ՀՀ ՀԱԼԷՊԻ ԳԼԽԱՒՈՐ ՀԻՒՊԱՏՈՍԻՆ ՍՈՒՐԻՈՅ ՀԱՆՐԱՊԵՏՈՒԹԵԱՆ ՄՈՒՖԹԻ ԽՈՐՀՐԴԱԿԱՆԻՆ ՀԵՏ ՀԱՆԴԻՊՈՒՄԸ

0

1 Մայիսին Հալէպի ՀՀ Գլխաւոր Հիւպատոսութենէն ներս Սուրիոյ Արաբական Հանրապետութեան Մուֆթի (հոգեւոր առաջնորդ) Ահմատ Պատր ալ Տին Հասունի խորհրդական Պասէլ Քըս Նասրալլայի հետ հանդիպում տեղի ունեցաւ:
Հանդիպման ընթացքին բարձր գնահատուեցան սուրիահայ համայնքին կառուցողական դերակատարութիւնն ու անգնահատելի աւանդը Սուրիոյ շէնացման եւ բարգաւաճման գործընթացին մէջ: Պասէլ Քըս Նասրալլա Հայաստանի Հանրապետութեան իշխանութիւններուն եւ ժողովուրդին ՀՀ մարդասիրական առաքելութեան խումբի գործունէութեան համար Մուֆթիին երախտագիտութիւնն ու շնորհակալական խօսքերը փոխանցեց, միաժամանակ շեշտելով, որ խումբի մարդասիրական աշխատանքները թէ՛ առողջապահութեան, եւ թէ մարդասիրական ականազերծման ոլորտներուն մէջ Սուրիոյ ժողովուրդի մեծ համակրանքին եւ բարձր գնահատականին արժանացած են:
Հալէպի ՀՀ գլխաւոր հիւպատոսը իր կարգին յայտնեց, որ սուրիական ճգնաժամի ողջ ընթացքին Դամասկոսի եւ Հալէպի մէջ գործող Հայաստանի դիւանագիտական ներկայացուցչութիւնները աշխատած են ամբողջական թափով` բաժնեկցելու Սուրիոյ ժողովուրդին կրած պատերազմի ողջ զրկանքներն ու դառնութիւնները: Հայաստանի կառավարութեան եւ ժողովուրդին անունով բազում մարդասիրական օգնութիւններ ուղարկուած են Սուրիոյ բարեկամ ժողովուրդին՝ իբրեւ բարոյական պարտքի դրսեւորում:
Գլխաւոր Հիւպատոսութենէն ներս ՀՀ մարդասիրական առաքելութեան խումբի ներկայացուցիչ Արկատի Տօնոյեան շնորհակալութիւն յայտնելով Մուֆթիին բարձր գնահատականի եւ վստահութեան համար նկատել տուաւ, որ մեր հայրենակիցներուն ցուցաբերուած մեծ մարդասիրութիւնը աշխարհասփիւռ հայ ժողովուրդին կողմէ չէ մոռցուած: Խումբին գործունէութիւնը պատերազմական իրավիճակի մէջ գտնուող Սուրիոյ ուղղուած Հայաստանի Հանրապետութեան եղբայրական աջակցութիւնն է, որուն նպատակն է Սուրիոյ մէջ բնակող ժողովուրդին բեռը թեթեւցնել ու կարիքաւոր քաղաքացիներուն բժշկական անվճար ծառայութիւններ մատուցել:

Share.

Leave A Reply

This site uses Akismet to reduce spam. Learn how your comment data is processed.