ԹԱԴԷՈՍ ԱՒԵՏԻՍԵԱՆ.«ՎԱՐՉԱՊԵՏԻՆ ՅԱՆՁՆԱՐԱՐԱԿԱՆԸ ԻՐԱՒԱԿԱՆ ՀԻՄՔ ՉՈՒՆԻ, ՊԵԿ ԾԱՌԱՅՈՂԸ ԱԶԱՏ ԱՐՁԱԿՈՒԵԼՈՒ ԴԻՄՈՒՄ ՊԷՏՔ ՉԷ ԳՐԵՐ»

0

«Նորագաւիթի մաքսատան ծառայողը աշխատանքէն արձակելու վարչապետի յանձնարարականը իրաւական հիմք չունի. վարչապետը նման բովանդակութեամբ յանձնարարական տալու իրաւասութիւն չունի»:

Աշխատանքի եւ ընկերային հարցերու նախկին փոխնախարար, ՀՅԴ աշխատանքային իրաւունքներու պաշտպանութեան գրասենեակի համակարգող Թադէոս Աւետիսեան անդրադառնալով Նորագաւիթի մաքսատան ծառայողը աշխատանքէն արձակելու մասին Նիկոլ Փաշինեանի յանձնարարականին յայտնեց, որ մաքսային ծառայողը պետական ծառայող է եւ պաշտպանուած է միաժամանակ  քանի մը  օրէնքներով` Աշխատանքային օրէնսգրքով, Հանրային ծառայութեան  եւ Մաքսային ծառայութեան  օրէնքով:

Աւետիսեանի խօսքով` միայն ծառայողական քննութեան արդիւնքով մաքսատան աշխատակիցին ենթադրեալ  սխալով դատապարտել  եւ  կարգապահական պատասխանատուութեան ենթարկել կարելի էր:

Ան ըսաւ.«Այս դէպքին մէջ գործ ունինք աշխատանքային կարգապահական խախտման հետ, եւ եթէ տուեալ արարքը կը բնութագրուի, որպէս կոպիտ խախտում, օրէնքի պահանջով ծառայողական քննութիւն պէտք է նշանակուի , որուն արդիւնքին համաձայն միայն տուեալ ծառայողի յանցանքին առկայութիւնը կամ բացակայութիւնը, մեղքի աստիճանը պէտք է պարզուի, որմէ ետք միայն կարելի կը դառնայ տուեալ ծառայողը հրաւիրել կարգապահական  պատասխանատուութեան` օրինակ խիստ նկատողութիւն ուղղելով անոր: Եւ եթէ տուեալ ծառայողը առնուազն մէկ տարուան ընթացքին  կարգապահական  պատասխանատուութիւն չէ ունեցած, իսկ խիստ նկատողութիւնը  պետական ծառայողը աշխատանքէն արձակելու հիմք չէ»:

Աւետիսեան նկատեց, որ եթէ նոյնիսկ մաքսային ծառայողին յանցանքը առկայ է, որ ըստ անոր վիճելի է, մէկ դէպքի համար պէտք է կիրառուէր մէկ կարգապահական տնօրինում:

 Ըստ մասնագէտին`  պետական ծառայողները պէտք է պաշտպանուած ըլլան իրենց պաշտօնի  նշանակած անձանց հայեցողութենէն եւ ցանկութիւններէն.

Աւետիսեան դիտել տուաւ.«Մտահոգիչ է ոչ միայն այն, որ օրէնքի տառը չպահելով անձը պատասխանատուութեան  կ’ենթարկեն, այլ այն հանգամանքը, որ շարքային ծառայողները թիրախի մէջ կը յայտնուին: Տուեալ իրավիճակին համար օրէնքով սահմանուած առերեւոյթ պատասխանատուութիւն ունին նաեւ  բարձրաստիճան պաշտօնեաները: Կառավարութեան մօտ ուղենիշ դարձած է, որ հարցերու լուծման համար պատասխանատուութեան կ’ենթարկուին միայն ստորին օղակի պետական ծառայողները, իսկ բարձրասիճան պաշտօնեաները ջուրէն չոր  դուրս կու գան»:

Յայտնենք, որ մաքսային ծառայողը արդէն իսկ աշխատանքէն ազատ արձակուելու դիմում  ներկայացուցած է: Երբ հարց տրուած է, թէ կարելի՞ է քաղաքացիին խախտուած իրաւունքները վերականգնել, Աւետիսեան պատասխանած է.

 «Ակնյայտ է, որ մաքսային ծառայողը` աշխատանքէն արձակելու դիմումին իր հետ տեղի ունեցած միջադէպը հիմք ընդունած է: Այսինքն գործ ունինք վարչապետի յանձնարարականի հիմքով աշխատանքէն արձակման հետ: Վարչապետը նման բովանդակութեամբ յանձնարարական տալու իրաւասութիւն չունի, այդ յանձնարարականը իրաւական հիմք չունի: Եթէ ան դիմում չգրէր`   այլ ընթացակարգով աշխատանքէն կ՛արձակէին զինք եւ ան կարելիութիւն կ’ունենար դատարան դիմելու»: Ապա  ան մտահոգութիւն յայտնած է, որ նման երեւոյթներ կրնան նախադէպ դառնալ:

Աւետիսեան յիշեցուցած է, որ մաքսային ծառայողները օրէնքով նախատեսուած շարք մը երաշխիքներ ունին, որպէսզի հայեցողական  կամ քաղաքական որոշումներով պայմանաւորուած իրենց աշխատանքը չկորսնցնեն:

Ապա ըսած է.«Պետութիւնը մէկ կողմէն ընկերային երաշխիք կու տայ , օրինակ`  պարգեւատրումներու միջոցով կը փորձէ խթանել տուեալ ծառայողին արդիւնաւէտ աշխատանքը, բայց միւս կողմէն ալլ օրէնքով տրուած նուազագոյն երաշխիքները կասկածի տակ կը դնէ»:

Թադէոս Աւետիսեան միաժամանակ անդրադարձած է պետական ծառայողներուն` իրենց իրաւունքները լաւապէս իւրացնելու հարցին:

Աշխատանքային իրաւունքներու պաշտպանութեան գրասենեակի համակարգողը յայտնած է.«Մաքսային ծառայողները պէտք է կարենան արդիւնաւէտ կերպով իրենց իրաւունքները  պաշտպանել, որովհետեւ անոնք տարբեր ծառայութիւններ կը մատուցեն քաղաքացիներուն,  անոնց որոշումներէն կախեալ է տարբեր մարդոց մօտեցումը տուեալ կառոյցին հանդէպ եւ պետական ծառայողները  իրենց իրաւունքներն ու օրինական շահերը պէտք է կարենան պաշտանել, «վախկոտ» կամ ոչ լիարժէք իրաւունքներ իւրացնող ծառայողները չեն կրնար արդիւնաւէտ գործել նաեւ այլոց  իրաւուքներու պաշպանութեան ոլորտէն ներս»:

Յիշեցնենք, որ Նորագաւիթի աւտոմաքսատուն այցելութեան ընթացքին անկիւնը դրուած փոշոտ դրօշի մը պատճառով Նիկոլ Փաշինեան մաքսատան տեսուչը եւ անոր սենեկակից աշխատակիցները գործէն արձակելու դիմում պահանջած էր: Այսօր ալ վարչապետը իր որոշումը վերահաստատած է  յայտնելով. «Եթէ որեւէ մէկը կարծէ, որ ՀՀ վարչապետը չի կրնար պաշտպանել ՀՀ դրօշը, ուրեմն պետութեան մասին մեր պատկերացումները տարբեր են»:

Share.

Leave A Reply

This site uses Akismet to reduce spam. Learn how your comment data is processed.