ՍՈՒՐԻԱ ԽՍՏԻՒ ԴԱՏԱՊԱՐՏԵՑ ՆՈՐ ԶԵԼԱՆՏԱՅԻ ԵՐԿՈՒ ՄԶԿԻԹՆԵՐԸ ԹԻՐԱԽ ԴԱՐՁՆՈՂ ԱՀԱԲԵԿՉԱԿԱՆ ՅԱՐՁԱԿՈՒՄԸ

0

Երէկ՝ 15 Մարտին, Սուրիոյ Արտաքին Գործոց Նախարարութիւնը Հաղորդագրութիւն մը հրապարակելով խստիւ դատապարտեց Նոր Զելանտայի երկու մզկիթները թիրախ դարձուցած ահաբեկչական յարձակումը, որ խլեց մեծաթիւ անմեղ քաղաքացիներու կեանքը՝ շեշտելով, որ այս ոճրագործութիւնը անգամ մը եւս կը հաստատէ ահաբեկչութեան դէմ պայքարին ի խնդիր զանազան կողմերու ջանքերուն մէկտեղումը:
Նախարարութիւնը դիտել տուաւ, որ ահաբեկչութեան դէմ պայքարը անհրաժեշտ է յատկապէս վերջ տալու հաւատադրժողական ատելավառ գաղափարներ տարածողներու բռնարարքներուն, յատկապէս անոնց, որոնք կը փորձեն իսլամական կրօնքը աղաւաղել:
Աւելցնենք, որ 15 Մարտին Նոր Զելանտայի Քրայսթչըրչ քաղաքին մէջ երկու մզկիթներու դէմ կատարուած զինեալ ահաբեկչական յարձակումի մը հետեւանքով 49 մարդ զոհուեցաւ, տասնեակներ վիրաւորուեցան: Առաջին մզկիթը կը գտնուէր Քրայսթչըրչի կեդրոնական թաղամասին մէջ, իսկ երկրորդըքաղաքի արուարձաններէն Լինվուտի մէջ: Նոր Զելանտայի վարչապետ Ճասինտա Արտըն յարձակումը «ահաբեկչական» անուանեց դիտել տալով, որ սա Նոր Զելանտայի մէջ ամէնէն սեւ օրերէն մէկն է… յստակ է, թէ այն, ինչ որ պատահեցաւ, արտասովոր բռնարարք մըն է եւ իր տեսակին մէջ առաջինը:
Նորզելանտական ոստիկանութիւնը յայտնեց, որ դէպքին մեղսակից 4 անձ ձերբակալած է եւ ականուած մեքենաներ յայտնաբերած է:
Ձերբակալեալներուն շարքին է յարձակումին հեղինակը` ծնունդով աւստրալական Կրաֆթըն քաղաքէն 28-ամեայ Պրենթըն Թարանթ: Կը հաղորդուի, որ ան համացանցի վրայ տեղադրած է քանի մը էջերէ բաղկացած «մանիֆեսթ» մը, որուն մէջ կը սպառնայ իսլամական աշխարհին եւ Թուրքիոյ: Ան մասնաւորաբար նշած է, որ յարձակումը վրէժ է Եւրոպայի մէջ հազարաւոր մահերու համար: Ան նաեւ իր վրայ ամրագրուած տեսախցիկով նկարած է իր գործած յարձակումը:
Աւստրալիոյ վարչապետ Սքոթ Մորիսըն յայտնեց, որ յարձակումին հեղինակը Աւստրալիոյ քաղաքացի է, ու զայն համարեց ծայրայեղ աջակողմեան բիրտ ահաբեկիչ մը:

Share.

Leave A Reply

This site uses Akismet to reduce spam. Learn how your comment data is processed.