ՀԲԸՄ-Ի ՆԱԽԱԳԱՀ , ՄԵԾ ԲԱՐԵՐԱՐ, ԱԶԳԱՅԻՆ ԳՈՐԾԻՉ ԼՈՒԻԶ ՄԱՆՈՒԿԵԱՆԻ ՀՈԳԵՀԱՆԳՍՏԵԱՆ ՊԱՇՏՕՆ

0

Հովանաւորութեամբ եւ ներկայութեամբ Բերիոյ Հայոց Թեմի Բարեջան Առաջնորդ Գերշ. Տէր Շահան Սրբ. Արք. Սարգիսեանի, Հայ Կաթողիկէ Համայնքապետին եւ Հայ Աւետարանական Համանքի ներկայացուցիչին ներկայութեան, Շաբաթ, 6 Ապրիլ 2019-ի միջօրէի ժամը 12:00-ին, Հալէպի Ս. Աստուածածին եկեղեցւոյ մէջ ՀԲԸՄ-Ի նախագահ, մեծ բարերար, ազգային գործիչ Լուիզ Մանուկեանի մահուան քառասունքին առիթով ՀԲԸՄ-ի Սուրիոյ Շրջանակային Յանձնաժողովին հրաւէրով հոգեհանգստեան պաշտօն կատարուեցաւ:

Հոգեհանգստեան արարողութեան ՀԲԸՄ-ի Սուրիոյ Շրջանակային Յանձնաժողովին եւ Հալէպի Տեղական Մասնաճիւղին կողքին ներկայ էին՝ ՀՀ Հալէպի Գլխաւոր Հիւպատոս Արմէն Սարգսեան, ՀՀ մարդասիրական օժանդակութեան խումբի Հիւպատոսութեան ներկայացուցիչ Արկատի Տօնոյեան, Սուրիոյ Խորհրդարանի երեսփոխան Ժիրայր Րէիսեան, Հալէպահայ կազմակերպութիւններու եւ միութիւններու ներկայացուցիչներ:

Եկեղեցւոյ մուտքին սգակիր հաւատացեալները դիմաւորուեցան ՀԵԸ-ի սկաուտական կազմին կողմէ:

Լուիզ Սիմոն Մանուկեան ծնած է 19 Մայիս 1933-ին Տիթրոյթ, դուստրն է յայտնի հասարակական գործիչ, Հայաստանի Հանրապետութեան ազգային հերոս Ալեք Մանուկեանի, որ ՀԲԸ Միութեան 5-րդ նախագահն էր:

Լուիզ Սիմոն Մանուկեան ամուսնացած է Արման Սիմոնի հետ եւ ապրած Մանհէթըն, ունի մէկ երեք զաւակ, մէկ դուստր՝ Քրիստինէ եւ երկու որդի` Դաւիթ եւ Մարք:

1989-ին Լուիզ Մանուկեան Սիմոնը դարձաւ ՀԲԸ Միութեան նախագահ եւ ղեկավարեց զայն մինչեւ 2002: Ան ծառայեց անխոնջ նուիրումով եւ անկրկնելի գերազանցութեամբ, իբրեւ կազմակերպութեան առաջին կին ղեկավարը, նախ որպէս Կեդրոնական Վարչական Ժողովի անդամ, ապա 12 տարի որպէս նախագահ:

Փառապանծ կոչումի կեանք մըն էր Լուիզ Մանուկեան Սիմոնը. իր պաշտօնավարութեան միջոցին, 1988-ին Սպիտակի երկրաշարժէն յետոյ առաջինն էր որ հասնելով Աղէտի գօտի կազմակերպեց եւ ղեկավարեց Հայաստանի երկրաշարժի օգնութեան եւ վերականգնումի ամենածաւալուն շարժումը:

Ան ինչպէս որ հայրենիքին սատարեց Խորհրդային շրջանին, այնպէս ալ հիմնական դերակատարութիւն ունեցաւ վերածնող Անկախ Հայաստանի եւ Նոր անկախ Ղարաբաղի Հանրապետութեան կազմաւորումի գործընթացներուն մէջ:

Լուիզ Մանուկեան Սիմոնի ամենահպարտառիթ իրագործումներէն էին՝ Հայաստանի Ամերիկեան Համալսարանի Հիմնադրումը, Հայաստանի Ազգային Ֆիլհարմոնիքի հովանաւորումը, նաեւ Ս. Էջմիածնի գործակցութեամբ ՀԲԸ Միութեան Հայորդեայց Տուներու եւ Տարեցներու ճաշասրահները, որոնք կենսունակ են ու յաջողութեամբ կը գործեն մինչեւ այսօր` որպէս արդիւնք իր ներշնչող ոգիին եւ առաջնորդութեան:

26 Նոյեմբեր 2012-ին, Ամենայն Հայոց Կաթողիկոս Գարեգին Բ.-ի հրամանագիրով Լուիզ Մանուկեան Սիմոնը պարգեւատուեցաւ ,Ասպետ Սուրբ Էջմիածինեի շքանշանով:

Լուիզ Մանուկեան Սիմոնի իշխանավայել ընծայաբերումով Հայաստանի Քրիտսոնէութեան պետական կրօն հռչակման 1700 ամեակի առիթով կառուցուեցան Երեւանի Ս. Գրիգոր Լուսաւորիչ Մայր Եկեղեցին եւ Մալաթիայի Ս. Երրորդութիւն` հոյակերտ եկեղեցին:

Լուիզ Մանուկեան Սիմոն եղաւ հայոց նորագոյն պատմութեան ամենաազդեցիկ անձնաւորութիւններէն մին. ան արդարօրէն բոլորին կողմէ մեծ յարգանքի արժանացաւ: Հայ ժողովուրդին, հայրենիքին եւ Հայ Եկեղեցիին մատուցած իր հաւատաւոր եւ նուիրեալ ծառայութեամբ: Ան յոյսի եւ ներշնչման իր անուրանալի դրոշմը ձգեց ՀԲԸ Միութեան պատմութեան մէջ:

Իր մահով ոչ միայն Հայկական Բարեգործական Ընդհանուր Միութիւնը, այլ ամբողջ հայ ազգը կորսնցուց մեծ զաւակ մը եւ մեծ բարերար մը, իտէլապաշտ եւ իրատես գործնական տիպար առաջնորդը:

Լուիզ Մանուկեան Սիմոնի յիշատակը վառ պիտի մնայ մեր մէջ:

Խունկ եւ աղօթք անոր յիշատակին:

Share.

Leave A Reply

This site uses Akismet to reduce spam. Learn how your comment data is processed.