ՀԱՅ ԲԱՆԱՍՏԵՂԾՈՒԹԵԱՆ ԻՇԽԱՆԻՆ` Վ.ԹԷՔԷԵԱՆԻՆ ՆՈՒԻՐՈՒԱԾ ՄԻՋՎԱՐԺԱՐԱՆԱՅԻՆ ԱՍՄՈՒՆՔԻ ՄՐՑՈՅԹ

0

Կազմակերպութեամբ Թէքէեան Մշակութային Միութեան, Շաբաթ, 6 Ապրիլ 2019-ին, յետմիջօրէի ժամը 5:00-ին, «Եկաւեան» սրահէն ներս Հայ Բանաստեղծութեան Իշխան Վահան Թէքէեանի նուիրուած հալէպահայ 22-րդ միջվարժարանային բանաստեղծութեան աւանդական մրցումը տեղի ունեցաւ:

Մրցոյթին իւրաքանչիւր վարժարանի միջնակարգ եւ երկրորդական բաժիններէն երկու մասնակից աշակերտներ Վ.Թէքէեանի գործերէն պարտադիր եւ ազատ քերթուածներու ասմունքով
հանդէս եկան:

Դատական կազմին անդամները բաղկացած էին վեց վաժարաններու հայերէնաւանդ հետեւեալ ուսուցչուհիներէն.-
Ալին Բանոյեան (Մխիթարեան վարժարան),
Մարիա Մոմճեան-Աղպապեան (Կրթասիրաց Սարգիս Չէմպէրճեան Երկրորդական վարժարան),
Ազիկ Եագուպեան (Կիլիկեան Ճեմարան),
Լուսին Ապաճեան-ՉիլԱբօշեան (Հայ Աւետ.Բեթէլ Երկրդ. վարժարան),
Անի Յովակիմեան-Էօրտէքեան (Լազար Նաճարեան Գալուստ Կիւլպէնկեան Երկրդ. վարժարան),
Ռիթա Կաղեան-Տիքպիքեան (Ազգային Քարէն Եփփէ Ճեմարան)
Նայիրի Օհանեան- Մարգարեան (միութեան ներկայացուցիչ)

Բացման խօսքով հանդէս եկաւ բժշկ.Յարութիւն Նազարեան, որ վեր առաւ նման ձեռնարկներուն կարեւորութիւնը՝ հայ աշակերտը Թէքէեանի գործերուն եւ հայ բանաստեղծութեան ծանօթացնելու համար: Ան յատկապէս դիտել տուաւ, որ Սուրիական Հայրենիքը ճգնաժամային օրեր դիմագրաւեց եւ հալէպահայ գաղութը նօսրացաւ, սակայն արհամարհելով դժուարութիւնները` պայքարեցաւ:
Այնուհետեւ աշակերտները մէկ առ մէկ բեմ բարձրանալով ասմունքեցին իրենց վստահուած բանաստեղծական կտորները:

Ձեռնարկին ուշագրաւ էր մասնակիցներուն բծախնդիր պատրաստութիւնն ու ոգեւորութիւնը:

Աւարտին, մրցանակակիրներուն անունները յայտարարուեցան:

Մեթր Կարօ Շուշանեանի ձեռամբ մրցումին առաջին երեք դիրքը գրաւող հետեւեալ աշակերտներուն գնահատագրեր յանձուեցան.
Ա.կարգՎանայ Պարմաքսզեան (Ազգային Քարէն Եփփէ Ճեմարան) Բ.կարգ Աննա Տալիթա Չափանեան (Լազար Նաճարեան Գալուստ Կիւլպէնկեան Երկրդ. վարժարան)
Գ.կարգ`Ագապէ Ֆրանքեան (Ազգային Քարէն Եփփէ Ճեմարան)
Այս առիթով հաստատագրեր ստացան բոլոր մասնակից աշակերտներն ու դատական կազմին անդամները:

Օրուան պատգամը տուաւ Տէր Գառնիկ Քհնյ.Չափանեան: Ան դիտել տուաւ, որ այս ձեռնարկը հարստացուց իւրաքանչիւրիս ներաշխարհը: Ապա գնահատելով ձեռնարկը ըսաւ, որ մեր աշակերտները նման առիթներով աւելի մեծ հետաքրքրութիւն կ՚ունենան հայ գրականութեան նկատմամբ,որովհետեւ անոնք են, վերջապէս, որոնք ջահակիրները պիտի դառնան մեր լեզուի պահպանման:

Ձեռնարկը աւարտին հասաւ քահանայ հօր «Պահպանիչ» աղօթքով:

Share.

Leave A Reply

This site uses Akismet to reduce spam. Learn how your comment data is processed.