ԱՌԱՋՆՈՐԴ ՍՐԲԱԶԱՆ ՀԱՅՐՆ ՈՒ ԻՐԵՆ ԸՆԿԵՐԱԿՑՈՂ ՊԱՏՈՒԻՐԱԿՈՒԹԻՒՆԸ ԱՅՑԵԼԵՑԻՆ ՍՈՒՐԻՈՅ ԿՐՕՆԱԿԱՆ ԿԱԼՈՒԱԾՆԵՐՈՒ ՆԱԽԱՐԱՐԻՆ ԹԱՐԹՈՒՍԻ ԻՐ ԲՆԱԿԱՐԱՆԷՆ ՆԵՐՍ

0
يوم الجمعة 13 تشرين الثاني 2020 ظهراً، التقى سيادة المطران ماسيس زوبويان مطران الأرمن الأرثوذكس لأبرشية حلب و توابعها خلال زيارته الرعوية إلى الساحل السوري وزير الأوقاف السوري الدكتور محمّد عبد الستار السيد في مقر إقامته في طرطوس، برفقة وفد من المجلس التنفيذي و الرعوي لمطرانية الأرمن الأرثوذكس.
———————————
Ուրբաթ, 13 Նոյեմբեր 2020-ին, կէսօրուան ժամը 1:00-ին, Բերիոյ Հայոց Թեմի Բարեջան Առաջնորդ Գերշ. Տ. Մասիս Սրբ. Եպս. Զօպուեան հովուական այցելութեամբ Թարթուս գտնուած շրջանին, իրեն ընկերակցող պատուիրակութեան հետ այցելեց Սուրիոյ կրօնական կալուածներու նախարար դոկտ. Մուհամմետ Ապտուլ Սաթթար ալ Սայէտին, Թարթուսի իր բնակարանէն ներս: Պատուիրակութեան մաս կը կազմէին Ազգային Վարչութեան անդամ Մեթր Հուրի Ապահունի-Պօշկէզէնեան, Կրօնական Ժողովի անդամ Արժ. Տ. Խորէն Քհնյ. Պէրթիզլեան, Լաթաքիոյ ու ծովափնեայ շրջանի հոգեւոր հովիւ Արժ. Տ. Վազգէն Քհնյ. Քէօշկէրեան եւ տիար Կարօ Փամպուքեան:
Նախարարը ջերմապէս դիմաւորեց Առաջնորդ Սրբազան Հայրը եւ իրեն ընկերակցող պատուիրակութիւնը: Այցելութեան առիթով Նախարարը իր գոհունակութիւնը յայտնեց, միաժամանակ շեշտեց Սուրիոյ մէջ հայ համայնքին ստանձնած իւրայատուկ տեղն ու դերը Սուրիոյ բարգաւաճման եւ զարգացման գործընթացին մէջ:
Մտերմիկ զրոյցի ընթացքին Նախարարը ընդգծեց, որ հայերը իրենց ողջ պատմութեան ընթացքին Սուրիոյ խճանկարին մէջ ունեցած են իրենց շքեղ երթը՝ կեանքի բոլոր բնագաւառներէն ներս: Ան լուսարձակի տակ առաւ Սուրիոյ ազնիւ ժողովուրդին եւ հայութեան միջեւ արմատացած բարեկամական կապերը, որոնք պատմականօրէն իւրայատուկ նշանակութիւն ունեցած են:
Խորհրդակցական հանդիպումին Թեմակալ Առաջնորդը լուսարձակի տակ առաւ թեմին դիմագրաւած մարտահրաւէրներն ու դժուարութիւնները, միաժամանակ յայտնելով, որ համագործակցութեան ոգիով եւ հետեւողական ջանքերով կարելի պիտի ըլլայ յաղթահարել բոլոր խոչընդոտները: Շեշտուեցաւ իսլամ- քրիստոնեայ սերտ յարաբերութիւններու անհրաժեշտութիւնը, միասնական աշխատանքով վերածաղկեցնելու սուրիական հայրենիքը:
Նախարարը դրուատիքով անդրադարձաւ սուրիահայութեան շինիչ ներկայութեան եւ գործօն դերակատարութեան, յայտնելով, որ սուրիահայերը, որպէս սուրիացի քաղաքացիներ գործնապէս ապացուցեցին իրենց հաւատարմութիւնն ու կառչածութիւնը սուրիական հայրենիքին եւ համամարդկային արժէքներուն նկատմամբ պերճախօս օրինակ հանդիսանալով ուրիշներուն:
Աւարտին, սրբազան հայրը երախտագիտութեամբ եւ պարծանքով անդրադարձաւ Սուրիոյ Վսեմաշուք Նախագահ տոքթ. Պաշար ալ Ասատի հպարտառիթ կեցուածքներուն Սուրիոյ ազատագրման գործընթացին մէջ, ինչպէս նաեւ սուրիական բանակին արձանագրած հսկայական յաղթանակներուն, որոնց շնորհիւ այսօր Սուրիան կ’ապրի առաւել կայուն քաղաքական վիճակի մէջ:
Նախարարը եւ սրբազան հայրը անդրադարձան Արցախի վերջին իրադարձութիւններուն: Պարոն Նախարարը ցաւով անդրադարձաւ Արցախի ներկայ իրավիճակին եւ ստորագրուած պայմանագրութեան, իր զօրակցութիւնը յայտնելով Հայաստանին եւ Արցախի Հայ Ժողովուրդին:
Հանդիպումի աւարտին, սրբազան հայրը Նախարարին փոխանցեց ՆՍՕՏՏ Արամ Ա. Վեհափառ Հայրապետին ողջոյնները եւ այս առիթով Նախարարին նուիրեց Վեհափառ Հայրապետին «The Armenian Church» գիրքի արաբերէն թարգմանութիւնը:
Share.

Leave A Reply