ՀԱՆԴԻՊՈՒՄ ՀԱՅԱՍՏԱՆԻ ԱՐՏԱՔԻՆ ԳՈՐԾՈՑ ՆԱԽԱՐԱՐՈՒԹԵԱՆ ԸՆԴՀԱՆՈՒՐ ՔԱՐՏՈՒՂԱՐԻՆ ՀԵՏ

0

ԿԼԵՆՏԷՅԼ.- ՀՅԴ Արեւմտեան Ամերիկայի Կեդրոնական կոմիտէի ներկայացուցիչները 9 Ապրիլին հանդիպում մը ունեցան Հայաստանի Արտաքին Գործոց Նախարարութեան ընդհանուր քարտուղար, դեսպան Վահագն Մելիքեանի հետ, որ քաղաքի Հայաստանի հիւպատոսարանին 25ամեակի տօնակատարութեան համար Լոս Անճելըս կը գտնուէր ։

ՀՅԴի Արեւմտեան Ամերիկայի կեդրոնատեղիին մէջ տեղի ունեցած հանդիպումը առիթ հանդիսացաւ քննարկելու Հայաստանի արտաքին քաղաքականութեան, Արցախի հիմնահարցին եւ շրջանային ապահովական մտահոգութեանց վերաբերող հարցեր։
Խորհրդակցութեանց ներկայ եղաւ նաեւ Լոս Անճելըսի Հայաստանի գլխաւոր հիւպատոս դոկտ. Արմէն Բայբուրդեան։
Մելիքեան յայտնեց, թէ ՀՅԴն միշտ կարեւոր դերակատարութիւն ունեցած է եւ պիտի շարունակէ ունենալ Հայաստանի մէջ եւ ՀՅԴի հետ գործակցութիւնը յոյժ կարեւոր համարեց, յատկապէս միջազգային հարթակներու վրայ Հայաստանի շահերը պաշտպանելու եւ վարկը բարելաւելու ջանքերուն մէջ։
Ան նաեւ դրուատեց հայութեան շահերը պաշտպանող հայկական կազմակերպութեանց դերակատարութիւնը, յատուկ դրուատիքի արժանացնելով Ամերիկայի Հայ Դատի Յանձնախումբին գործունէութիւնը՝ Հայաստան-Միացեալ Նահագներ յարաբերութիւնները սերտացնելու ջանքին մէջ։
Իրենց կարգին, ՀՅԴ Արեւմտեան Ամերիկայի Կեդրոնական կոմիտէի ներկայացուցիչները, որոնց կողքին էին նաեւ ՀՅԴ Բիւրոյի անդամներ Վիգէն Եագուպեան եւ Արամ Գալուստեան, վստահեցուցին, որ ինչպէս անցեալին, այսուհետեւ եւս կուսակցութիւնը պիտի շարունակէ նեցուկ կանգնիլ Հայաստանի պետականութեան ամրապնդման եւ Արցախի բարգաւաճման ջանքերուն, շեշտելով յատկապէս Արցախի ժողովուրդին ինքնաճանաչման իրաւունքը երաշխաւորելու եւ Արցախի հակամարտութեան արդար լուծում մը գտնելու կարեւորութիւնը։
ՀՅԴի ներկայացուցիչները նաեւ շեշտեցին, որ կուսակցութիւնը միշտ առաջին ճակատի վրայ եղած է Հայաստան-Սփիւռք յարաբերութիւնները ամրանպնդելու, Հայաստանի պետութեան շահերը պաշտպանելու, ինչպէս նաեւ Հայաստանի ու Արցախի Հանրապետութիւններուն ապահովութիւնը եւ կայունութիւնը երաշխաւորելու ջանքերուն մէջ:

Share.

Leave A Reply

This site uses Akismet to reduce spam. Learn how your comment data is processed.