ԶՈՒԱՐԹՆՈՑ ԵՐԳՉԱԽՈՒՄԲԻ ՅԻՍՆԱՄԵԱՅ ՓԱՌԱՀԵՂ ԵԼՈՅԹԸ

0

Հովանաւորութեամբ Բերիոյ Հայոց Թեմի Բարեջան Առաջնորդ Գերշ. Տէր Շահան Սրբ. Արք. Սարգիսեանի, կազմակերպութեամբ Համազգայինի Սուրիոյ Շրջ. Վարչութեան «Զուարթնոց» Երգչ. Միաւորի Վարչութեան, Կիրակի, 7 Ապրիլ 2019-ին, եռամսեայ փորձերէ ետք բեմ բարձրացաւ Համազգայինի «Զուարթնոց» երգչախումբը՝ հրամցնելու իր 50-ամեակի յոբելինական համերգը, գեղարուեստական ղեկավարութեամբ Գայիանէ Սիմոնեան-Տէրեանի, դաշնամուրի ընկերակցութեամբ Ռուզան Պարսումեանի:
Համերգին ներկայ էին Բերիոյ Հայոց Թեմի Առաջնորդը, ՀՀ Հալէպի Գլխաւոր Հիւպատոսը, Համազգայինի Կեդր. Վարչութեան ներկայացուցիչը, հայկական միութիւններու ներկայացուցիչներ ու երաժշտասէր հոծ բազմութիւն մը:
Համերգը բացուեցաւ Սուրիոյ եւ Հայաստանի Հանրապետութեան քայլերգներով: Հայերէն բացման խօսքով հանդէս եկաւ Հուրի Տէրտէրեան-Տիլպէրեան, որ ըսաւ. «Կէս դար մը ամբողջ, արհամարհելով ամէն խոչընդոտ ու դժուարութիւն, երգչախումբը դարձաւ սուրիահայութեան բաբախող այն երակը, որ մարդուն հոգեկան ներաշխարհը սնուցանեց գեղագիտական վայելքի ու ազգային ինքնագիտակցութեան զարթօնքի գաղափարներով»:
Արաբերէն բացման խօսքով Ռաֆֆի Սիւլահեան ըսաւ. «Արուեստը աշխարհի լեզուն է, իսկ մշակոյթը՝ ազգերու հայելին: Երաժշտութեամբ կը բարձրանանք նոր մակարդակներու ու սերունդներ կ’առաջնորդենք դէպի նոր ուղիներ»:
Համազգայինի Սուրիոյ Շրջանային Վարչութեան խօսքը արտասանեց Արփի Սանոսեան-Զէյթճեան, որ հայ երգը մեր ինքնութեան պահպանման եւ միջազգային շրջանակներուն հայ մշակոյթի ծանօթացման կարեւորագոյն ազդակներէն մէկը համարեց: Ան անդրադարձաւ «Զուարթնոց»ի 50-ամեայ երթին, հիմնադիր սերունդին, խմբավարներուն, ապա շնորհակալութիւն յայտնեց բոլոր անոնց, որոնք սատար կանգնեցան երգչախումբին:
Այնուհետեւ հանդէս եկաւ երգչախումբը ու առաջին մասով յաջորդաբար ներկայացուց Կոմիտասի «Կալի Երգ»ը, «Գութաներգ»ը, ապա Ք. Կարա Մուրզայի խմբերգային շարքը, մենակատարութեամբ Գարօլ Քէշիշեանի, Ալ. Հէքիմեանի «Կենաց Երգ»ը, մենակատարութեամբ Նարեկ Առաքելեանի, Զիատ Պըթրոսի «Իլան Նասրի Հայա»ն, W.A.Mozart-ի «Dies Erae», G.F.Hendel-ի «Hallelujah»ն եւ Ալ. Յարութիւնեանի «Տլէ Եաման»ը:
Ելոյթի ընթացքին պարբերաբար տեսերիզի ցուցադրութեամբ ներկայացուեցաւ «Զուարթնոց» երգչախումբի պատմութիւնն ու գործունէութիւնը:
Բ. մասով երգչախումբը ներկայացուց Louis Prima-ի «Sing Sing»ը, արաբերէն «Լուլու Պի Լուլու»ն, մենակատարութեամբ Վերժին Պալապանեանի: Յատկանշական էր, որ այս երգը կրկնուեցաւ քառասունեօթը տարի ետք, նոյն մենակատարին կատարողութեամբ: Այնուհետեւ խումբը հրամցուց «Ֆոկ Ըլնա Խըլ» երգը, մենակատարութեամբ տոքթ.Պերճ Գասապեանի, Ա. Մանդակունեանի «Սիրելիս» երգը, մենակատարութեամբ Եղիա Քիլէճեանի, Գուսան Շահէնի «Խռոված էր»ը, մենակատարութեամբ Մարինէ Մարգարեանի, Գուսան Աշոտի «Սարի Սիրուն Եար»ը, մենակատարութեամբ Լիւսի Յովհաննէսեանի եւ «Սարուորի Երգ»ը, մենակատարութեամբ Խաչիկ Աշճեանի, Տ.Չուխաճեանի «Մենք Քաջ Տոհմի Զաւակներ Ենք»ը, մենակատարութեամբ Քրիստ Դաւիթեանի, ժողովրդական «Կենաց Երգ»ը, մենակատարութեամբ Արամ Խաչատուրեանի, Կ.Պետրոսեանի «Հայաստան»ը, մենակատարութեամբ Լենա Աշըգեանի եւ Արամ Խաչատուրեանի:
Այնուհետեւ բեմ հրաւիրուեցան «Զուարթնոց» երգչախումբի 50-ամեայ երթին մաս կազմած խմբավարներ, դաշնակահարներ ու երգողներ եւ երգչախումբին հետ միասնաբար երգեցին Է. Յովհաննիսեանի «Երեւան Էրեբունի»ն: Պահը յուզումնալից ու հպարտառիթ էր: Բեմին վրայ էին «Զուարթնոց» երգչախումբի պատմութիւնը կերտողները, անոր յաղթարշաւին իրենց ներդրումը բերողները:
Հանդիսականներուն ծափողջոյնները թնդացուցին սրահը: Մշակութային երթ մը պսակուած էր յաջողութեան դափնիով:
Օրուան եզրափակիչ պատգամը տուաւ Բերիոյ Հայոց Թեմի Բարեջան Առաջնորդ Գերշ. Տ. Շահան Սրբ. Արք. Սարգիսեան:
Սրբազան հայրը բարձրօրէն գնահատեց «Զուարթնոց» երգչախումբը, անոր ներդրումը սուրիահայ մշակութային կեանքէն ներս, խմբավարները, դաշնակահարները, երգողները, որոնց միացեալ աշխատանքին արքասիքն է երգչախումբին 50-ամեայ պանծալի երթը:
«Սերունդները այս բեմին վրայ տարբեր մակարդակներով, տարբեր ժամանակներու մէջ, որպէս մէկ շունչ, մէկ մարմին, մարդկայնութեամբ զեղուն, երաժշտութեամբ տոգորուած երկնային հրեշտակներ էին, որոնք երկիր իջած էին ու կոչուած «Զուարթնոց»: Այս ելոյթին, «Զուարթնոց»ը Կոմիտասով, Կոմիտասի հետ մեզի կը վերադարձնէ մեր ինքնութիւնը, մեզի կը վերադարձնէ մեր ստեղծագործ ներկայութիւնն ու զօրութիւնը, գալիքի նկատմամբ յոյսով ապրելու կամքն ու կորովը: Կը շնորհաւորենք «Զուարթնոց»ի ոսկեայ յիսնամեակը: Անտառին մէջ, երբ փոթորիկը կու գայ ու կ՛անցնի, անտառը չի մեռնիր, ծառերը իրենց արմատները կը զօրացնեն, որպէսզի ժամանակին յաղթեն: Ազգերն ալ նոյն ընթացքը կ’ունենան ժամանակի փոթորիկներուն դիմաց ու դէմ կը դնեն փոթորիկներուն, շնորհիւ իրենց մշակոյթին ու յարատեւելու կամքին»:
Հանդիսութիւնը վերջ գտաւ Սրբազան Հօր «Պահպանիչ» աղօթքով:
Համերգը պիտի կրկնուի յառաջիկայ Կիրակի նոյն ժամուն։
Ձեր վարձքը կատար, սիրելի՛ զուարթնոցականներ: Յառա՛ջ դէպի հարիւրամեակ:

Վեհան Պարսումեան

Share.

Leave A Reply

This site uses Akismet to reduce spam. Learn how your comment data is processed.