ՎԵՐԱԿԱՆԳՆՈՒՄԻ ԱՇԽԱՏԱՆՔՆԵՐՈՒ ՀԱՄԱՅՆԱՊԱՏԿԵՐ (ՄԱՍ Բ.)

0

ՀԱՅ ԿԱԹՈՂԻԿԷ ՀԱՄԱՅՆՔԻ
ՎԵՐԱՆՈՐՈԳՈՒԱԾ ԿԱՌՈՅՑՆԵՐ

ՄԱՅՐ ԳԹՈՒԹԵԱՆ ԱԹՈՌԱՆԻՍՏ ԵԿԵՂԵՑԻ (ՍԱՆԹ ՌԻԹԱ)
Կառուցուած է 1840-ին՝ երկու գմբէթով: Սուրիական պատերազմին բուռն բախումներու գօտիին վրայ գտնուելուն պատճառով եկեղեցին մեծ վնասներ կրեց: Նոյեմբեր 2018-ին սկսաւ անոր վերանորոգութեան աշխատանքը: Ներկայիս գմբէթն ու առաստաղը նորոգութեան ընթացքի մէջ են, պահելով նախկին ճարտարապետական ոճն ու ինքնուրոյն տեսքը:
Ս. ԳՐԻԳՈՐ ԼՈՒՍԱՒՈՐԻՉ ԴՊՐՈՑ (ԱԼ ԻՄԱՆ)
Կը բաղկանայ հինգ բակերէ արաբական ոճով: Պատերազմի շրջանին աշակերտները Ս. Խաչ եկեղեցւոյ ներքնասրահ փոխադրուեցան ու դասաւանդութիւնը այնտեղ տեղի ունեցաւ: Դպրոցը հիմնովին վերանորոգուեցաւ եւ արդէն երկրորդ տարեշրջանն է, որ աշակերտները կը յաճախեն իրենց սիրելի դպրոցը: Ներկայիս կը նորոգուի խաղավայրը:

ԹԻԼԷԼ ԹԱՂԱՄԱՍԻ ՀԱՅ ԿԱԹՈՂԻԿԷ ՀԱՄԱՅՆՔԻ ԱՌԱՋՆՈՐԴԱՐԱՆ
Հիմնուած է 1954-ին, եկեղեցւոյ հետ համեմատած նիւթական աւելի թեթեւ վնասներ կրեց ան: Պատերազմի տարիներուն, Առաջնորդարանը միայն ցերեկուան ժամերուն կը գործէր: Անապահով վիճակին պատճառով Առաջնորդարանի արխիւները փոխադրուեցան Վիլլաներ թաղամասի համայնքի նոր կեդրոն, ուր Առաջնորդարանի ծառայութիւնները մինչեւ օրս կը մատուցուին: Երեք ամիս առաջ ամբողջացան Թիլէլի Առաջնորդարանի տանիքի եւ պատշգամի նորոգութեան աշխատանքները: Թիլէլ թաղամասը իր բնականոն վիճակը գտաւ, ուստի ներկայիս արխիւները Առաջնորդարան վերադարձնելու աշխատանք կը տարուի:

ԱԶԻԶԻԷ ԹԱՂԱՄԱՍԻ Ս. ԽԱՉ ԵԿԵՂԵՑԻ
Եկեղեցին հրթիռակոծուելով լուրջ վնասներ կրեց: Ապակիները կոտրած էին, վերաշինուեցան: Եկեղեցւոյ «Արարատեան» սրահը, որ պատերազմի տարիներուն որպէս դպրոց օգտագործուեցաւ, վերանորոգուեցաւ. անոր պաշտօնական բացումն ալ կատարուեցաւ: Նորոգուեցաւ նաեւ եկեղեցւոյ դահլիճը:

ՆՈՐ ԳԻՒՂ ՇՐՋԱՆԻ ԶՈՒԱՐԹՆՈՑ ՎԱՐԺԱՐԱՆ
Վարժարանը քանիցս հրթիռակոծուելով նիւթական լուրջ վնասներ կրեց: Առաջնահերթ համարուեցաւ դպրոցի նորոգութիւնը, ապա շուտով եկեղեցւոյ, ակումբի ու սրահի: Երկու տարի առաջ դպրոցը հիմնովին նորոգուեցաւ, կրթական կեանքը բնականոն ձեւով շարունակուեցաւ:

ՆՈՐ ԳԻՒՂ ՇՐՋԱՆԻ Ս. ԵՐՐՈՐԴՈՒԹԻՒՆ ԵԿԵՂԵՑԻ

Նոր Գիւղ շրջանի Զուարթնոց վարժարանի նորոգութենէն ետք, շուտով նորոգուեցաւ Ս. Երրորդութիւն եկեղեցին, բարեկարգուեցան պատուհանները, դռներն ու նստարանները: Ս. Երրորդութիւն եկեղեցին Նոր Գիւղ շրջանին մէջ ժողովրդապետութիւն մը կը կազմէ՝ իր դպրոցով, եկեղեցիով, ակումբով եւ սրահով: Նորոգուեցաւ եկեղեցւոյ «Աղաճանեան» սրահը եւ պաշտօնական հանդիսութեամբ անոր վերաբացումը կատարուեցաւ: Ս. Երրորդութիւն եկեղեցւոյ կից Հայ Կաթողիկէ Միութեան (ՀԿՄ) երիտասարդներուն համար նոր յարկ մը կառուցուեցաւ, որպէս կեդրոն սկաուտութեան, շեփորախումբի եւ կիրակնօրեայի:

ՍՈՒԼԷՅՄԱՆԻԷ ՇՐՋԱՆԻ Ս. ՓՐԿԻՉ ԵԿԵՂԵՑԻ

Սուլէյմանիէ շրջանի Ս. Փրկիչ եկեղեցին (Ս. Պարպարա) համեմատաբար աւելի քիչ վնասներ կրեց: Նորոգութեան ընթացքի մէջ է եկեղեցւոյ սրահը, ուր կը գործեն եղբայրութիւնները, ակումբն ու կիրակնօրեան:

ՀԱՅ ԿԱԹՈՂԻԿԷ ԳԵՐԵԶՄԱՆԱՏՈՒՆ
Հալէպի մէջ Հայ Կաթողիկէ գերեզմանատունը պատերազմի օրերուն եւս նիւթական վնասներ կրեց: 2017-ին անհրաժեշտ նորոգութիւնները կատարուեցան, մատուռն ու գերեզմանատունը վերաբացուեցան:

Աղբիւր- «Գանձասար» բացառիկ 2019

Share.

Leave A Reply

This site uses Akismet to reduce spam. Learn how your comment data is processed.