ՀՅԴ ԼԻԲԱՆԱՆԻ ՀԱՅ ԴԱՏԻ ՄԱՐՄԻՆԸ ՀԱՅՈՑ ՑԵՂԱՍՊԱՆՈՒԹԵԱՆ ԱՌՆՉՈՒԹԵԱՄԲ ԻՏԱԼԻՈՅ ԽՈՐՀՐԴԱՐԱՆԻՆ ՈՐԴԵԳՐԱԾ ՈՐՈՇՈՒՄԸ ՈՂՋՈՒՆԱԾ Է

0

«Ազդակ».- ՀՅԴ Լիբանանի Հայ Դատի Մարմինը Լիբանանի մէջ Իտալիոյ դեսպան Մասիմօ Մարոթիին յղեց նամակ մը` ողջունելով 10 Ապրիլին Իտալիոյ Պատգամաւորներու պալատին կողմէ որդեգրուած բանաձեւը, որ Իտալիոյ կառավարութեան կոչ կ՛ուղղէր ճանչնալու Հայոց Ցեղասպանութիւնը եւ այդ հարցը միջազգային մակարդակի վրայ արծարծելու:
Մարմինը դեսպանին յիշեցուց, որ Իտալիոյ խորհրդարանը 17 նոյեմբեր 2000-ին ճանչցած էր Հայոց Ցեղասպանութիւնը եւ Թուրքիոյ կառավարութեան կոչ ուղղած ընդունելու զայն ու վերցնելու Հայաստանի դէմ իր հաստատած պաշարումը:
ՀՅԴ Լիբանանի Հայ Դատի Մարմինը իր գնահատանքը արտայայտեց Նոյեմբեր 2000ի բանաձեւը վերահաստատող այս որոշումին որդեգրման համար` զայն նկատելով Իտալիոյ կառավարութեան ու ժողովուրդին արդարութեան ու մարդկային իրաւանց նկատմամբ յանձնառութիւնը վերահաստատող փաստ մը:
Մարմինը Իտալիոյ դեսպանին ուշադրութեան յանձնեց, թէ Հայոց Ցեղասպանութեան ճանաչումը, փոխհատուցումը եւ Միացեալ Նահանգներու նախագահ Վուտրօ Ուիլսընի իրաւարար վճիռին հիմամբ հայ ժողովուրդի իրաւունքներու վերականգնումը ապագայ ցեղասպանութիւններու կանխարգիլման համար կենսական պայման մըն է:
ՀՅԴ Լիբանանի Հայ Դատի Մարմինը յայտնեց, որ իր ձայնը Իտալիոյ Պատգամաւորներու պալատին եւ Իտալիոյ կառավարութեան միացնելով կոչ կ՛ուղղէ` պաշտօնապէս ճանչնալու Հայոց Ցեղասպանութիւնը եւ հարցը միջազգային մակարդակի վրայ արծարծելու:

Share.

Leave A Reply

This site uses Akismet to reduce spam. Learn how your comment data is processed.