«Էրմէնիհապեր».-Ֆրանսայի Տեսին քաղաքին մէջ 24 Յուլիսին թրքական ծայրայեղական «Գորշ Գայլեր» խմբաւորման տասնեակ զինուած երիտասարդներ յարձակած էին հայ խաղաղ ցուցարարներուն վրայ եւ նիւթական մեծ վնասներ պատճառած էին: Ձերբակալուած էին կազմակերպիչը` Ահմետ Չեթին եւ այդ կազմակերպութեան 4 անդամները: Անոնք մեղադրուած են հայերուն դէմ ատելութիւն հրահրելու մէջ:
Յիշենք, որ այս մէկը 24 Յուլիսին տեղի ունեցած դէպքին առնչութեամբ Հայկական Հարցի պաշտպանութեան կոմիտէի` (CDCA) ներկայացուցած երկու բողոքներէն մէկն է: Երկրորդ բողոքի նշանակէտը զինուած հաւաքի գործողութիւններն են:
17 Սեպտեմբերին տեղի ունեցած է այդ գործով դատական առաջին նիստը:
Ֆրանսայի Պուրք ան Պրեսի դատախազութեան կողմէն Չեթինի մասին կազմուած մեղադրական եզրակացութեամբ նշուած յանցանքին համար 6 ամսուայ պայմանական բանտարկութիւն, 5 տարի ընտրուելու իրաւունքէն զրկուելու եւ 2․000 եւրօ վճարելու պահանջ ներկայացուած է:
Փաստաբանը յայտնած է, որ Չեթին ընդունած է իր սխալը ու դադրեցուցած է քաղաքական բոլոր գործունէութիւնները:
Նշենք, որ Չեթին ընկերային ցանցի ուղիղ սփռումին ընթացքին ըսած էր․
«Թուրքիոյ կառավարութիւնը թող ինծի ամսական 2․000 եւրօ եւ զէնք տրամադրէ, ես Ֆրանսայի որեւէ մէկ կէտի վրայ կ’ընեմ ինչ որ անհրաժեշտ է»:
Դատավճիռը պիտի կատարուի 5 Նոյեմբերին:
Յիշեցնենք, որ մօտ 500 ֆրանսահայեր 24 Յուլիսին խաղաղ բողոքի ցոյց իրականացուցին ընդդէմ Ատրպէյճանի սադրանքներուն: Թրքական աջակողմեան, ծայրայեղական «Գորշ Գայլեր» խմբաւորման անդամները թրքական դրօշներով, երկաթէ ձողերով եւ դանակներով յարձակած էին հայ խաղաղ ցուցարարներուն վրայ: Սակայն յարձակումը կանխուած էր ֆրանսական ոստիկանութեան միջամտութեան հետեւանքով: