ՅԱՅՏԱՐԱՐՈՒԹԻՒՆ

0

10 Ապրիլին Ֆրանսայի պետական պաշտօնաթերթին մէջ հրապարակուեցաւ Հայոց Ցեղասպանութեան ոգեկոչումներուն մասին նախագահական թիւ 2019-219 հրամանագիրը:

Այս հրամանագիրը հանրապետութեան նախագահ Էմանուէլ Մաքրոնի գործադրուած այն խոստումն է, որ հայ համայնքին տուած էր տարի մը առաջ, ֆրանսահայ Կազմակերպութիւններու Համակարգող Խորհուրդի տարեկան ընթրիքին ընթացքին:

Հրամանագիրին համաձայն, այսուհետեւ 24 Ապրիլը ամբողջ Ֆրանսայի տարածքին պաշտօնական տօն կը նկատուի եւ մաս կը կազմէ կառավարութեան պաշտօնական օրացոյցին: Իմա՛, 24 Ապրիլը կը նկատուի Հայոց Ցեղասպանութեան ոգեկոչման Օր ամբողջ Հանրապետութեան տարածքին:

Ֆրանսայի Հայ Դատի Յանձնախումբը կ‘ողջունէ այս որոշումը, որուն ձեռքբերման համար անդուլ պայքար մղած է 1965-էն ի վեր: Իսկ 2012-էն ի վեր երկու նախագահներ, մէկ վարչապետ եւ բազմաթիւ նախարարներ մասնակցած են 24 Ապրիլի ժողովրդային հանդիպումին եւ իրենց խօսքը արտասանած են: Աւելին, նախագահ Ֆրանսուա Հոլլանտ Ցեղասպանութեան 100-ամեակին առիթով Երեւան մեկնեցաւ եւ Ծիծեռնակաբերդի մէջ ապրիլեան ոգեկոչման ձեռնարկին մասնակցեցաւ: Առ այդ, սոյն հրամանագիրը մենք կը նկատենք նաեւ բարոյական արդար վարձատրութիւն` Հայ Դատի իւրաքանչիւր զինուորի համար:

Հայ Դատի Յանձնախումբը պատրաստ է ամէն ձեւով օժանդակելու որեւէ քաղաքի պետական մարմինի, որ իր քաղաքին մէջ 24 Ապրիլի ոգեկոչման ձեռնարկ կը ծրագրէ կազմակերպել:

Նախագահական հրամանագիրով գործի դրուած այս պետական հռչակագիրը նաեւ լաւագոյն առիթն է գործնականապէս պայքարելու ժխտողականութեան դէմ, ինչպէս յայտարարեց հանրապետութեան նախագահը. «Յանուն արդարութեան պայքարը եւ ճանաչումը մե՛ր պայքարն է` Ցեղասպանութիւնը յիշելով ու յիշատակելով ու անոր նուիրուած յարգանքի օրը տեղադրելով հանրապետութեան օրացոյցին մէջ»:

ՖՐԱՆՍԱՅԻ ՀԱՅ ԴԱՏԻ ՅԱՆՁՆԱԽՈՒՄԲ
11 Ապրիլ 2019, Փարիզ

Share.

Leave A Reply

This site uses Akismet to reduce spam. Learn how your comment data is processed.