ԻՇԽԱՆ ՍԱՂԱԹԷԼԵԱՆ. «ՀՅԴ -Ն ՅՍՏԱԿ ՕՐԱԿԱՐԳ ՈՒՆԻ»

0

«Ժողովուրդ» օրաթերթը ՀՅԴ Հայաստանի Գերագոյն Մարմինի ներկայացուցիչ Իշխան Սաղաթէլեանի հետ զրոյց մը կատարած է:
«Ժողովուրդ»-Դաշնակցութիւնը վերջին շրջանին բաւականին աշխուժութիւն կը ցուցաբերէ: Օրեր առաջ Արծուիկ Մինասեան մամլոյ ասուլիսի ընթացքին այժմու իշխանութիւններուն քաղաքականութեան հետ կապուած հարցերուն անդրադարձաւ: Դուք բաւականին գործունեայ էք. ՀՅԴ-ն յայտարարութիւններ կ’ընէ` քննադատելով իշխանութիւններուն գործելաոճը: Ինչո՞վ պայմանաւորուած է այս: Այժմու իշխանութիւններուն հետ կապուած մտավախութիւններ ունի՞ք:
Ի.Ս.-Մենք օրակարգ ունինք, ըսելիք եւ ընելիք ունինք, եւ մեր գործունէութիւնը ասոնց վրան հիմնուած է: Մենք յատուկ ջանք չենք գործադրեր, որ այդ իշխանութիւնը տապալի, բայց մեր ձեռքերը ծալած չենք նստած: Մենք մեր ամէնօրեայ աշխատանքով, մեր կեցուածքով, մեր փաստարկուած, հիմնաւորուած քննադատութեամբ իշխանութեան ուշադրութեան կը հրաւիրենք երկրին մէջ կուտակուած բազմաթիւ հարցերը, որոնք կան, եւ անոնց լուծումներու որոնման կոչ կ’ուղղենք:

«Ժ.»-Վերջին շրջանին 2 Հոկտեմբերին ընդունուած «Աժ կանոնակարգ» օրէնքի փոփոխութիւններուն հետ կապուած Սահմանադրական Դատարանի որոշումը շատ քննարկուեցաւ: Դուք բազմիցս ըսած էք, որ ճիշդ ընթացքի մէջ էք այս հարցին առնչութեամբ: Բաւարարուա՞ծ էք նման յայտարարութիւններով: Ին՞չ հետեւանքներ կ’ունենան ձեր մօտեցումները, ի՞նչ քայլերու պիտի ձեռնարկէք:
Ի.Ս.-Իշխանութիւնը յեղափոխականներու եւ հակայեղափոխականներու կեղծ օրակարգը ստեղծեց, ու այդ ճանապարհով իր հարցերը լուծեց, այսինքն` Դեկտեմբերին տեղի ունեցան ընտրութիւններ, որոնք այն ատեն ալ ըսած ենք, հիմա դարձեալ կը կրկնենք` սխալ էին: Մենք ըսած էինք, որ ընտրութիւնները սահմանադրական ճանապարհով պէտք է տեղի ունենան, խորհրդարանը պէտք է լուծարուի ոչ թէ ուժի իրաւունքով, այլ օրէնքի ուժով: Սահմանադրական Դատարանի որոշումը մէկ անգամ եւս փաստեց, որ մենք ճիշդ կ’ըսէինք : Այժմ մենք այլ գործընթաց սկսելու մտադրութիւն չունինք: Տարածուած է, թէ Դաշնակցութիւնը իշխանութեան անվստահութեան կամ դատարան մտնելու հարց դրած է, մենք մեր օրակարգին մէջ նման հարց չունինք:
«Ժ.»- Կրնա՞յ հետագային ըլլալ:
Ի.Ս.– Կեանքն ու ժամանակը ցոյց կու տան: Այժմ նման օրակարգ չունինք: Խորքին մէջ մենք այդ կարելիութիւնն ալ չունինք, որովհետեւ խորհրդարանական կուսակցութիւնները պէտք է ընեն ատիկա:
«Ժ.»- Արդեօք իրենց հետ գործակցութեան միջոցով նման բան կրնայ ըլլա՞լ:
Ի.Ս.-Մենք որեւէ մէկուն հետ նման քննարկում չենք կատարած: Մեր ժողովներուն նման քննարկում չէ եղած:
«Ժ.»- Մամուլի մէջ շրջանառուած է, որ մէկ տարին անցնելուն կը սպասէք, որ ձեր անվստահութիւնը յայտնէք:
Ի.Ս.-Չկայ նման բան: Այս երկիրը այնպիսի իրավիճակի մէջ է, որ չենք կրնար ըսել, թէ մէկ տարի վերջ ի՞նչ կրնանք ընել:
«Ժ.»-Եթէ Դաշնակցութիւնը Ազգային ժողովին ներկայացուած ըլլար, աղմուկ հանած օրէնքին համար դարձեալ նոյն կարծիքը կ’ունենա՞ր:
Ի.Ս.-Մենք որեւէ կաշկանդում չունինք: Ըլլանք խորհրդարանի մէջ, խորհրդարանէն դուրս, իշխանութեան մէջ, իշխանութենէն դուրս, եթէ ունինք տեսակէտ, ուրեմն անոր մասին յստակ յայտարարութիւն ունինք:
«Ժ.»-Ձեր նախկին ժողովին վարչապետը իր ողջոյնի ուղերձին մէջ կուսակցութեան հետ գործակցելու պատրաստակամութիւն յայտնեց: Նախ` ի՞նչ կը նշանակէ գործակցիլ, եւ հիմա արդեօք երկուստէք քայլեր նախաձեռնա՞ծ էք այս առնչութեամբ:
Ի.Ս.- Դաշնակցութիւնը համահայկական ներուժ եւ միջոց ունեցող կազմակերպութիւն է: Եւ՛ Ընդհանուր ժողովին, եւ՛ Գերագոյն ժողովին յայտարարած ենք, որ այդ ներուժը մեր պետութեան ու ժողովուրդին ծառայեցնելու ենք: Եթէ կան հարցեր, ուր մեր կուսակցութիւնը իր հնարաւորութիւններով պետութեան օգտակար կրնայ դառնալ, պիտի ընենք: Գործակցութիւնը այս սահմանումներով հասկնալու ենք: Այսինքն` իշխանութեան մաս կազմել, իշխանութիւն ստանալ եւ այլն, այս գործակցութեան մէջ կը բացառուին, որովհետեւ շատ յստակօրէն նշուեցաւ, որ մենք իշխանութեան հետ, բացառաբար, կրնանք ճանապարհ հարթել: Մենք իշխանութեան մէջ մտանք, որպէսզի օգնենք` ժողովուրդի սպասումները իրականանան, բայց կարճ ժամանակ ետք իշխանութիւնները սկսան սեւ-սպիտակ եւ այլն, եւ այլն:
«Ժ.»-Մամուլի մէջ ամիսներ առաջ ալ յայտնուեցաւ, որ Նիկոլ Փաշինեան, որպէս փորձառու քաղաքական գործիչ, կը պատրաստուի Արծուիկ Մինասեանին պաշտօն առաջարկել: Դուք կը պնդէք, որ Դաշնակցութիւնը երբեւէ նման առաջարկներ չի ընդունիր:
Ի.Ս.- Նման բան չի կրնար ըլլալ:
«Ժ.»-Բոլորին անունով կ’ըսէ՞ք :
Ի.Ս.-Այո՛:

Լուսինէ Մինասեան

Share.

Leave A Reply

This site uses Akismet to reduce spam. Learn how your comment data is processed.