– Սուրիոյ ֆութպոլի հաւաքականը աւարտեց իր երրորդ ուսումնամարզական հաւաքը, որմէ ետք հաւաքականի մարզիչ Նապիլ Մաալուլ կարճ արձակուրդով մը մեկնեցաւ Թունուս: Հոկտեմբերին հաւաքականը Իմարաթի մէջ պիտի մասնակցի երեք բարեկամական մրցումներու, ուր պիտի հրաւիրուին նաեւ արտասահմանի մէջ հանդէս եկող սուրիացի խաղացողներ:

– Սուրիոյ ֆութպոլի ախոյեանութեան մասնակից խումբերը սկսան վերանորոգել խաղացողներուն պայմանագիրները, ինչպէս նաեւ կազմերուն միացնել նորեկ խաղացողներ:

– Սուրիոյ հաւաքականի խաղացող Մուհամմէտ Օսման մաս կազմեց Քաթարի Խուրէյթաթ խումբին:

– Հալէպի Հուրիէն եւ Դամասկոսի Մաճտ խումբերը յառաջիկայ տարեշրջանին Սուրիոյ Ա. դասակարգի ախոյեանութեան գլխաւոր թեկնածուներն են:

Քաթալոնիայի Պարսելոնա խումբի արժանթինցի խաղացող Լիոնէլ Մեսսի միջազգային «Կոլ» լրատուամիջոցին հետ կատարած զրոյցին ընթացքին, պաշտօնապէս յայտարարեց, որ այս տարեշրջանին դարձեալ պիտի մնայ սպանական խումբին հետ: Մեսսի իր որոշումը փոխելու պատճառին մասին  հարցումին պատասխանելով ըսաւ, որ ընտանիքին անդամները կ’ուզեն մնալ Պարսելոնա, ինչպէս նաեւ իր փոքր մանչը լալով խնդրած է մնալ իր ընկերներուն հետ եւ չտեղափոխուիլ այլ երկիր: Արժանթինցի խաղացողը քննադատեց վարչութեան եւ մանաւանդ նախագահ՝ Քարթոմիոյի անծրագիր աշխատանքը, ինչպէս նաեւ յայտնեց, որ վերջին ձախողութիւններուն գլխաւոր պատասխանատուն ակումբին նախագահն է, որ խաղացողներուն միջեւ անախորժ մթնոլորտ մը ստեղծած է: Այս հանդիպումով Մեսսի վերջ տուաւ շուրջ մէկ ամսուան տեւողութեան յառաջացած լարուած մթնոլորտին:  Աւելցնենք, որ խումբին նորանշանակ մարզիչ Քումանը տարբեր առիթներով ըսաւ, որ Մեսսին եւ մնացեալ խաղացողները նոյն դիրքին վրայ են եւ չկայ խաղացող մը, որ իրաւասութիւն ունի միջամտելու իր գործին:

Մէկ տարուան վարձքը ստանալէ ետք, Գերմանիոյ Պայերն Միունեխ խումբի պրազիլցի խաղացող Ֆիլիփ Քոթինիօ վերադարձաւ իր նախկին քաթալոնէական ակումբ: Գերմանական ակումբին պաշտօնական կայքը տեղեկացուց, որ զոյգ ակումբները համաձայնած են Քոթինիոյի Պարսելոնա վերադարձին շուրջ:  Աւելցնենք, որ Անգլիոյ Արսենալը վերջերս փափաք յայտնած էր մէկ տարուան վարձքով կազմին միացնել Քոթինիօն, սակայն ըստ լուրերուն, Պարսելոնայի նորանշանակ մարզիչ Քումանը ուզած է իր կազմին հետ տեսնել պրազիլցի խաղացողը, որ անցեալ ամսուան ընթացքին Պարսելոնա Միունեխ հանդիպումին, յաջողած էր ի նպաստ իր կազմին նշանակել երկու կոլ:

Ֆրանսայի բազմակի ախոյեան Փարիզ Սան Ժերմանի մամուլի ծառայութիւնը ակումբի պաշտօնական կայքին միջոցաւ յայտարարեց, որ խումբէն երեք խաղացողներ վարակուած են պսակաձեւ ժահրով: Ըստ լուրերուն, պրազիլցի Նէյմար, Անխել Տի Մարիա եւ  Լէանտրօ Փարետեսի բժշկական քննութիւններու ենթարկուած են եւ քննութիւններուն արդիւնքը դրական եղած է: Ֆրանսայի մայրաքաղաքի խումբին երեք խաղացողները 14 օր մեկուսացման շրջան պիտի անցընեն  եւ պիտի չմասնակցին խումբի փորձերուն: Աւելցնենք, որ Նէյմար մէկ տարիով երկարաձգեց իր պայմանագրութիւնը, եւ վերջ տուաւ Պարսելոնա տեղափոխուելու բոլոր տարաձայնութիւններուն։