«ՏԸՐՊԻ ՄԻԼԱՆՕ»

0

Կիրակի, 17 Մարտ 2019-ին տեղի պիտի ունենայ Էյ Սի Միլան եւ Ինթըր Միլանի միջեւ «Տըրպի» կոչուող ֆութպոլի մրցումը։ «Տըրպի»ն այլ անուններ ալ կը կրէ, ինչպէս՝ «Տըրպի Միլանօ» եւ «Տըրպի Տիլա Մատոնինա», վերջինս ի պատիւ Միլանոյի Ս. Մարիամ Աստուածածնայ արձանին, որ զետեղուած է վանքի բարձունքին։
Իտալիոյ յատուկ այս խաղը ժամանակին կը խորհրդանշէր Միլանոյի բանուորական դասակարգին (ներկայացուած՝ Էյ Սի Միլան խումբով) եւ միջին ու հարուստ դասակարգերուն (ներկայացուած՝ Ինթըր Միլան խումբով) միջեւ տեղի ունեցող ֆութպոլի մրցումը: Կը պատմուի, թէ տարիներ առաջ Ինթըր Միլանի համակիրները Սան Սիրօ դաշտ կ’ուղղուէին հեծիկներով, մինչդեռ Էյ Սի Միլանի համակիրները՝ հանրային փոխադրակառքեր կ’օգտագործէին: Այս եւ այլ երեւոյթներ պատճառ կը դառնային, որ 2 խումբերու համակիրներուն միջեւ գոյութիւն ունեցող դասակարգային տարբերութիւնը շեշտադրուէր։ Այս դասակարգային տարբերութիւնները վերացած են անցեալ դարու վաթսունական թուականներուն, շնորհիւ Իտալիոյ ընկերային ու տնտեսական իրավիճակի վերադասաւորումին։
Խումբերուն միջեւ հակամարտութիւնը սկիզբ առած է 1908-ին, երբ կարգ մը իտալական ակումբներ մերժած են օտար խաղացողներու մասնակցութիւնը ախոյեանութեան խաղերուն, իսկ իտալական դաշնութիւնը վաւերացուցած է օտար խաղացողներու մասնակցութիւնը: Այս մէկը պատճառ հանդիսացած է, որ ամենազօրաւոր իտալական ակումբները (Էյ Սի Միլանը, Թորինօն եւ Ժենաւան) ընդհատեն իրենց մասնակցութիւնը իտալական լիկային, սակայն Էյ Սի Միլանի վարչութենէն քանի մը հոգի, համաձայն գտնուելով դաշնութեան որոշումին, դուրս եկած են Էյ Սի Միլանէն եւ հիմնած Ինթըր Միլանը։
9 Մարտ 1908-ին, Միլանի արուեստագէտներու եւ մտաւորականներու կեդրոն ճաշարաններէն մէկուն մէջ, հիմնուած է Ինթըր Միլանը, որուն հետեւանքով Էյ Սի Միլանի 4 խաղացողներ իրենց խումբը լքած ու մաս կազմած են անոր՝ ցաւ յայտնելով Էյ Սի Միլանի ցեղապաշտական մօտեցումին համար։
Խումբերուն միջեւ լարուածութիւնը կը շարունակուի մինչեւ օրս: Անոնց միջեւ այս վերջին խաղը յաւելեալ կարեւորութիւն կը զգենայ, մանաւանդ որ Միլան 51 կէտով իտալական լիկային մէջ 3-րդ դիրքը կը գրաւէ, իսկ Ինթըր Միլան 50 կէտով՝ 4-րդը։
Սիրելի՛ ընթերցող,
Ի՞նչ կ’ակնկալէք այս խաղէն: Կը խնդրենք որ «Գանձասար»ի դիմատետրի էջի մարզական այս լուրին տակ գրառում կատարելով ձեր կարծիքը յայտնէք մեզի:

Պատրաստեց
Պետիկ Աշոտեան

Share.

Leave A Reply

This site uses Akismet to reduce spam. Learn how your comment data is processed.