Հայրենիքի Փրկութեան Շարժման նախաձեռնութեամբ Փաշինեանի հրաժարականի պահանջով Արամ Մանուկեանի արձանի մօտէն 23 Փետրուարին սկիզբ առաւ երթը` դէպի Դատախազութեան, այնուհետեւ Ոստիկանութեան շէնք:
ՀՅԴ Հայաստանի ԳՄ անդամ Արծուիկ Մինասեան անհնազանդութեան երթէն առաջ ըսաւ, որ ակնյայտ է որ Փաշինեան այլեւս Հայաստանի մէջ իշխանութիւն չունի` անոր իշխանութիւնը պահողը միայն ոստիկանական համակարգն է:
ՀՅԴ Հայաստանի Գերագոյն Մարմնի ներկայացուցիչ, Հայրենիքի Փրկութեան Շարժման համակարգող Իշխան Սաղաթէլեան քայլերթի ընթացքին յայտարարեց, որ դէպի դատախազութիւն երթը չեղեալ համարուած է եւ երթին մասնակիցները կ’երթան դէպի Ազգային Անվտանգութեան Ծառայութեան շէնք, որմէ յետոյ` Ոստիկանութիւն:
Երթի ընթացքին «Մէկ Հայաստան» կուսակցութեան ղեկավար Արթուր Ղազինեան դիտել տուաւ, որ այս իշխանութիւններու գործողութիւններէն իւրաքանչիւրը բաւարար է քրէական գործ յարուցելու համար․
Քաղաքացիները պատշգամբներէն ողջունեցին Փաշինեանի հրաժարականը պահանջողները: Երթի մասնակիցները պարերաբար կոչ կ’ուղղէին անոնց իջնելու եւ միանալու երթին, միանալու եւ ո՛չ ըսելու Նիկոլին:
Երեւանի փողոցներուն մէջ վարորդները ազդանշաններով ողջունեցին երթի մասնակիցները:
Երթին մասնակցեցան նաեւ զոհուած զինուորական ծառայողներու ծնողներ:
Պարբերաբար յայտարարութիւններով հանդէս եկան ընդդիմադիր կուսակցութիւններու ղեկավարներ, նախկին պաշտօնեաներ եւ անհատներ:
Իշխան Սաղաթէլեան յայտնեց, որ այս պահուն երթին զուգահեռ Երեւանի շարք մը փողոցներուն մէջ տեղի կ’ունենան անհանզանդութեան ցոյցեր:
Նշենք, որ ՀՅԴ երիտասարդները աղբամաններով եւ նստարաններով փակած են Խանճեան փողոցը` կաթուածահար ընելով երթեւեկութիւնը:
Փաշինեանի հրաժարականին պահանջով` քաղաքացիները քայլերթով հասան Ոստիկանութեան շէնք, ուր բազմաթիւ ոստիկանական ուժեր կեդրոնացած են: Երթին մասնակիցները վանկարկեցին` «Նիկոլ դաւաճան», «Նիկոլ դաւաճան»:
Ոստիկանութեան շէնքին մօտ ընդդիմադիր քաղաքական գործիչները Արամ Մանուկեանի կիսանդրիին առջեւ ծաղիկներ դրին:
Ոստիկանութեան շէնքին մօտ Իշխան Սաղաթէլեան ընթերցեց ոստիկանութեան ներկայացուցիչներու անունները եւ կոչ ուղղեց չկատարել ապօրինի հրահանգներ:
Ընդդիմութեան վարչապետի թեկնածու Վազգէն Մանուկեան դիմելով ոստիկաններուն` ըսաւ, որ ոստիկաններ շատ տեսած են, Խորհրդային Միութեան ընթացքին պայքարած են, տարբեր նախագահներու ժամանակ պայքարած են, բայց դաժանութիւնը, որ այսօր տեսած է` երբեք չէ եղած:
«Բոլոր բռնութիւն գործադրող ոստիկաններուն դէմքերը նկարեցէք, սիրելի ժողովուրդ: Թող իրենց երեխաները իմանան` իրենց հայրը ինչպէս փող կը վաստակէ», յայտարարեց Վազգէն Մանուկեան:
Քաղաքացիները երթով հասան ԱԱԾ շէնքին մօտ Իշխան Սաղաթէլեան յայտարարեց.«Յարգելի ոստիկանութիւն, խնայեցէք ձեզ եւ ձեր սպայի պատիւը եւ մի դառնաք խաղալիք այդ խելագարի ձեռքին, դուք պէտք է հասկնաք եւ գիտակցիք ձեր առաքելութիւը»: Ան յորդորեց դաւաճանները եւ ֆեյքերը գտնելու համար երթալ կառավարութեան շէնք:
«Առանց Նիկոլ Հայաստան» կարգախօսով երթին մասնակիցները հասան Ֆրանսայի հրապարակ, ուր Գեղամ Մանուկեան յայտարարեց, որ Հինգշաբթի օրը տեղի կ’ունենան ինքնաշարով երթեր, իսկ վաղուան ցոյցերուն բնոյթն ու վայրերը անակնկալ են:
