Ուրբաթ, 13 Նոյեմբեր 2020-ին, Բերիոյ Հայոց Թեմի Բարեջան Առաջնորդ Գերշ. Տ. Մասիս Սրբ. Եպս. Զօպուեան հովուական այցելութեամբ մեկնեցաւ ծովափնեայ շրջան, չորս օրերու տեւողութեամբ:

Ուրբաթ, առաւօտեան ժամը 10:30-ին, Առաջնորդ Սրբազան Հայրը պատուիրակութեամբ մը ժամանեց Թարթուս: Սրբազան Հօր ընկերակցող պատուիրակութեան մաս կը կազմէին Ազգային Վարչութեան անդամներ Մեթր Հուրի Ապահունի-Պօշկէզէնեան, տիար Հրայր Թրթռեան եւ Կրօնական Ժողովի անդամ Արժ. Տ. Խորէն քհնյ. Պէրթիզլեան:

Առաջնորդ Սրբազան Հայրը եւ իրեն ընկերակցող պատուիրակութիւնը ջերմապէս դիմաւորուեցան Լաթաքիոյ եւ ծովափնեայ շրջանի հոգեւոր հովիւ Արժ. Տ. Վազգէն քհնյ. Քէօշկէրեանի, Թարթուսի թաղական խորհուրդին եւ անոր ատենապետ տիար Աւօ Քուրթուքեանի, Լաթաքիոյ Ս. Աստուածածին եկեղեցւոյ թաղական խորհուրդին եւ անոր ատենապետ տիար Վահէ Կարճիկեանի կողմէ: Թարթուսի մէջ Առաջնորդ Սրբազան Հայրը իր անդրանիկ պատարագը մատուցեց յոյն ուղղափառ «Սուրբ Դանիէլ» եկեղեցւոյ մէջ, ուր ներկայ գտնուեցան Թարթուսի, Պանիասի եւ շրջակայքի հաւատացեալները, Լաթաքիայէն պատուիրակութիւն մը, գլխաւորութեամբ՝ Լաթաքիոյ Ս. Աստուածածին եկեղեցւոյ թաղական խորհուրդին եւ անոր ատենապետ տիար Վահէ Կարճիկեանի: Պատարագի հոգեպարար երգեցողութիւնը կատարեց թարթուսահայութեան դպրաց դասը, ղեկավարութեամբ՝ տիար Յովիկ Գըլնճեանի:

Լաթաքիոյ եւ ծովափնեայ շրջանի հոգեւոր հովիւ Արժ. Տ. Վազգէն քհնյ. Քէօշկէրեան խօսք առնելով բարի գալուստ մաղթեց Առաջնորդ Սրբազան Հօր:

Սրբազան Հօր պատգամին բնաբանը կը կազմէր Պօղոս առաքեալի հետեւեալ խօսքը. «Տագնապի մատնուած ենք բայց ընկճուած չենք. նեղութիւններ անպակաս են, բայց յուսահատ չենք», որուն ընդմէջէն բոլորս կը հրաւիրուինք յոյսով ներշնչուելու եւ լաւատեսութեամբ տոկալու, հակառակ կեանքի դժուարին պայմաններուն:

Սրբազան Հայրը յատուկ կերպով անդրադարձաւ Արցախի մէջ տեղի ունեցող իրադարձութիւններուն, ուր ցաւ յայտնելով յիշեց, թէ Արցախէն որոշ հողեր խլուեցան մեզմէ, մեր դարաւոր թշնամին գրաւեց մեր սուրբ հողը, սակայն հակառակ այս բոլորին Մասիս եպիսկոպոս ներկաներուն ուշադրութեան յանձնեց երբեք չյուսալքուիլ եւ յիշել առաքեալին արտասանած բառերը:

Քարոզի աւարտին Սրբազան Հայրը գնահատեց Լաթաքիոյ եւ ծովափնեայ շրջանի հոգեւոր հովիւին ծառայութիւնը, ինչպէս նաեւ խրախուսեց Թարթուսի թաղական խորհուրդը եւ դպրաց դասի անդամները մաղթելով բոլորին արեւշատութիւն եւ պտղաբեր ծառայութիւն:

Յետ պատարագին տեղի ունեցաւ հոգեհանգստեան արարողութիւն՝ Արցախի մէջ նահատակուած քաջարի հերոսներու հոգիներուն խաղաղութեան համար: Պատարագի աւարտին թափօրը ուղղուեցաւ դէպի եկեղեցւոյ շրջափակը, ուր ներկաները միասնաբար երգեցին «Կիլիկիա» մաղթերգը, որմէ ետք Սրբազան Հայրը «Պահպանիչ» աղօթքը արտասանեց: Ապա, եկեղեցւոյ ներքնասրահէն ներս ներկայացուեցաւ գեղարուեստական կոկիկ յայտագիր, եկեղեցւոյ դպրաց դասի անդամներուն կողմէ:

Նոյն օրը, կէսօրուան ժամը 1:00-ին, Առաջնորդ Սրբազան Հայրը եւ իրեն ընկերակցող պատուիրակութիւնը այցելեցին Սուրիոյ կրօնական կալուածներու նախարար դոկտ. Մուհամմէտ Ապտուլ Սաթթար ալ Սայէտին, Թարթուսի իր բնակարանէն ներս: Պատուիրակութեան մաս կը կազմէին Ազգային Վարչութեան անդամ Մեթր Հուրի Ապահունի-Պօշկէզէնեան, Կրօնական Ժողովի անդամ Արժ. Տ. Խորէն Քհնյ. Պէրթիզլեան, Լաթաքիոյ ու ծովափնեայ շրջանի հոգեւոր հովիւ Արժ. Տ. Վազգէն Քհնյ. Քէօշկէրեան եւ տիար Կարօ Փամպուքեան:

Այցելութեան առիթով Նախարարը իր գոհունակութիւնը յայտնեց, միաժամանակ շեշտեց Սուրիոյ մէջ հայ համայնքին ստանձնած իւրայատուկ տեղն ու դերը Սուրիոյ բարգաւաճման եւ զարգացման գործընթացին մէջ:

Խորհրդակցական հանդիպումին Թեմակալ Առաջնորդը լուսարձակի տակ առաւ թեմին դիմագրաւած մարտահրաւէրներն ու դժուարութիւնները, միաժամանակ յայտնելով, որ համագործակցութեան ոգիով եւ հետեւողական ջանքերով կարելի պիտի ըլլայ յաղթահարել բոլոր խոչընդոտները: Շեշտուեցաւ իսլամ- քրիստոնեայ սերտ յարաբերութիւններու անհրաժեշտութիւնը, միասնական աշխատանքով վերածաղկեցնելու սուրիական հայրենիքը:

Աւարտին, սրբազան հայրը երախտագիտութեամբ եւ պարծանքով անդրադարձաւ Սուրիոյ Վսեմաշուք Նախագահ տոքթ. Պաշշար ալ Ասատի հպարտառիթ կեցուածքներուն Սուրիոյ ազատագրման գործընթացին մէջ, ինչպէս նաեւ սուրիական բանակին արձանագրած հսկայական յաղթանակներուն, որոնց շնորհիւ այսօր Սուրիան կ’ապրի առաւել կայուն քաղաքական վիճակ:

Պարոն Նախարարը ցաւով անդրադարձաւ Արցախի ներկայ իրավիճակին եւ ստորագրուած պայմանագրութեան, իր զօրակցութիւնը յայտնելով Հայաստանին եւ Արցախի հայ ժողովուրդին:

Հանդիպումի աւարտին, սրբազան հայրը Նախարարին փոխանցեց ՆՍՕՏՏ Արամ Ա. Վեհափառ Հայրապետին ողջոյնները եւ այս առիթով Նախարարին նուիրեց Վեհափառ Հայրապետին «The Armenian Church» գիրքի արաբերէն թարգմանութիւնը:

Երեկոյեան Առաջնորդ Սրբազան Հայրը հովուական այցելութիւն տուաւ Քեսապ, ուր դիմաւորուեցաւ Արժ. Տ. Սուրէն քհնյ. Արսլանեանի եւ եկեղեցւոյ թաղական խորհուրդին կողմէ, ապա Ս. Աստուածածին եկեղեցւոյ մէջ կանոնական աղօթք մատուցուեցաւ, որմէ ետք «Սահակեան» սրահին մէջ հանդիպում ունեցաւ Քեսապի ազգային մարմիններուն, ազգային վարժարանի հոգաբարձութեան եւ Միութիւններու ներկայացուցիչներուն հետ: Սրբազան հայրը Արցախի կացութեան անդրադառնալով դիտել տուաւ, որ հայոց բանակին հերոսական պայքարը հայուն ինքնապաշտպանութեան եւ ազգային արժանապատուութեան պահպանման արտայայտիչն է: Սրբազան հայրը Հայրենիքին նկատմամբ անվերապահ սէր եւ ամբողջանուէր նուիրում ունենալը էական նկատեց ի խնդիր մեր իրաւունքներու պահպանման եւ ազգային շահերու հետապնդման:

Մասիս եպիսկոպոս գնահատեց Քեսապի թաղական խորհուրդը, ազգային մարմինները եւ շրջակայքի հայութիւնը, մաղթելով արեւշատութիւն եւ խաղաղ օրեր:

Սրբազան հայրը խորհրդակցական հանդիպում ունեցաւ նաեւ Քեսապի Ս. Աստուածածին եկեղեցւոյ թաղական խորհուրդին հետ եւ իրազեկ դարձաւ Քեսապահայութեան դիմագրաւած մարտահրաւէրներուն: