ՊԱՏԱՆԻ ԳՐՈՂՆԵՐՈՒ ԱԿՈՒՄԲ. ՆՈՒԷՐ

0

Տօնական օրերուն թէ այլ առիթներով նուէրներ կը ստանանք եւ կ’ուրախանանք: Նուէրները, ըլլան անոնք մեր նախասիրածն ու սպասածը կամ ոչ, սիրոյ ու բարեկամութեան արտայայտութիւն են: Կարեւորը այն է, որ նուիրող անձը ժամանակ յատկացուցած է մեզի բան մը նուիրելու, իր սէրն ու յարգանքը արտայայտելու համար:
Երբ նուէր կը ստանանք, մեր սիրտը ուրախութեամբ կը լեցուի: Ինծի համար կարեւոր չէ նուէրին տեսակն ու որակը: Կարեւորը նուիրողին հաճելի արարքն է, նուրբ վարմունքը:
Մտերիմ ընկերուհիներով հաւաքուած տարեդարձս կը տօնէինք, երբ անոնք ինծի նուիրեցին խնամքով ու ճաշակով ընտրուած ծրարներ: Սիրտս ուրախութեամբ լեցուեցաւ: Որքա՞ն ժամանակ տրամադրած էին ինծի: Հետաքրքրութեամբ բացի յատկապէս մտերիմ ընկերուհիիս նուիրած գիրքերու ծրարը, որովհետեւ գիրքերու աշխարհը շատ խորհրդաւոր է:
Ես ալ բծախնդրութեամբ կ’ընտրեմ նուէրներս ու անոնց մէջ սէր կը սրսկեմ, սիրով կը նուիրեմ զանոնք: Ամէնէն փոքրիկ նուէրն ալ մեծ արժէք կը ստանայ, եթէ սիրով նուիրես զայն:

Բալին Իսկէնեան
Ը. կարգ
Կրթասիարաց Ս. Չէմպէրճեան երկրդ. Վարժարան

Share.

Leave A Reply

This site uses Akismet to reduce spam. Learn how your comment data is processed.