մղեցին: Այդ պատերազմը կը շարունակուի մինչեւ մեր օրերը»:
Իր խօսքի աւարտին վերապատուելին կոչ ուղղեց Սփիւռք-Հայրենիք միասնութեան, այդ միասնութեան մէջ տեսնելով մեր գոյութեան հիմքն ու երաշխիքը:
Տօնակատարութիւնը վերջ գտաւ «Հայր Մեր» աղօթքով եւ հայ երեք համայնքապետներուն առաքելական օրհնութեամբ:

Share.

Leave A Reply

This site uses Akismet to reduce spam. Learn how your comment data is processed.