ՄԱՐԶԱԿԱՆ՝ ՕԳՈՍՏՈՍ Ա./2020

0

ՏԵՂԱԿԱՆ

 

ԼՈՒՐԵՐ ՍՈՒՐԻՈՅ ՄԱՐԶԱԿԱՆ ԿԵԱՆՔԷՆ

–              Սուրիոյ Պասքեթի Դաշնութեան նախագահ Ճալալ Նաքրաշ, Շաբաթ օր մամլոյ ասուլիսի մը ընթացքին յայտարարեց իր հրաժարականը: Ըստ Նաքրաշի, Սուրիոյ մարզական գերագոյն գրասենեակը խոչընդոտներ յառաջացուցած է Դաշնութեան (ֆետերասիոն)ի աշխատանքներուն դիմաց:

–              Կիրակի օր Դամասկոսի մէջ տեղի ունեցաւ հանդիպում մը Սուրիոյ Ֆութպոլի ախոյեանութեան աւարտական քառեակի ակումբներու ներկայացուցիչներուն միջեւ:  Նիստին որոշուեցաւ վերջնականապէս չեղեալ համարել 2020 տարեշրջանի ախոյեանութիւնը եւ չորս ակումբներուն տրամադրել նիւթական հատուցում: Աւելցնենք, որ Ճէյշի եւ Ուասպէի խումբերը փափաք յայտնած էին շարունակելու մրցաշարքը, իսկ Իթթիհատն ու Քարամէն առաջարկը մերժած էին:

 

ՀԱՅԿԱԿԱՆ

 

ՀԱՅԱՍՏԱՆԻ ՀԱՒԱՔԱԿԱՆԸ  ՆՈՐ ՏԱՐԱԶ ՈՒՆԵՑԱՒ

Հայաստանի Ֆութպոլի Դաշնութիւնը ներկայացուց հաւաքականի նոր երեք տարազները:  Պատմութեան մէջ առաջին անգամն է, որ կազմը կ’ունենայ երեք տարբեր գոյներով  տարազներ:  Դաշնութիւնը (Ֆետերասիոնը) պաշտօնական իր էջով յայտնեց, որ հաւաքականի արտաքին մրցումներու տարազին գոյնը նարնջագոյնն է, վերջինիս կողքին ան ունի նաեւ կարմիր եւ ճերմակ մարզաշապիկներ:

Մարզաշապիկները պիտի վաճառուին 25 Օգոստոսին:  Հաւաքականի մարզաշապիկները  Macron մակնիշի արտադրութիւն են: Այսպիսով, ՀՖՖ-ն պիտի չշարունակէ իր անդամակցութիւնը UEFA Kit Assistance Scheme ծրագիրին, եւ  Macron ընկերութիւնը պիտի պատրաստէ  Հայաստանի ազգային եւ  բոլոր տարիքային հաւաքականներու, ինչպէս նաեւ ֆուտզալի եւ կանանց հաւաքականներու տարազները:  1 Յունուար 2020-էն սկսեալ,  Macron ընկերութիւնը պաշտօնապէս դարձաւ  ՀՖՖ հովանաւորը: Պայմանագիրը նախատեսուած է մինչեւ 30 Դեկտեմբեր 2023 :

 

ՄԻՋԱԶԱՅԻՆ

 

ՊԱՐՍԵԼՈՆԱՆ ՆԵՐԿԱՅԱՑՈՒՑ ԻՐ ՆՈՐ ՄԱՐԶԻՉԸ

Սպանիոյ Քաթալոնէական ակումբը՝ Պարսելոնան, անցեալ շաբթուան ընթացքին պաշտօնապէս ներկայացուց խումբին նորանշանակ մարզիչը՝ Քումանը: Հոլանտացի մասնագէտը զիջելով իր երկիրի հաւաքականի մարզիչի պաշտօնէն, ընդունեց գլխաւորել սպանական խումբը, պատասխանատուներուն ներկայացնելէ ետք  որոշ պայմաններ, որոնցմէ մէկն էր կարգ մը խաղացողներու հեռացումը խումբէն: Քումանի  նկատի չառած խաղացողներէն մէկն է ուրուկուէյցի մարզիկ Լուիս Սուարէզը: Աւելցնենք, որ Պարսելոնայի արժանթինցի խաղացող Լիոնէլ Մեսին ակումբի պատասխանատուներուն ներկայացուցած է խումբէն հեռանալու իր փափաքը: Քուման վարչութեան հետ միատեղ հանդիպում մը ունեցաւ Մեսիի հետ՝ զինք համոզելու մնալ կազմին մէջ մինչեւ պայմանագիրին աւարտը:

ՍԵՒԻԼԻԱՆ ՏԻՐԱՑԱՒ ԵՒՐՕ ԼԻԿԻՆ

Եւրօ Լիկի ախոյեանութեան աւարտական մրցումին, Սպանիոյ Սեւիլիան  3 – 2 արդիւնքով յաջողեցաւ պարտութեան մատնել Իտալիայէն ժամանած Ինթըր Միլանը: Այս վեցերորդ անգամն է, որ Սեւիլիան կը տիրանայ սոյն տիտղոսին. Ան  Եւրօ Լիկի ախոյեան էր 2006-2007-2014-2015-2016 թուականներուն:  Հանդիպումին, Ինթըրի կոլերը նշանակեցին Լուքաքուն եւ Տիէկօ Կոտինը 5-րդ եւ 36-րդ վայրկեաններուն, իսկ Սեւիլիայի կոլերը նշանակեցին Լոք տի Եոնկ՝ երկու կոլ եւ Տիէկօ Գարլոս՝ 12 – 33 – 74-րդ վայրկեաններուն:

 

Պատրաստեց
Ռաֆֆի Սիւլահեան

Share.

Leave A Reply