ԻՐԱՔԻ ԿՐՕՆԱԿԱՆ ԱԶԳԱՅԻՆ ԽՈՐՀՈՒՐԴԻ ՆԱԽԱԳԱՀԸ ԹՈՒՐՔԻՈՅ ԿԱՌԱՎԱՐՈՒԹԵԱՆ ՀԱՅ ԺՈՂՈՎՈՒՐԴԷՆ ՆԵՐՈՂՈՒԹԻՒՆ ԽՆԴՐԵԼՈՒ ԿՈՉ Կ՛ՈՒՂՂԷ

0

«Հայերն այսօր» կը հաղորդէ, որ 15 Ապրիլին Իրաքի  ՀՀ դեսպան Հրաչեայ Փօլատեան դեսպանութեան մէջ ընդունեց Իրաքի Կրօնական ազգային խորհուրդի նախագահ Շէյխ Իւսէֆ ալ Նասըրին, Իրաքի կառավարութեան կից Համակեցութեան եւ Համայնքային Խաղաղութեան Մշտական Յանձնաժողովի անդամները, ինչպէս նաեւ` անոնց ուղեկցող հոգեւորականներու պատուիրակութիւնը:

Հանդիպման ընթացքին իսլամական հոգեւոր առաջնորդները ներկայացուցին Իրաքի մէջ ազգային եւ կրօնական միջհամայնքային փոքրամասնութիւններու գործակցութեան ամրապնդման ուղղուած աշխատանքները` շեշտելով իրաքահայ համայնքին եւ Հայ Առաքելական եկեղեցւոյ Իրաքի թեմին անգնահատելի դերը` յատկապէս պատերազմական եւ անոր յաջորդող ժամանակահատուածին:

Հոգեւոր առաջնորդները հանդիպման ընթացքին  Հայոց Ցեղասպանութեան հետ առնչուող հարցեր եւս քննարկեցին: Իրաքի Կրօնական ազգային խորհուրդի նախագահ Շէյխ Իւսէֆ ալ-Նասըրի, խստօրէն դատապարտելով Օսմանեան կայսրութեան մէջ իրագործուած անմարդկային ոճրագործութիւնը, նկատել տուաւ, որ թրքական ներկայ իշխանութիւնները, յանուն իրենց սերունդներուն, պէտք է հայ ժողովուրդին ներողամտութիւնը հայցեն կատարուածին համար:

Հանդիպման աւարտին հոգեւոր առաջնորդները փոխանցեցին իրենց ողջոյններն ու բարեմաղթութիւնները ՆՍՕՏՏ Գարեգին Երկրորդ Ամենայն Հայոց կաթողիկոսին` շեշտելով Իրաքի մէջ կրօնական եւ ազգային փոքրամասնութիւններու նկատմամբ իրաքեան իշխանութիւններու պետական հոգածութիւնը` կարեւորելով յատկապէս Իրաքի բազմազգ եւ բազմակրօն խճանկարին մէջ երկու ժողովուրդներու միջկրօնական համերաշխութեան ուղղուած կապերու զարգացման անհրաժեշտութիւնը:

Share.

Leave A Reply

This site uses Akismet to reduce spam. Learn how your comment data is processed.