ՔՈՆԿՐԷՍԻՆ ՄԷՋ ՑԵՂԱՍՊԱՆՈՒԹԵԱՆ ՈԳԵԿՈՉՈՒՄ

0

Ուաշինկթըն.- Ամերիկայի Հայ Դատի Յանձնախումբը կը տեղեկացնէ, որ ԱՄՆ Քոնկրէսին մէջ Հայոց Ցեղասպանութեան ոգեկոչման հաւաքը այս տարի տեղի ունեցած է 9 Ապրիլին, Ծերակոյտի «Հարթ» շէնքին մէջ, իբրեւ կիզակէտ ունենալով Ներկայացուցիչներու տան եւ Ծերակոյտին նոր ներկայացուած Հայոց Ցեղասպանութեան բանաձեւերուն վաւերացումը ապահովելու ջանքերը։

Արդարեւ, իրենց ելոյթներուն ընթացքին, Հայոց Ցեղասպանութեան բանաձեւը Ներկայացուցիչներու տան ներկայացուցած քոնկրէսականներ Էտըմ Շիֆ եւ Կաս Պիլիրաքիս խօսած են բանաձեւին պատրաստութեան եւ ցարդ անոր զօրակցող 76 հովանաւորներուն աջակցութիւնը ապահովելու երկկուսակցական աշխատանքին մասին։ Յիշուած է նաեւ, որ նոյն օրը ծերակուտականներ Պապ Մենենտեզ եւ Թետ Քրուզ Ծերակոյտին ներկայացուցած են վերոյիշեալ բանաձեւին մէկ տարբերակը, 14 այլ ծերակուտականներու աջակցութեամբ։
Ոգեկոչման ձեռնարկին ընթացքին, Ամերիկայի Հայ Դատի գործադիր վարիչ Արամ Համբարեան շնորհակալութիւն յայտնած է բանաձեւերը ներկայացնողներուն եւ անոնց հովանաւորներուն, ինչպէս նաեւ Քոնկրէսի Հայկական համախմբումին։
Ոգեկոչման ձեռնարկին ներկայ եղած են Քոնկրէսի Հայկական համախմբումի ատենապետներ՝ Ֆրենք Փալոն, Ճեքի Սփիր եւ Կաս Պիլիրաքիս, ինչպէս նաեւ փոխատենապետ Էտըմ Շիֆ եւ քոնկրէսականներ՝ Ճուտի Չու, Քեթրին Քլարք, Ճիմ Քոսթա, Թի. Ճէյ. Քոքս, Ճաշ Կաթիմըր, Ռաժա Քրիշնամութի, Պրետ Շնայտըր, Պրետ Շըրմըն եւ Փ. Վիսքլոսքի։
Ձեռնարկին հանդիսավարութիւնը ստանձնած է Քոնկրէսի անձնակազմին երկարամեայ անդամներէն Էլիս Քենտէրեան Արընսըն, իսկ քոնկրէսականներուն կողքին ելոյթ ունեցողներուն շարքին եղած են՝ Միացեալ Նահանգներու մօտ Հայաստանի դեսպան Վարուժան Ներսէսեան, Արցախի ներկայացուցիչ Ռոպերթ Աւետիսեան, Հայաստանի Միացեալ Նահանգներու նախկին դեսպան Ճան Էվընզ եւ Քոնկրեսի Հայ պաշտօնեաներու Միութեան համաատենապետ Մարիա Մարտիրոսեան։ Ներկայ էր նաեւ Մերիլընտի նահանգային խորհրդարանի անդամ Լորիկ Չարխտեան։

Share.

Leave A Reply

This site uses Akismet to reduce spam. Learn how your comment data is processed.