«Արմէնփրէս».-Արցախի Հանրապետութեան Արտաքին Գործոց Նախարարութիւնը յայտարարութեամբ խստօրէն դատապարտած է Ատրպէյճանի կողմէ Արցախի Հանրապետութեան հիւսիս-արեւելքը տեղակայուած հիւանդանոցին դիտաւորեալ գնդակոծութիւնը, ուր բուժում կը ստանային նաեւ քաղաքացիական անձեր:
«Պատերազմի օրէնքների եւ սովորոյթների նմանատիպ կոպիտ խախտումը հերթական անգամ ցոյց է տալիս, որ իր աշխարհաքաղաքական նպատակներին հասնելու ճանապարհին Ատրպէյճանի, Թուրքիայի եւ միջազգային ահաբեկիչների եռեակ դաշինքը հետ չի կանգնելու որեւէ յանցագործութիւնից:
Ատրպէյճանը, որի գործողութիւնները հովանաւորւում եւ ղեկավարւում են Թուրքիայի կողմից, ոչ միայն հրաժարւում է պահպանել մարդասիրական հրադադարը, այլեւ նպատակաուղղուած կերպով ընդլայնում է ագրեսիայի մաշտապներն ու աշխարհագրութիւնը: Մասնաւորապէս` 14 Հոկտեմբերին ատրպէյճանա-թուրքական զինուած ուժերը հարուածել են Հայաստանի Հանրապետութեան տարածքին` նոր մակարդակի հասցնելով տարածաշրջանային խաղաղութեանն ու անվտանգութեանն ուղղուած սպառնալիքները: Ատրպէյճանա-թուրքական կողմի յանցաւոր գործողութիւնները պէտք է արժանանան ամենախիստ դատապարտման եւ վճռական միջոցների` յետագայում դրանց կրկնութիւնը կանխելու համար: Միջազգային հանրութեան կողմից Թուրքիայի, Ատրպէճանի եւ միջազգային ահաբեկիչների եռեակ դաշինքից բխող վտանգի յետագայ անտեսումը կարող է անդառնալի հետեւանքներ ունենալ ոչ միայն Հարաւային Կովկասի համար, այլեւ նրա սահմաններից դուրս:
Վերստին ընդգծում ենք, որ այն պայմաններում, երբ Ատրպէյճանի իշխանութիւնները, ստանալով Թուրքիայի եւ միջազգային ահաբեկիչների աջակցութիւնը եւ մնալով անպատիժ, կորցրել են իրականութեան զգացումը եւ միտումնաւոր կերպով տորպեդահարում են Ռուսաստանի Դաշնութեան եւ ԵԱՀԿ Մինսքի խմբի համանախագահների խաղաղարար նախաձեռնութիւնները` բռնութեան աճը կասեցնելու, բազմաթիւ մարդկային կեանքեր փրկելու եւ տարածաշրջանում տեւական ու կայուն խաղաղութիւն ապահովելու միակ արդիւնաւէտ միջոցը Արցախի Հանրապետութեան անկախութեան միջազգային ճանաչումն է», ըսուած է հաղորդագրութեան մէջ: