ՍՈՒՐԻՈՅ ՄԱՄԼՈՅ ՏԵՍՈՒԹԻՒՆ՝ ԱՊՐԻԼ Բ./2019

0

Այս շաբաթ սուրիական մամուլին մէջ անդրադարձ կատարուեցաւ Սուրիոյ եւ տարածաշրջանի իրադարձութիւններուն, ինչպէս նաեւ քաղաքական, տնտեսական եւ տեղական զարգացումներուն:
Սուրիական «Ալ Ուաթան» թերթին մէջ կը կարդանք, որ Երեքշաբթի, 9 Ապրիլ 2019-ին, ԱՄՆ-ի վարչակազմին Իրանեան Յեղափոխական Պահակագունդը զինեալ ահաբեկչական խմբաւորումներու ցանկին մէջ տեղադրելու որոշումէն ետք, Սուրիոյ Արտաքին Գործոց Նախարարութիւնը հանդէս եկած է հաղորդագրութեամբ, որուն մէջ շեշտած է. «Սուրիա խստիւ կը դատապարտէ Իրանեան Յեղափոխական Պահակագունդին դէմ առնուած ամերիկեան վարչակազմին որոշումը՝ շեշտելով, որ նման քայլ Իսրայէլի եւ արեւմտեան երկիրներու տարածաշրջանի բռնագրաւման ծրագիրին կը ծառայէ»: Աղբիւրը աւելցուցած է. «ԱՄՆ-ի վարչակազմին անպատասխանատու այս քայլը հետեւանք է Իրանի դէմ ԱՄՆ-ի անուղղակի պատերազմին, որուն գլխաւոր նպատակն է Իսրայէլի դաւադրական ծրագրերուն ենթահողը պատրաստել»:
Այլ առումով, «World and Syria News» կայքէջը «Սուրիոյ, Լիպիոյ եւ Եամանի Շուրջ Քաթարի Իշխանին Անակնկալ Յայտարարութիւնները» խորագրով լուրի մը մէջ կը յայտնէ, որ Շաբաթ, 6 Ապրիլ 2019-ին, Քաթարի իշխան Թամիմ պըն Համատ Ասսանի Տաուհայի մէջ տեղի ունեցած Միջազգային Խորհրդարաններու Միութեան 140-րդ նիստին բացման իր խօսքին մէջ դիտել տուած է, որ միջազգային ընտանիքին միջամտութիւնը՝ Սուրիոյ, Եամանի եւ Լիպիոյ հարցերուն, բարդացուց իրավիճակը: Ան զգուշացուցած է ներկաները ԱՄՆ-ի կարգ մը որոշումներու հետեւանքներէն, ինչպէս Երուսաղէմը եւ Կոլանը Իսրայէլին բռնակցելու որոշումները:
Տնտեսական գետնի վրայ, սուրիական «Շամ Թայմզ» կայքը, վկայակոչելով ամերիկեան լրատուական աղբիւրի մը ըսածը յայտնած է. «Չինաստան՝ աշխարհի երկրորդ հզօրագոյն տնտեսութեան տէր պետութիւնը, հաստատած է, որ Սուրիոյ վերականգնումի աշխատանքներուն պիտի մասնակցի ծաւալուն ծրագիրով»:
Յիշենք, որ Սուրիոյ վերականգնումը պիտի իրականանայ Սուրիոյ եւ Ռուսիոյ միացեալ ծրագիրին համաձայն, պատերազմի վերջնական աւարտէն ետք:
Գիւղատնտեսութեան ոլորտին մէջ, սուրիական «Տամ Փրէս» կայքը կը յայտնէ, որ Լիբանանի գիւղատնտեսութեան նախարար Հասան ալ Լաքիս պաշտօնական այցելութեամբ ժամանած է Դամասկոս, ուր սուրիացի պաշտօնակից Ահմատ ալ Քատիրիի հետ բացումը կատարած է սուրիական-լիբանանեան գիւղատնտեսական միացեալ յանձնախումբի խորհրդակցական նիստին, որուն ներկայ եղած է սուրիական-լիբանանեան բարձրագոյն խորհուրդի ընդհանուր քարտուղար Նասրի Խուրին:
Նիստի ընթացքին կողմերը որոշած են նախկին համաձայնութիւնները ի կատար ածել: Այս իմաստով Սուրիա Լիբանանէն պանան պիտի ներածէ, իսկ փոխարէնը՝ Լիբանան պիտի արտածէ կիտրոնազգի պտուղներ եւ գիւղատնտեսական այլ արտադրութիւններ:
Այլ առիթով, ՍԱՆԱ լրատու գործակալութենէն կ’իմանանք, որ չեխական «Մարդ եւ Պետութիւններ» թերթը սուրիական Ռաս ալ Շամրա շրջանին մէջ յայտնաբերուած Օկարիթի այբուբենին անդրադարձած է: Օկարիթի այբուբենը պատմութեան մէջ եղած է առաջինը եւ իր ազդեցութիւնը ունեցած է ոչ միայն արեւմտեան քաղաքակրթութեան՝ այլ նաեւ համայն մարդկութեան իրարայաջորդ սերունդներուն վրայ:
Աղբիւրին համաձայն, յայտնաբերուած են նաեւ յուշարձաններ, որոնք կը պատկանին Քա. 6000 թուականին: Ամէնէն նշանաւորը կը պատկանի պրոնզէ դարուն՝ Քա.14-րդ դար:

Share.

Leave A Reply

This site uses Akismet to reduce spam. Learn how your comment data is processed.