ՄԱՐԶԱԿԱՆ՝ ՀՈԿՏԵՄԲԵՐ Գ./2020

0
ՏԵՂԱԿԱՆ
ԼՈՒՐԵՐ ՍՈՒՐԻՈՅ ՄԱՐԶԱԿԱՆ ԿԵԱՆՔԷՆ
– Սուրիոյ Ֆութպոլի Դաշնութեան նախագահ Հաթէմ ալ Ղայէպ մեկնեցաւ Իմարաթ, ուր հանդիպում ունեցաւ տեղւոյն ֆութպոլի պատասխանատուներուն հետ: Հանդիպումին խօսուեցաւ զոյգ դաշնութիւններուն միջեւ գործակցութեան առնչուող հարցեր:
– Սուրիոյ Պասքեթի Դաշնութիւնը հրապարակեց պասքեթի հաւաքականի խաղացողներուն ցանկը եւ կատարեց իր առաջին հաւաքը Հոմսի մէջ: Հաւաքականի տեղացի մարզիչ նկատի առնուած է Ազամ Հուսէյնը, իսկ որպէս արհեստավարժ մարզիչ դաշնութիւնը նկատի առած է ամերիկացի մարզիչ Ճոզէֆ Սալերնօն:
– Հալէպի Ճալաա խումբի խաղացող Ճորճ Նազարեան միացաւ Հոմսի Քարամէ ակումբին: Նոյն խումբին միացաւ նաեւ Սուրիոյ ամէնէն երկար խաղացող Ապտուլ Ուահապ Համուին, որ վերջին տարիներուն մաս կը կազմէր Ճէյշին:
–  Թիշրին եւ Ուահտէ ակումբներուն միջեւ Սուրիոյ ֆութպոլի Սուփըր գաւաթի աւարտական մրցումը տեղի պիտի ունենայ Համայի մէջ: Յիշենք որ սոյն մրցումը տեղի պիտի ունենար Հալէպի Համտանիէ մարզադաշտին վրայ, սական Դամասկոսի խումբի բողոքին համար փոփոխութեան ենթարկուեցաւ մրցումին վայրը:
ՀԱՅԿԱԿԱՆ
ԱՐՑԱԽԻ ՄԷՋ ՄԱՐԶԻԿ ՆԱՀԱՏԱԿ ՄԸ
Խոր վիշտով կը տեղեկացնենք, որ Արցախի մէջ արիաբար զոհուած է «Նայիրի» պասքեթպոլի խումբի սան Աշոտ Խաչատրեան։
Հայաստանի Պասքեթպոլի Դաշնութիւնը իր ցաւակցութիւնը յայտնած է Աշոտի ընտանիքին, հարազատներուն եւ ընկերներուն անոր անժամանակ մահուան համար, ինչպէս նաեւ Ատրպէյճանի կողմէ սանձազերծուած պատերազմի բոլոր զոհերու հարազատներուն:
ՄԻՋԱԶԳԱՅԻՆ
ՀԱՅԱՍՏԱՆ-ՎՐԱՍՏԱՆ ՀԱՆԴԻՊՈՒՄԸ ՀԱՒԱՍԱՐ ԱՐԴԻՒՆՔՈՎ ԱՒԱՐՏԵՑԱՒ
Հայաստանի ֆութպոլի  հաւաքականը Ազգերու Լիկայի Գ. խմբակի երրորդ մրցումին հանդիպեցաւ Վրաստանին հետ: Հայաստանի ռազմական դրութեան պատճառով Լեհաստանի Տիխի քաղաքին մէջ կայացած հանդիպումին, սպանացի մարզիչ Խոակին Կապառոսի ղեկավարած խումբը  բաւարարուեցաւ հաւասարութեամբ: Վրաստանի հաւաքականը հանդէս եկաւ ոչ հիմնական կազմով, որովհետեւ 8 Հոկտեմբերին Եւրո-2020-ի որակաւորման փուլի կիսաեզրափակիչին հանդիպած էին  Պելառուսիոյ հետ  եւ յաղթած էին 1-0 արդիւնքով:  Հայաստանի հաւաքականը 6-րդ վայրկեանին յաջողեցաւ կատարել կոլերուն բացումը Տիգրան Բարսեղեանի միջոցաւ եւ նոյն արդիւնքով շարունակեց առաջին կիսախաղը: Դադարէն անմիջապէս ետք մրցակիցը յաջողեցաւ արձանագրել հաւասարութեան կոլը: 74-րդ վայրկեանին կիսապաշտպան Թոռնիկէ Օքրիաշվիլին նշանակեց վրացիներուն երկրորդ հարուածը: Հայաստանի հաւաքականի խաղացողները տիրապետելով խաղարկութեան, այլ առիթներով յաջողեցան հասնիլ մրցակիցին դարպասը. 88-րդ վայրկեանին Հայաստանի հաւաքականը արձանագրեց երկրորդ  կոլը։ Ազգային հաւաքականին հետ իր անհատական  30-րդ կոլը արձանագրեց  կիսապաշտպան Հենրիկ Մխիթարեան։
ՌԱՖԱՅԷԼ ՆԱՏԹԱԼ ԴԱՐՁԱՒ ՌՈԼԱՆ ԿԱՐՈՍԻ ԱԽՈՅԵԱՆ
Կիրակի օր տեղի ունեցաւ Ռոլան Կարոս մրցաշարքի աւարտական մրցումը սպանացի Ռաֆայէլ Նատալի եւ համաշխարհային արհեստավարժ թենիս խաղացողներու աղիւսակին առաջին դիրքը գրաւող Նովաք Ճոքովիջին միջեւ: Մրցումին իշխող դիրք վայելեց սպանացին, որ յաջողեցաւ պարտութեան մատնել մրցակիցին 6-0,  6-2 եւ 7-5 արդիւնքներով: Սոյն արդիւնքով Նատալ հաւասարեցաւ զուիցերիացի խաղացող Ռոժէ Ֆետրերին արձանագրելով Կրանտ Սլամի 20  եւ Ռոլան Կարոսի 13 տիտղոս:
Պատրաստեց
Ռաֆֆի Սիւլահեան
Share.

Leave A Reply