ՀԱՅԱՍՏԱՆ ԲԺՇԿԱԿԱՆ ՇՏԱՊՕԳՆՈՒԹԵԱՆ ՀԱՄԱՐ ՈՒՂՂԱԹԻՌ ՄԸ ԱՊԱՀՈՎԱԾ Է

0

«Ժամանակ»ի համաձայն Հայաստան կը դառնայ Հարաւային Կովկասի տարածաշրջանի առաջին երկիրը, որ բժշկական շտապօգնութեան ուղղաթիռ կ՚օգտագործէ։ Armenian Helicopters-ի ընկերութեան ղեկավարներէն Արամ Աբովեան լրագրողներու հետ զրոյցի ընթացքին ըսաւ հետեւեալը. «Հայաստանի մէջ շատ են դժուարանցելի ճանապարհները, որովհետեւ լեռնային երկիր մըն է այս իսկ պատճառով ուղղաթիռը միակ յարմար փոխադրամիջոցն է հիւանդ մարդը շատ կարճ ժամանակի մէջ զանազան մարզերէն Երեւան փոխադրելու համար։ Առողջապահութեան Նախարարութեան կողմէ կայ ճշդուած հիւանդութիւններու ցանկ մը, որոնց պարագային ուղղաթիռը պէտք է հիւանդը բժշկական հաստատութիւն հասցնէ։ Հիւանդները փոխադրելու պարագային պիտի գործէ պետական պատուէր, այսինքն՝ պետութիւնը պիտի հոգայ ծախսերը»։

Այս ուղղաթիռը ամբողջութեամբ օժտուած է անհրաժեշտ բոլոր սարքաւորումներով, որոնք հիւանդը երկիրի մարզերէն Երեւան տեղափոխելու տեսակէտէ կարեւոր են։ Ուղղաթիռին մէջ կը գտնուի այն ամէն ինչ, որ գոյութիւն ունի նաեւ շտապօգնութեան ինքնաշարժներուն մէջ։

Իր կարգին, Հայաստանի առողջապահութեան նախարար Արսէն Թորոսեանն ալ յայտնեց, որ բժշկական օդագնացութիւնը աշխարհի մէջ շատ ընդունուած փոխադրամիջոց մըն է, որ թոյլ կու տայ հիւանդները աւելի արագ ձեւով հիւանդանոցներ հասցնել։

Այս ուղղաթիռով ծառայութիւն իրականացնող բժիշկներն ալ արդէն իսկ համապատասխան վերապատրաստումներէ անցած են, անվտանգութեան բոլոր կանոններուն տեղեակ են, օդաչուները նոյնպէս բոլոր մանրամասնութիւններուն կը տիրապետեն ։

Share.

Leave A Reply

This site uses Akismet to reduce spam. Learn how your comment data is processed.