ՏԵՂԱԿԱՆ
ԼՈՒՐԵՐ ՍՈՒՐԻՈՅ ՄԱՐԶԱԿԱՆ ԿԵԱՆՔԷՆ
– Սուրիոյ պասքեթի աղջկանց Բ. դասակարգի ախոյեանական մրցումներուն, Համայի մէջ ՀՄԸՄ-ի աղջկանց կազմը 49 – 32 արդիւնքով յաջողեցաւ պարտութեան մատնել հիւրընկալ Սալամիէին: Խումբը Ուրբաթ օր Հալէպի մէջ պիտի դիմաւորէ իր մրցակիցը՝ Թատամոնը, որուն յաղթելը կարեւոր նշանակութիւն ունի ՀՄԸՄ-ի խումբին համար:
– Սուրիոյ պասքեթի երիտասարդական տարիքի ախոյեանական մըրցումներուն ՀՄԸՄ-ի տղոց խումբը 77-75 արդիւնքով յաջողեցաւ պարտութեան մատնել մրցաշարքի լաւագոյն խումբերէն Իթթիհատը:
– Հալէպի Իթթիհատ ակումբի վարչութիւնը պասքեթի խումբի նոր մարզիչ նշանակեց սերպ Ֆինքօ Փաքիթչը: Ֆինքօն նախապէս մարզած է լիբանանի երիտասարդական հաւաքականը ինչպէս նաեւ արաբական այլ ակումբներու կրտսեր տարիքային կազմեր: Իթթիհատի պատասխանատուները նաեւ նշանակեցին ֆութպոլի արհեստավարժ մարզիչ մը, որուն անունը տակաւին չյայտարարուեցաւ:
ՄԻՋԱԶԳԱՅԻՆ
ՕՓԱՄԵՔԱՆՕ ՄԻԱՑԱՒ ՊԱՅԵՐՆ ՄԻՒՆԵԽԻՆ
Գերմանիոյ բազմակի ախոյեան Պայերն Միւնեխ ակումբը իր պաշտօնական էջով յայտարարեց, թէ վարչութիւնը համաձայնութեան պայմանագիր մը ստորագրած է Լայզեչ խումբի պաշտպանողական խաղացող Ֆրանսացի Տայօթ Օփամեքանոյի հետ: Ըստ տեղեկութիւններուն, ֆրանսացի մարզիկը հինգ տարուան պայմանագրութեամբ իր նոր խումբին պիտի միանայ 1 Յուլիսին: Նշենք թէ Օփամեքանոյով հետաքըրքրուած էին նաեւ անգլիական Չելսին եւ Լիվըրփուլը, որոնք բանակցութիւններ կը վարէին իր հետ, բայց ֆրանսացի մարզիկը ուղղուեցաւ դէպի գերմանական խումբ:
ՔՈՒՄԱՆ ՔՆՆԱԴԱՏԵՑ ՍՊԱՆԻՈՅ ԻՐԱՒԱՐԱՐՆԵՐԸ
Սպանիոյ քաթալոնէական ակումբի՝ Պարսելոնայի, գլխաւոր մարզիչ Ռոնալտ Քումանը քննադատեց Սպանիոյ բաժակի Սիվիլիոյ դէմ տեղի ունեցած մրցումին իրաւարարները, նշելով թէ VAR-ի գրասենեակէն հետեւող իրաւարարները պարտաւոր էին միջամտել հանդիպումը ղեկավարող իրաւարարին գործած սխալներուն պարագային: Քուման ըսաւ. «Ես կը զարմանամ, թէ ինչպէ՛ս առիթ կը տրուի դաշտին վրայ նման սխալներու։ Ի՞նչ է VAR-ի իրաւարարներուն պարտականութիւնը, եթէ լուռ պիտի մնան եւ չմիջամտեն մրցումի իրաւարարին գործած սխալներուն: Մենք մէկէ աւելի վնասներ կրեցինք մրցումներու իրաւարարներուն կողմէ»:
ԼԻՎԸՐՓՈՒԼ ՈՉ ՄԷԿ ՏԻՏՂՈՍԻ ՊԻՏԻ ԱՐԺԱՆԱՆԱՅ
Անգլիոյ Լիվըրփուլ ակումբի գլխաւոր մարզիչ Եորկէն Քլոփ ըսաւ, որ այս տարեշրջանին խումբը ոչ մէկ տիտղոսի արժանացաւ։
Մամլոյ ասուլիսի ընթացքին ան դիտել տուաւ, որ կազմը նախորդ տարուան կոչումը պահելու բոլոր առիթները կորսնցուց։ «Մենք արձանագրեցինք երեք հերթական ձախողութիւն, եւ այս տարուան մեր պարտութիւններուն թիւը հասաւ վեցի, որուն պատճառով դուրս մնացինք մրցակցութենէն: Աւելցնենք, որ Լիվըրփուլ ներկայիս ունի միայն 40 կէտ եւ կը գրաւէ աղիւսակի 4-րդ հորիզոնականը: Ախոյեանութեան առաջին դիրքը կը վայելէ Մանչեսթըր Սիթին»:
ՊԱՏՐԱՍՏԵՑ ՌԱՖՖԻ ՍԻՒԼԱՀԵԱՆ