Արցախեան պատերազմը թեւակոխեց իր երրորդ շաբաթը: Հայ կնոջ դերակատարութիւնը ակներեւ դարձաւ պատերազմի առաջին օրէն իսկ: Հարիւրաւոր կանայք  կամաւորագրուեցան, որպէսզի անհրաժեշտութեան պարագային մասնակցին մարտերուն:

 Հայաստանի Հանրապետութեան  Պաշտպանութեան  Նախարարութեան մամուլի քարտուղար ռազմական փորձագէտ  Արծրուն Յովհաննիսեանը  քանի մը օր առաջ յայտարարեց թէ՝ անդադար նամակներ կը ստանայ հայ աղջիկներէ, որոնք կ’ուզեն զէնք վերցնել եւ պաշտպանել հայրենիքը:  Ուստի Նարի Սիւնի եւ Նարէ Խլղաթեան կազմեցին  Արցախի կանանց ջոկատ: «Արդէն հարիւր կին արձանագրուած է, կան բազմաթիւ դիմումներ: Առիւծը առիւծ է՝ տղամարդ լինի, թէ կին:  Նրանք, մեր դուստրերը, մեր քոյրերը մեր պատիւն են: Հենց իրենցով էլ պիտի յաղթենք», աւելցուցած էր Յովհաննիսեան:

Մեր կամաւոր հայուհիներէն Աղաւնին գրած է.

«Պատերազմի ընթացքին կնոջ ներկայութիւնը կարեւոր է: Հայրենիքը միայն տղամարդունը չէ: Կանայք ալ կ’օգտուին հայրենիքի բարիքներէն, ուրեմն մենք ալ պէտք է պաշտպանենք մեր հայրենի հողն ու ջուրը»:

Կարինէն այսպէս արտայայտուեցաւ ռազմաճակատ մեկնելէն առաջ: «Իմ ոգին պարտուիլ չի գիտի: Ես նոյնպէս գրւում եմ կամաւոր: Շուտով կը միանամ քաջ տղերքին: Էս անգամ լաւ ջարդելու ենք : Մենք ենք տէրը մեր երկրի»:

Իսկ Նարէ Խլղաթեան յայտարարեց.

Այսօր մենք տասը հոգի ենք, վաղը կարող ենք դառնալ 100, 1000 բանակ»:

Պատմութեան ընթացքին հայ կինը իր ամուսնոյն կողքին կռուած է իր երկրի եւ ժողովուրդի անկախութեան համար: Այնքան ատեն որ  ունինք այսպիսի կանայք, մեր նայիրեան աղջիկներով ա՛լ պիտի յաղթենք: