ՎԵՐԱԿԱՆԳՆՈՒՄԻ ԱՇԽԱՏԱՆՔՆԵՐՈՒ ՀԱՄԱՅՆԱՊԱՏԿԵՐ (ՄԱՍ Գ.)

0

ՍՈՒՐԻՈՅ ՀԱՅ ԱՒԵՏԱՐԱՆԱԿԱՆ ՀԱՄԱՅՆՔ

Սուրիոյ ճգնաժամէն անմասն չմնացին նաեւ Սուրիոյ Հայ Աւետարանական Համայնքի կառոյցները, յատկապէս Հալէպի եւ Քեսապի շրջաններուն մէջ:
Ստորեւ կը ներկայացնենք համայնքի այն կառոյցները, զորս հրթիռակոծումի ենթարկուեցան:

Ա-ՀԱՅ ԱՒԵՏԱՐԱՆԱԿԱՆ ԲԵԹԷԼ ԵՐԿՐՈՐԴԱԿԱՆ ՎԱՐԺԱՐԱՆ
Դպրոցին շէնքը հրթիռակոծուեցաւ 14 Մայիս 2013-ին, բարեբախտաբար միայն նիւթական վնասներ կրեց ան: Ապա շինարարութեան աշխատանքը սկսաւ՝ յանուն հայ աշակերտին ուսման բարօր ընթացքի ապահովման: Կառոյցը երկրորդ անգամ հրթիռակոծումի ենթարկուեցաւ 12 Սեպտեմբեր 2013-ին: Վնասուեցան դպրոցին երդիքը, համակարգիչի սենեակն ու տարրալուծարանը: Վարժարանիս պատասխանատու անդամները Համայնքապետին գլխաւորութեամբ դարձեալ ձեռնամուխ եղան շինարարութեան աշխատանքներուն:

Բ-ՔԵՍԱՊԻ ՀԱՅ ԱՒԵՏԱՐԱՆԱԿԱՆ ԵԿԵՂԵՑԻՆԵՐ
23 Մարտ 2014-ին Ս.Երրորդութիւն եկեղեցին ռմբակոծուեցաւ եւ սրբապղծուեցաւ ահաբեկչական խմբաւորումներուն կողմէ: Ապա վերանորոգուեցաւ ու բացումը տեղի ունեցաւ Յուլիս 2017-ին:
21 Մարտ 2014-ին տեղի ունեցաւ քեսապցիներու տեղահանութեան սեւ ու ցաւալի պատուհասը: Քեսապահայութիւնը տեղահան դարձաւ, սակայն երբեք իր յոյսն ու հաւատքը չկորսնցուց:
Սպասումը երկար չտեւեց: 14 Յունիս 2014-ին, (87 օր ետք) Քեսապի ազատագրման աւետիսը սրտերը խայտանքով, հոգիները հրճուանքով լեցուց: Քեսապահայութիւնը տուն վերադարձաւ: Սակայն քեսապցին Քեսապի մուտքին գտնուող հսկայ, ճերմակ եւ գեղեցիկ եկեղեցին պղծուած եւ հրկիզուած գտաւ: Ահաբեկիչներու ներխուժումով աւերակի վերածուած էր Քեսապի Հայ Աւետ. Ս. Երրորդութիւն եկեղեցին:
Ծանրօրէն վնասուած էին Էքիզօլուքի, Քէօրքիւնէի եւ Գալատուրանի եկեղեցիները: Հետեւաբար, պաշտամունքներ ու աղօթքի պահեր ունենալու համար անհրաժեշտ նկատուեցաւ այս եկեղեցիները նորոգել:
Քեսապցիներ տեղահանութենէն ետք իրենց առաջին պաշտամունքը կատարեցին Դեկտեմբեր 2014-ին, Նահատակաց Միացեալ վարժարանի շրջափակէն ներս գտնուող եկեղեցապատկան սրահին մէջ:
Ապա, 18 Օգոստոս 2015-ին, երբ սկիզբ առաւ Էքիզօլուքի Հայ Աւետարանական Էմմանուէլ եկեղեցւոյ նորոգութիւնը (որ աւելի քիչ վնասուած էր, համեմատաբար միւս եկեղեցիներուն), պաշտամունքները այնտեղ շարունակուեցան՝ միացեալ դրութեամբ։ Ետքը նորոգուեցաւ Գալատուրանի եկեղեցին: Ապա Քէօրքիւնէի Հայ Աւետարանական եկեղեցւոյ նորոգութիւնը սկսաւ Մարտ 2015-ին եւ աւարտեցաւ 25 Յունիս 2015-ին:
Այս ընթացքին, համայնքապետ Վերապատուելի Յարութիւն Սելիմեան քանիցս այցելեց Քեսապ, եւ այդ այցելութիւններուն ընթացքին, ժողովականներուն եւ ժողովուրդին հետ միասնաբար որոշեց վերանորոգել նաեւ Քեսապի Հայ Աւետ. Ս.Երրորդութիւն եկեղեցին:
2015 Մայիսին համայնքապետին հրաւէրով գործը պաշտօնապէս յանձնուեցաւ ճարտարապետ պրն. Յակոբ Պետրճիքեանին: Ապա կազմուեցաւ շինարարական յանձնախումբ մը:
Ժողովներու ընթացքին, Համայնքապետ Վերապատուելի Յարութիւն Սելիմեան, հովիւ Պատ. Ժիրայր Ղազարեան եւ շինարարական յանձնախումբը միասնաբար քննարկեցին նախագիծերը, որոնք պատրաստուած էին ճարտարապետին կողմէ:
Աշխատանքը բաժնուեցաւ երեք փուլերու: 17 Յուլիս 2015-ին շինարարական առաջին քայլը առնուեցաւ:
Փառք կու տանք Աստուծոյ կատարուած այս աշխատանքին համար, եւ մեր շնորհակալութիւնը Հօր Աստուծմէ ետք կ’երթայ Մերձաւոր Արեւելքի Հայ Աւետարանական Եկեղեցիներու Միութեան, Կեդրոնական Մարմինին ու բոլոր նուիրատուներուն եւ աշխատողներուն:
Համայնքապետ Վեր. Յարութիւն Սելիմեանի, Քեսապի հովիւ Պատ. Ժիրայր Ղազարեանի, ճարտարապետին եւ յանձնախումբի անդամներուն միջոցաւ կարելի եղաւ եկեղեցին իր այս գեղեցիկ ձեւին եւ վիճակին հասցնել:
Այս առիթով եկեղեցին իր շնորհակալական խօսքը կ’ուղղէ նաեւ Սուրիական Հայրենիքի նախագահին եւ պատկան մարմիններուն, որոնց արտօնութեամբ բարեզարդուեցաւ եկեղեցին:

Գ- ՀԱԼԷՊԻ ՀԱՅ ԱՒԵՏԱՐԱՆԱԿԱՆ ԷՄՄԱՆՈՒԷԼ ԵԿԵՂԵՑԻ
Պատմական մեծ արժէք ներկայացնող այս եկեղեցաշէնքը 17 Յունուար 2016-ին, հրթիռակոծման հետեւանքով նիւթական մեծ վնասներու ենթարկուեցաւ եւ փուլ եկաւ անոր կղմինտրածածկ առաստաղը: Եկեղեցւոյ բարեպաշտ ժողովուրդը, ստիպուած, երկու տարի իր կիրակնօրեայ պաշտամունքը կատարեց եկեղեցւոյ ներքնասրահին մէջ: Հալէպն ու շրջակայքը իրենց ապահովութիւնը արդէն վերագտած են, իսկ ժողովուրդը կը փորձէ թօթափել պատերազմի հետքերն ու վերացնել սպիները:
Փառք կու տանք Աստուծոյ, որ կարելի եղաւ վերականգնել Հայ Աւետ. Էմմանուէլ եկեղեցին, ներդրումով Ամերիկայի Հայ Աւետարանչական Ընկերակցութեան եւ զանազան նուիրատու կողմերու, հովանաւորութեամբ ՄԱՀԱԵ Միութեան Կեդրոնական Մարմինին, ջանքերով Հալէպի Հայ Աւետ. եկեղեցիներու տեղական մարմիններուն եւ անխոնջ նուիրումով Սուրիոյ Հայ Աւետարանական Համայնքի Համայնքապետ՝ Վերապատուելի Յարութիւն Սելիմեանի:
Եկեղեցւոյ Նաւակատիքի պաշտամունքը տեղի ունեցաւ Կիրակի, 2 Դեկտեմբեր 2018-ին, կէսօրուան ժամը 12:30-ին, ներկայութեամբ Լիբանանէն ժամանած պատուիրակութեան, գլխաւորութեամբ Մերձաւոր Արեւելքի Հայ Աւետարանական Եկեղեցիներու Միութեան նախագահ Վերապատուելի Մկրտիչ Գարակէօզեանի, ՄԱՀԱԵ Միութեան Կեդրոնական Մարմինի ատենապետ Վերապատուելի դոկտ. Փօլ Հայտոսթեանի, սուրիական կրօնական եւ պետական մարմիններու բարձրաստիճան ներկայացուցիչներու, Բերիոյ Հայոց Թեմի Առաջնորդ Գերշ. Տ. Շահան Ս. Արք. Սարգիսեանի, Կաթողիկէ համայնքի Առաջնորդ Գերշ. Տ. Արք. Պետրոս Միրիաթեանի, Սուրիոյ եւ Լիբանանի Հայ Աւետարանական Համայնքի հոգեւոր հովիւներու, քրիստոնեայ համայնքներու պետերու, իսլամ կրօնաւորներու, հայկական կազմակերպութիւններու ներկայացուցիչներու եւ հաւատացեալներու հոծ բազմութեան:

Աշխատասիրութեամբ՝
Լուսին Ապաճեան-ՉիլԱբոշեան
Սեւան Ազարիկեան-Պամաքսզեան
Մարինա ՉիլԱբոշեան-Պօղիկեան
Սեւանայ Հալլաճեան

Աղբիւր- «Գանձասար» Բացառիկ 2019

Share.

Leave A Reply

This site uses Akismet to reduce spam. Learn how your comment data is processed.