ՊԷՅՍՊՈԼ

0

Պէյսպոլը Ամերիկայի Միացեալ նահանգներու, Քուպայի, Ճափոնի, Չինաստանի եւ Հարաւային Քորիայի մէջ տարածուած մարզաձեւ է։ Ներկայիս աւելի քան 120 երկիրներու մէջ կը կիրարկուի։ Գոյութիւն ունի նաեւ պէյսպոլի պարզեցուած ձեւը՝ սոֆթպոլը։


ԸՆԴՀԱՆՈՒՐ ՏԵՂԵԿՈՒԹԻՒՆՆԵՐ ՊԷՅՍՊՈԼԻ ՄԱՍԻՆ
ԱՄՆ-ի մէջ պէյսպոլը կը համարուի ամէնէն հռչակաւոր մարզաձեւը, նոյնիսկ կը նկատուի ազգային մարզանք։ Ան յառաջացած է «ռաունտըրզ» հինաւուրց անգլիական խաղ է, զոր անգլիացի գաղութարարները Ամերիկա բերած են 18-րդ դարուն։ «Պէյս» եւ «պոլ» անգլերէն բառերը համապատասխանաբար կը նշանակեն հիմք՝ գետին եւ գնդակ։ Պէյսպոլը կը խաղան 9 անդամներէ բաղկացած 2 խումբերով, շեղանկիւն հրապարակի մը վրայ (կողմի երկայնքը՝ 27,4 մեթր), որուն անկիւններուն վրայ կան յենակէտեր։ Խումբերը կարգով կը գրաւեն մէ՛կ պաշտպանողական, մէ՛կ յարձակողական դիրք։ Պաշտպանուող խումբին խաղցողը՝ փիթչըրը (նետողը), գնդակը կը նետէ, իսկ յարձակող խումբին խաղցողը՝ փեթերը (հարուածողը), պէտք է նետած գնդակին զարնէ, մականի հարուածով ետ մղելով զայն: Այնուհետեւ վազքով արագօրէն շրջանցէ բոլոր յենակէտերը եւ վերադառնայ «տուն»՝ նախկին դիրք։ Եթէ պաշտպանուող խումբին խաղցողը կարենայ գնդակով հարուածել վազողը, մինչեւ անոր առաջին յենակէտ հասնիլը, վերջինս դուրս կու գայ խաղէն։ Վազող փեթերը խաղէն դուրս կուգայ նաեւ այն պարագային, երբ չի կրնար հարուածել 3 սթրայքի՝ 3 գնդակի սթրայքի գօտիին մէջ («տան» տարածքին վրայ), կամ եթէ պաշտպանուողները յաջողին օդին մէջ բռնել մականի հարուածով ետ մղուած գնդակը։ Իսկ եթէ վազողը յաջողի վազքով շրջանցել երեք յենակէտերը եւ «տուն» վերադառնալ (սա կը կոչուի «շրջանաձեւ վազք»), վազքը կը համարուի աւարտած, իսկ յարձակող խումբը կէտեր կը շահի։
Խաղը բաղկացած է 9 փուլերէ։ Խաղի իւրաքանչիւր փուլ աւարտած կը համարուի, երբ իւրաքանչիւր խումբէ խաղէն դուրս գայ երեքական խաղցող։ Կը յաղթէ այն խումբը, որ խաղին վերջաւորութեան աւելի շատ վազքի կէտեր շահի։
Պէյսպոլը մեծ ժողովրդականութիւն կը վայելէ ոչ միայն ԱՄՆ-ի, այլեւ Աւստրալիոյ, Հոլանտայի, Հարաւային Ափրիկէի, Ճափոնի եւ Լատինական Ամերիկայի բազմաթիւ երկիրներուն մէջ։

Պատրաստեց
Պետիկ Աշոտեան

Share.

Leave A Reply

This site uses Akismet to reduce spam. Learn how your comment data is processed.