«Երկիր».-14 Յունուարին ՀՀ պաշտպանութեան նախարար Վաղարշակ Յարութիւնեան ընդունած է Հայաստանի Հանրապետութեան Պելառուսի Հանրապետութեան արտակարգ եւ լիազօր դեսպան Ալեքսանդր Կոնիւքը:
Հանդիպումին մասնակցած են նաեւ ՀՀ Պելառուսի դեսպանութեան խորհրդական Վեաչեսլաւ Լիսուխան եւ պաշտպանական հարցերու կցորդ, գնդապետ Եւկենի Արտեօմենքօն:
ՀՀ պաշտպանութեան նախարարը շնորհաւորած է դեսպանը Հայաստանի մէջ առաքելութիւնը ստանձնելուն առիթով եւ մաղթած է նորանոր յաջողութիւններ:
Հանդիպումի ընթացքին կարծիքներ փոխանակուած են միջազգային եւ տարածաշրջանային անվտանգութեան հարցերու շուրջ:
Քննարկուած են պաշտպանական ոլորտի հայ-պելառուսական գործակցութեան հարցեր, փոխգործակցութեան հետագայ զարգացման ուղիները, ինչպէս նաեւ բազմակողմ ձեւաչափերով ծրագրուած նախաձեռնութիւնները:
ՀՀ պաշտպանութեան նախարարը վստահութիւն յայտնած է, որ նորանշանակ դեսպանին աշխուժ եւ արդիւնաւէտ աշխատանքին շնորհիւ հայ-պելառուսական միջպետական յարաբերութիւններն ու քաղաքական երկխօսութիւնը աւելի կ’ամրապնդուին ու կը ստանան նոր որակ: