ՍՕ ԽԱՉԻ «ԱՆԻ» ՄԱՍՆԱՃԻՒՂԻ ՄԻՋԻՆՔԻ ՁԵՌՆԱՐԿ

0

Հայոց ազգային աւանդութիւնները հայ ժողովուրդի մշակոյթին անբաժան մասնիկներն են, իսկ Միջինքը կենցաղային աւանդութիւններուն մէջ կարեւոր տեղ կը գրաւէ, ի մասնաւորի ամուսնութեան ընթացքին քաւորի, հարսի եւ կեսրոջ հետաքրքրական կապերուն անդրադարձով։
Հալէպահայ գաղութը իր աւանդութիւններուն կառչած մնաց, պահելով զանոնք փոխանցեց սերունդէ-սերունդ։ Միութիւնները մեծ դեր ունեցան հայկական միջավայրի ջերմութեան եւ հայ դիմագիծի պահպանման աշխատանքին մէջ։
Արդարեւ, ՍՕ Խաչի «Անի» Մասնաճիւղը, Երեքշաբթի, 26 Մարտ 2019-ին «Նատի Հալապ» ճաշասրահէն ներս կազմակերպած էր Միջինքի ձեռնարկ։
Ձեռնարկին բացման խօսքը արտասանեց «Անի» Մասնաճիւղի ատենապետ Անի Թոփճեան-Պարոնեան։ Ան շնորհաւորեց բոլոր հարսնցուները եւ ցանկութիւն յայտնեց, որ իրենց տան երդիքին տակ մասունքի պէս պահեն ու պահպանեն մե՛ր մշակոյթը, մե՛ր աւանդութիւնները, ապա ժառանգ թողուն զանոնք իրենց զաւակներուն, որովհետեւ անոնց ընդմէջէն հայութեան հոգին կ’արտացոլայ։
Այնուհետեւ մասնաճիւղի Ընկերային Յանձնախումբի ատենապետ Հայկան Գալայճեան ներկաներուն ուշադրութեան յանձնեց մեր աւանդական հարսանիքներուն կիրարկուած սովորութիւնները։ Ապա Ընկերային Յանձնախումբի ընկերուհիները բեմականացուցին մեր աւանդական հարսանիքը եւ ներկաներուն մօտ բարձր տրամադրութիւն ու խանդավառութիւն ստեղծեցին։
ՍՕ Խաչը իր ձեռնարկներով ու դաստիարակչական ծրագրերով կը ձգտի պատրաստել զոհաբերութեան ոգիով եւ ազնիւ նկարագրով օժտուած խաչուհիներ, որոնք ապագայ սերունդ կերտող մայրերը պիտի դառնան։

Share.

Leave A Reply

This site uses Akismet to reduce spam. Learn how your comment data is processed.