ՄԱՐԶԱԿԱՆ՝ ՄԱՅԻՍ Ա./2019

0

ՏԵՂԱԿԱՆ

ՀՄԸՄ-Ի ՏՂՈՑ ԽՈՒՄԲԸ ԵԶՐԱՓԱԿԵՑ ԵՐԹԻ ՓՈՒԼԸ
Նախանցեալ շաբթուան սկիզբը աւարտեցաւ Սուրիոյ պասքեթի Ա դասակարգի ախոյեանութեան երթի փուլը:
Մրցումներուն ՀՄԸՄ-ի պասքեթի տղոց խումբը վեց պարտութիւն կրեց՝ բաւարարուելով միայն երեք յաղթանակով: Կազմը յաղթեց «Սաուրա»ին 61 – 50, «Նասրի»ին 81 – 69 եւ «Սահէլ»ին 61 – 51 արդիւնքով, իսկ պարտութեան մատնուեցաւ «Ուահտէ»էն 72 – 68, «Իթթիհատ»էն 65 – 72, «Ճալաա»էն 56 – 59, «Քարամէ»էն 71 – 65, «Ճէյշ»էն 70-85, «Հուրիէ»էն 72 – 62 արդիւնքով: Աւելցնենք, որ ախոյեանութեան դարձի փուլը սկսաւ 26 Ապրիլին, իսկ ՀՄԸՄ-ի տղոց խումբի առաջին հանդիպումը տեղի ունեցաւ Երեքշաբթի, 30 Ապրիլին «Իթթիհատ»ի դէմ: ՀՄԸՄ-ը կրկին պարտութիւն կրեց 62-82 արդիւնքով:

ՀԱՅԿԱԿԱՆ

ՀՄԸՄ ԱՆԹԻԼԻԱՍԻ ԱՂՋԿԱՆՑ ՊԱՍՔԵԹԻ ԽՈՒՄԲԸ ԴԱՐՁԱՒ ԱՐԵՒՄՏԵԱՆ ԱՍԻՈՅ ԱԽՈՅԵԱՆ
Յորդանանի մէջ տեղի ունեցած Արեւմտեան Ասիոյ ախոյեանութեան մրցումներու աւարտին, Լիբանանի ՀՄԸՄ-Անթիլիասի պասքեթի աղջկանց խումբը յաջողութեամբ եզրափակեց իր մասնակցութիւնը եւ կրցաւ տիտղոս մը եւս աւելցնել իր յաղթարշաւին, աւարտական մրցումին պարտութեան մատնելով հիւրընկալ երկիրի «Ֆուհէյս» խումբը՝ 94 – 67 արդիւնքով: Թէեւ ՀՄԸՄ-ի կազմը սոյն մրցաշարքին ներկայացաւ խաղացողներու նուազ թիւով, բայց ներկաները կրցան իրենք զիրենք փաստել եւ ներկայանալ բարձր մակարդակի խաղարկութեամբ, գլխաւորութեամբ խմբապետուհի Մեղրի Թորոսեանի: Առաջին հանդիպումին ՀՄԸՄ 63- 80 արդիւնքով յաղթեց «Պահման»ին, որմէ ետք 82 – 54 արդիւնքով պարտութեան մատնեց Սուրիոյ ներկայացուցիչ «Սաուրա»ն:

ՄԻՋԱԶԳԱՅԻՆ

ՓԱՐԻԶ ՍԱՆ ԺԵՐՄԱՆ ԴԱՐՁԱՒ ՖՐԱՆՍԱՅԻ ԱԽՈՅԵԱՆ
Պատմութեան մէջ 8-րդ անգամ ըլլալով, Ֆրանսայի մայրաքաղաքի «Փարիզ Սան Ժերման» ֆութպոլի խումբը յաջողեցաւ տիրանալ ֆրանսայի ախոյեանութեան: Տարեշրջանի առաջին օրէն իսկ յստակ էր կորովը Նեյմարի ընկերներուն, որոնք յաղթական արդիւնքներով տիրապետեցին բոլոր՝ 30 մրցումներուն:
Այս ախոյեանական տիտղոսը ՓՍԺ-ի համար վերջին 7 տարիներու ընթացքին 6-րդն էր: Մայրաքաղաքի ակումբը շրջանցեց «Լիոն»ը (7 տիտղոս) եւ հաւասարեցաւ «Մոնաքօ»ին ու «Նանտ»ին (8 տիտղոս): Հիմա ՓՍԺ-ը գերազանցած է միայն «Մարսելի»ն (9 տիտղոս) եւ «Սանթ Էտյէնի»ն (10 տիտղոս):

Պատրաստեց
Ռաֆֆի Սիւլահեան

Share.

Leave A Reply

This site uses Akismet to reduce spam. Learn how your comment data is processed.