ՄԱՐԶԱԿԱՆ՝ ՄԱՐՏ Բ./2019

0

ՀԱՅԿԱԿԱՆ


ՀՄԸՄ-ԱՆԹԻԼԻԱՍԻ ԱՂՋԿԱՆՑ ՊԱՍՔԵԹԻ ԽՈՒՄԲԸ՝ ԼԻԲԱՆԱՆԻ ԲԱԺԱԿԱԿԻՐ
Շաբաթ երեկոյեան Լիբանանի Ղազիր մարզահամալիրին մէջ տեղի ունեցաւ Լիբանանի պասքեթի աղջկանց բաժակի աւարտական մրցումը: ՀՄԸՄ-Անթիլիասի աղջիկները 67-50 արդիւնքով յաջողեցան պարտութեան մատնել մրցակից Ռիատը: Սոյն հանդիպումին ընթացքին ՀՄԸՄ-ի մարզիկները յաջողեցան տիրապետել խաղարկութեան եւ դաշտի տարբեր անկիւններէն ցնցել մրցակիցին կողովը: Աւարտին Լիբանանի պասքեթի կոմիտէի նախագահ՝ Աքրամ ալ Հալապի, ախոյեանութեան բաժակը յանձնեց ՀՄԸՄ-Անթիլիասի խմբապետուհի Մեղրիկ Թորոսեանին: Վերջին տարիներուն Լիբանանի աղջկանց ախոյեանութեան շրջագիծին մէջ, ՀՄԸՄ-Անթիլիասի աղջիկները նուաճեցին զանազան տիտղոսներ՝ շնորհիւ վարչակազմի տքնաջան աշխատանքին, յատկապէս խումբի պատասխանատու քոյր Թալին Խաչատուրեանի ջանքերուն:

ՎԱԶԳԷՆ ԹԵՒԱՆԵԱՆ՝ ԵՒՐՈՊԱՅԻ ՄԻՆՉԵՒ 23 ՏԱՐԵԿԱՆԻ ՈՍԿԻ ՄԵՏԱԼԱԿԻՐ
Սերպիոյ Նովի Սատ քաղաքին մէջ ընթացող ըմբշամարտի ազատ ոճի Եւրոպայի մինչեւ 23 տարեկաններու առաջնութեան 63 քկ. ծանրութեան մրցումներուն Հայաստան ներկայացնող Վազգէն Թեւանեան հասաւ եզրափակիչ մրցումին: Վճռորոշ գօտեմարտին, Թեւանեան մրցակից ունեցաւ վրացի Եթեմի Փոլկվաձէն: Հայ ըմբիշը 2-1 արդիւնքով յաջողեցաւ յաղթել եւ դառնալ Եւրոպայի ախոյեան: 2018-ի Եւրոպայի երիտասարդական ախոյեան՝ Վազգէն Թեւանեան, նախօրէին պայքարը սկսած էր 1/8 եզրափակիչին, ուր 8- 6 արդիւնքով պարտութեան մատնած էր Ֆրանսան ներկայացնող Իլման Մուխտարովը: Եզրափակիչ մրցումի առաջին քառորդին, հայ ըմբիշը 17-4 արդիւնքով ուժեղ յաղթանակ մը տանելով դուրս դրաւ թուրք Սելիմ Կոզմանը, իսկ կիսաեզրափակիչին պարտութեան մատնեց նաեւ մոլտովացի Մաքսիմ Սակուլտանը:

ՄԻՋԱԶԳԱՅԻՆ

ՎԻԼՆԻՈՒՍ ԾԱՆՐՕՐԷՆ ՎՆԱՍՈՒԵՑԱՒ
Ըստ Սպանիոյ մայրաքաղաքի արքայական ակումբի Ռէալ Մատրիտի մամլոյ բանբերին, պատանի յարձակողական խաղացող՝ պրազիլցի Վիլնիուս, ծանրօրէն վնասուելեվ իր կազմէն պիտի բացակայի 2 ամիսով: Բանբերը յիշեց, որ բժիշկները այս առումով յայտարարութիւն մը կատարած են: Վիլնիուս վիրաւորուած է քանի մը օր առաջ, Այաքս Ամսթըրտամի դէմ տեղի ունեցած մրցումին «Չեմփիընզ լիկ»: 18 տարեկան ֆութպոլիստը անցեալ ամառ պրազիլեան Ֆլամենկոյէն հեռանալով միացաւ Ռէալ Մատրիտին՝ փոխան 61 միլիոն եւրոյի: Ան 28 մրցումի ընթացքին 4 կոլ արձանագրեց:

Պատրաստեց
Ռաֆֆի Սիւլահեան

Share.

Leave A Reply

This site uses Akismet to reduce spam. Learn how your comment data is processed.